Babel Libroal Cham Samuel 12 - A Txꞌan Biblia Yin Kꞌanjobal 1989

Max yak'can cham Samuel is yikbej bay Saúl

¹ A wal yet jun bek tu' max yalon cham Samuel bay masanil conob Israel: —Ayex ti' ti wal che yila' max wikejc'al masanil tzet che yala', xan chi wacan oc jun co reyal ti'.

² A ton jun winak ti' co rey, a' ok alon tzet ok junej. Ilek wali, ayin ti' icham winak inxa, caw wal sakxa xil in jolom; axa eb in c'ajol ayoc eb e xol. Ayin max ex wikbaj, c'al walon tzet max e yunej yettaxc'al wach'ejal, masantac'al tinani'.

³ Ti' ayin ec' e satak tinani'. Tok ay junok is wacax ma is burro junok mactxel max wiec'ok, ma ay mac max wetnej, c'al in mak'oni, ma tol ay ch'en tumin max in cha' bay junok mactxel yin junok tzet manak yayji. Alek satak Jehová c'al satak jun co reyal max yaoc Dios ti', ta ay bay max wut axca tu', chi je' chin tojlanej tinani', ẍi cham Samuel.

⁴ —C'am wal junelok max on etnej on, c'am wal bay max a cha' ch'en tumin yin junok tzet yetal, ẍi eb anima tu'.

⁵ —Testigo Jehová, c'al cham co reyal ti' tol c'am in mul max nachajtek e yuj, ẍi cham Samuel. —C'amak, c'amc'al tzet, ẍi eb anima tu'.

⁶ Max yalon pax cham Samuel bay masanil eb yet israelal tu': —A Jehová max sic'on el cham Moisés, c'al cham Aarón yet max yion eltek eb eb jichmam bay Egipto.

⁷ Yuj wal tu xin, ok cam wal e yaben tzet ok wal tinani' satak Jehová, yin tzet yetal watx' max yun jin, c'al yin eb jichmam tu'.

⁸ A yet max apni cham Jacob yetok masanil is familia bay Egipto, caw wal max etax eb yuj eb aj Egipto, max k'an eb jichmam tu' bay Jehová tol chi col-lay eb. Yuj wal tu' xan max yatok Jehová cham Moisés c'al cham Aarón, max bet yion eltek eb cham eb jichmam tu' bay tu', max yiontek eb bay ayon ec' ti' tinani'.

⁹ Palta max toj Jehová c'ayc'ulal yuj eb jichmam tu', yuj tu' max alay oc eb yuj Cham yul k'ab Sísara, general yayji yin eb soldado yet conob Hazor, c'al yul k'ab eb filisteo, c'al yul k'ab reyal Moab. A masanil eb tu' max yak' eb owal yin eb jet conob Israel.

¹⁰ Yuj tu' max aj yaw eb bay Jehová, max yalon eb: Caw wal max oc co mul ayach, yujtol max ach co bekcanok, axa Baal c'al Astarté max jak' serbil. A tinani xin, col on yul k'ab eb jajc'ul on, asanxanej ach, ok ach jak' serbil, ẍi eb.

¹¹ Yuj tu' xan max yatek Jehová cham Jerobaal, yetok Barac, c'al Jefté, c'al ayin ti', yet chex col-lay yul k'ab eb e yajc'ul; yuj tu xan max je' e yayji yin junc'ulal.

¹² A yet max e yiloni, tol chi tit Nahas reyal eb amonita yin owal jin, max e k'anon junok rey ayin, yet chi oc yajawilal co xol, ti' pax a Jehová co Diosal co reyal yayji.

¹³ Palta tinani' xin, tix e rey max e k'an tu', mayal yaoc Jehová jun rey co xol.

¹⁴ A tinani' xin, chi cancan yul e k'ab e yion can Jehová c'al e yoc yin ayilal bay, c'al e yiken tzet chi yala', c'am che tena'. Ta ok e yikej ayex ti', c'al e reyal ti' axca yochwan Jehová co Diosal, ta axca tu' ok e yunej, watx'c'al ok yun e beytok.

¹⁵ Ta man ok e yikej bay tzet chi yal Jehová xin, ok yaoc Cham yailal e yiban yetok e reyal ti', axca max utlay eb jichmam.

¹⁶ Yuj tu xin, ok cam e yiloni, yujtol ok tx'ox Jehová junok tzet yetal tol c'ayubtak yoc e satak.

¹⁷ A tinani' tiempoal jolay ixim trigo ti', man tiempoalok nab. Palta ok e yila' tol ok in k'an bay Jehová, ayman ok yak' junok miman nab c'al mak'waj c'u. Catatu' ok nachaj el e yuj tol yob tzet max e yun satak Cham, yuj max e k'an jun e rey ti', ẍi cham Samuel.

¹⁸ Max lajwi tu', max k'anon cham Samuel bay Jehová. A wal yet jun bek tu' max mak'waj c'u cax max jay nab; yuj wal tu' xan masanil anima max xiw bay Jehová, c'al bay cham Samuel.

¹⁹ Xan masanil eb max alon bay cham Samuel axca ti': —K'an bay Jehová co Diosal juj on, tol c'am chon cami; wal yel max ajc'al can jaon oc co mul yuj max co k'an co reyal, ẍi eb.

²⁰ Max tak'wi cham Samuel: —Caxc'al yob tzet max e yun tu', c'am chex xiwi; palta axa yet ok beytok ti', c'amxa che yiel e ba yin Jehová, asanxanej bay chex oc yin ayilal yin masanil e c'ul.

²¹ C'amxa che yaoc e c'ul yin comon dios tol c'am tzet che yi' yin, yujtol c'am chi je' colwaji.

²² A Jehová ok yun tzet max yala', man ok ex bekcanok, yujtol chi yochej c'ul tol is conob ex.

²³ A pax ayin ti', c'amokab chin chalay ayc'ay yuj Jehová yin yoc in mul yin in bekon in txajli e yuj. A ti' wet, chex in cuyc'al yin tojolal.

²⁴ Ayex ti' asan tol che yikej c'al e yoc yin ayilal bay Cham yetok masanil e c'ul, cax che yojtaknen elok, tol xiwil tzet yetal watx' max yun Cham e yin.

²⁵ Palta ta ok ex occ'al ijan e yunen yobtakil xin, ok ex c'aylay el yetok e reyal ti' yuj Jehová, ẍi bay eb.