Babel Libroal Yabixal Eb Rey 8 - A Txꞌan Biblia Yin Kꞌanjobal 1989

Ibiltok caẍail trato bay yul templo

¹ Max lajwi tu xin, cax max wajban oc Salomón masanil eb anima bay Jerusalén, masanil eb yicham winakil conob Israel, eb yajawil yin junjun tribu, c'al eb yajawil yin junjun makanil, yet chi toj ilaytek te caẍail is trato Jehová bay conob David chi yik Sión, cax chi ocantok yul templo.

² Yul wal k'in chi chalay yet suk xajaw, a ton xajaw Etanim; a yet tu' max waj ba eb winak yet Israel yetok Salomón.

³ Axa yet max wajnaj oc eb xin, cax max yiontok eb sacerdote te caẍail trato yet Jehová,

⁴ c'al an mantiado bay chi co chalej co ba yetok Cham, c'al masanil mitx'k'abej ayoctok yul. A eb sacerdote c'al eb levita max iontok.

⁵ Axa Salomón yetok masanil eb israel max wajnaj oc tu' max babji eb satak te caẍa tu', tom jantak no calnel c'al no wacax max yak' eb yin xajanbalil, c'amxa chi bischaji.

⁶ Lajwi tu xin, max yiontok eb sacerdote te caẍa tu' bay yul templo masantac'al bay yul lugar tol asan Dios ay yet, bay nan xol juntzan querubín.

⁷ Jenantok is xic' juntzan tu' yiban bay max alay octok te caẍa tu'. A is xic' juntzan querubín tu', a ayoc yenelok yiban.

⁸ Axa te regla ayoc is batxbanilok caw wal miman tel te'. Chi txecloj txam te' bay yul babel cuarto bay yetc'ulal is puertail lugar asan Dios ay yet, caxc'al man txequelok bay yina. A tu' aycan te' bay tu' masantac'al tinani'.

⁹ C'am junokxa tzet yetal ayaytok yul te caẍa tu', palta asan ch'en cab jenan ch'en max yacan aytok cham Moisés yul te' bay Horeb, ch'en aycan oc yechelok is trato Jehová max yak' yetok eb israel yet max eltek eb bay Egipto.

¹⁰ A yet max eltek eb sacerdote bay yul templo, max nojil yul tu' yuj asun.

¹¹ A yuj jun asun tu' majxa je' mulnaj eb bay yul tu', yujtol a is mayk'ak'al Jehová max ak'on nojilok.

Yalnak Salomón tol yet Jehová jun na tu'

¹² Max lajwi tu' max yalon Salomón: Mamin Jehová, max ala' tol xol k'ekk'inal ayach,

¹³ palta max in watx'nej aj jun atut ti' bay chach ayji. A bay jun lugar ti' chach ayji ec' yin tojbalk'inal, ẍi cham Salomón.

¹⁴ Max lajwi tu' max meltzojtok t'anan bay masanil conob Israel lecan oc bay tu', max k'anon watx'c'ulal Dios yiban.

¹⁵ Lajwi tu' max yaloni: Al-layokab watx' k'anej yin Jehová co Diosal ayon israel on ti', yujtol mayal yi ba tzet max yal Cham bay David in mam.

¹⁶ A' max alon axca ti': Yettaxc'al max wion eltek in conob bay Egipto, c'amtoc'al bay chin siq'uil junok conob xol eb israel bay chi watx'ji aj junok watut bay chin ayji. Asan David max in siq'uilok yet chi oc reyal xol in conob Israel, ẍi Jehová.

¹⁷ A in mam tu' max yochej max watx'nej aj junok templo yuj is mimanbilal Jehová co Diosal.

¹⁸ Max yalon Cham bay axca ti': A jun cha na tu' caw wal watx', tol cha watx'nej aj junok watut aloni,

¹⁹ palta manak ach ok a watx'nej ajok, ato junok a c'ajol ok watx'nen ajok, ẍi Cham.

²⁰ Yuj wal tu xin, a tinani' chi yi ba tzet max yal Jehová tu'. Axca wal max yun yaloni, cayton tu' max yun yelocok. Ayin max in occan q'uexelok in mam tu', max in oc yajawilok co conob ti', xan max in watx'nej aj jun templo bay chi oc ayilal bay Jehová co Diosal.

²¹ A bay yul tu' max in watx'nejcan jun lugar bay chi ayji te caẍail trato max yak' Jehová yetok eb jichmam yet max lajwi yel eb bay Egipto, ẍi Salomón.

²² Lajwi tu' max oc lecan Salomón satak altar c'al satak masanil conob Israel, max yion aj is k'ab can,

²³ max yaloni: Mamin Jehová co Diosal, ¿macto wal junokxa Dios axca ach ti' bay satcan c'al bay sat tx'otx' ti', tol chic'al yun a trato cax cha tx'oxon a watx'c'ulal bay mac chi iken bay tzet chala' yin masanil is c'ul?

²⁴ Mayal yun oj tzet max al bay a chekbej David. Manc'al k'anejokc'al, palta a yet jun c'ual ti' max yuncan el tzet max al tu'.

²⁵ Yuj wal tu xin, Mamin Jehová co Diosal, yunokab tzet max al bay a chekbej David, in mam, tol ayc'al is yinatil ok occ'al bay yul is trono, asan tatol yikem chi yut ba eb ayach, axca wal yikemal max yut ba in mam tu'.

²⁶ A tinani xin, ach Jehová co Diosal, yiokab ba tzet yetal altebil oj bay David, a chekbej tu'.

²⁷ Palta, ¿yel mi wal Mamin, ok ach cajay ec' bay sat tx'otx' ti'? Ilab tol c'am chi yab satcan bay chach ayji, tol c'amxa yalbanil ayji ocok, akxam wal ch'an jun na max in watx'nej ayach ti'.

²⁸ Caxc'al mi axca tu' yayji ocok, ab tzet chin k'an ayach, ach in Diosal, ab in cusc'ulal cax chaben c'apax in txaj lanan walon ayach ti'.

²⁹ Elokab yin a c'ul, manchak ecan el a sat c'ualil c'al ak'balil yin jun templo ti', jun max ala' tol a yul ok oc ayilal ayach. Ab wal in txaj ayin a chekbej in ti'.

³⁰ Ab wal tzet chin k'an ayach, c'al tzet chi k'an a conob Israel yet chon txajli ayach bay jun templo ti', atac'al bay satcan bay ayach, chabaytek, cax chak'on tanil co yobtakil on.

³¹ Ta ay junok anima chi oc is mul bay junokxa yet animail cax chi al-lay bay tol chi ul yak' is ti' bay yul jun templo ti' bay satak altar ti',

³² a bay satcan tu' chabaytek cax cha beyc'ulnen elok. Atac'ala' tzetbil yayji ocok, axca tu' chot a beyc'ulnen el yiban mac ay is mul, cax chak'on cuenta, axa pax mac c'am is mul xin, chak'on a watx'c'ulal yiban.

³³ A yet chi oc co mul ayon a conob on ti' ayach, cax chon ayc'ay yuj eb ajc'ul, ta chi co na co ba xin, chi jion ay co ba ayach, cax chi ul co k'anon ayach yin txajil bay yul jun templo ti',

³⁴ atac'al bay satcan tu' ok ab co tewilal, cax ok ak'on tanil co yobtakil, axa on ak'on meltzoj bay yul co lugar ak'bil oj bay eb jichmam.

³⁵ A yet c'amxa nab chi ay oj yuj chi jaoc co mul a satak, ta ayman chon txajli ayach bay yul jun templo ti', cax chach jion aj can, ta chi cus co c'ul yuj co mul chi jaoc tu',

³⁶ ok abaytek bay satcan tzet chi jal ayon a chekbej on ti', tol a conob on, axa ak'on tanil co mul tu', cax cha tx'oxon junok be watx' chi ji'. Chi lajwi tu xin, cax chaon ay nab yiban tx'otx' tx'otx' max ak' bay a conob ti'.

³⁷ A yet chi ayc'ay wajil bay yul co nación ti', ma junok ilya', ma chi takil tzetak yetal yuj waresma, ma chi jay no chapulín, ma junokxa makan no' yin jawoj on, ma chi low tz'ab yin jawoj, ma chi jayoc oyan eb ajc'ul jin on, ma junokxa uchlejbail chi tit jiban on;

³⁸ a wal yet tu', ab wal co tewilal on a conob on ti', ma is txaj tzanc'al mac on txel ok nachajtek juj tol lanan jaben yail yuj co mul xan ok co mojbajtek co k'ab bay yetc'ulal jun a templo ti'.

³⁹ Ab wal aytek co txaj tu' bay satcan xin, yujtol a tu' ayach, ok ak' tan co mul, cax chon a coloni, c'al on a beyc'ulneni atac'ala' tzetbil jayji oc junjun on, axa ak'on ayon tu', yujtol ojtak yili co nabal junjun on.

⁴⁰ Axca tu' ok on xiw co masanil yoc co mul yak'ban iquis on bay sat tx'otx' max ak' bay eb jichmam on ti'.

^41-42 A yet ay junok nak tx'ok conobal tol najat ay is conob, cax ok yaben a mimanbilal, c'al mimek watx'c'ulal chak' ayon a conob on ti', cax chi jayoc yin ayilal ayach bay yul jun templo ti',

⁴³ ab tzet chi yal nak bay ayach ec' bay satcan tu', cax ok ak'on tzet chi k'ana', yet watx' ok ach yojtaknej el masanil nacionlak ay bay sat tx'otx' ti', cax ok yikenc'al eb ayach axca chi jun ayon a conob Israel on ti', cax chi nachaj el yuj eb tol is moj chi oc ayilal ayach bay yul jun templo max in watx'nej aj ayach ti'.

⁴⁴ A yet ok on eltok ayon a conob on ti' jak'on owal yin eb jajc'ul, yalc'al bay ok on a chektok, ta chon txajli bay yetc'ulal jun a conob sic'bil el oj ti', c'al bay yetc'ulal jun templo max in watx'nejcan aj ayach ti',

⁴⁵ a bay satcan ok abaytek co txaj tu', cax ok ak'on yun tzet chi co k'an tu'.

⁴⁶ Ta chi oc co mul ayon a conob on ti' ayach, wal yel c'am junok tol c'am chi oc is mul, yuj tu' xan a yet ok oc co mul ayon a conob on ti' ayach cax ok tit owal jin, axa on aon oc yul k'ab eb jajc'ul tu', cax ok on ilaytok preso bay junokxa conob cawil ma najat,

⁴⁷ ta a yet ay onxa ec' bay junokxa conob tu' cax chi co naon co ba, chi co k'anon mimanc'ulal ayach yujtol chi nachaj el juj tol max oc co mul yul a sat,

⁴⁸ ta yetok wal masanil co c'ul c'al co nabal, chi naon ba co c'ul yet ay on ec' bay junok nación bay chon ilaytok preso tu', cax chon txajlitek bay yetc'ulaltek tx'otx' tx'otx' max ak' bay eb jichmam on, a ton jun conob sic'bil el oj bay max in watx'nej aj jun templo ti' ayach,

⁴⁹ ab wal co txaj c'al co tewilal bay satcan bay ayach ec' tu', cha watx'nen el co yailal.

⁵⁰ Chak' mimanc'ulal yin co mul chi jaoc yul a sat yet chon meltzoj oc en ayon a conob on ti'. Cax cha q'uexon is nabal eb max on iontok preso tu', cax chi cus c'ul eb jin yet watx' chon bekil eb.

⁵¹ Yujtol a conob jayji, caw wal tol et on. Ach max on eiltek bay Egipto bay ayon oc yin yailal.

⁵² Yuj tu xin Mamin, ab wal in txaj ayin a chekbej in ti', c'al is txaj eb wet conob Israel ti' tol a conob jayji. Ab wal Mamin Jehová yet chon awji ayach.

⁵³ Yujtol ach max on a pojcan el xol juntzanxa conoblak bay sat tx'otx' ti' yet chon occan etok axca wal max yun alon yuj a chekbej Moisés, yet max eon eltek eb jichmam on bay yul yet Egipto, ẍi Salomón yin is txaj.

⁵⁴ Jajan ay cham Salomón bay satak altar cax ayaj is k'ab bay satcan yak'ban chi txajli.

⁵⁵ Max lajwi tu xin, axa yaj wan tu', cax max yalon watx' k'anej yiban conob Israel, max yalon yin ipejal:

⁵⁶ Al-layokab watx' k'anej yin Jehová max ak'on junc'ulal ayon, axca max yun yaloncanok. Masanil tzet yetal watx' max yal bay Moisés is chekbej, max yunej.

⁵⁷ Ayokabc'al ec' Jehová co Diosal co xol axca max yun yayji ec' yetok eb jichmam, cax manc'al ok on beklaycan co tx'oklil yuj.

⁵⁸ Yak'okabc'al Jehová co nabal yet ok junen tzet chi yochej c'ul, cax ok jikenc'al is ley c'al is chekbanil, juntzan max chek yikej eb jichmam.

⁵⁹ A masanil juntzan max in k'an bay Jehová co Dios, naanokabc'al yuj Cham c'ualil c'al ak'balil, yuj quin is colon ayin is chekbej in ti', yetokc'al ayon is conob on ti' yin tzetbil yayji oc co cawxinakil junjun c'u,

⁶⁰ yet watx' chi yojtaknej el masanil nación ay sat tx'otx' ti' tol c'am junokxa Dios, palta asannej Jehová.

⁶¹ Yuj tu xin, a ayex ti' asan Jehová che yaoc yin e c'ul cax che yiken is ley c'al is chekbanil, axca che yun tinani', ẍi Salomón bay eb conob.

⁶² Max lajwi tu' cax max yak'on Salomón yetok masanil conob Israel xajanbal bay Jehová.

⁶³ 22,000 no wacax yetok 120,000 no calnel max yak' yin xajanbalil bay Jehová yuj tx'oxon junc'ulalil yetok. Axca tu' max yun yoccan templo tu' yin yopiso yuj Salomón c'al yuj masanil conob.

⁶⁴ A ton yet jun c'ual tu' max pojon el cham rey jun oyan nan yul yamak'il templo yet chi oc altaril. A bay tu' max yak' xajanbal chi ak'lay tz'a'ok c'al ofrenda yin satlak awoj, c'al is seboal no xajanbal yet junc'ulalil yetok Jehová, yujtol a jun altar naba bronce ayoctok bay yul templo, c'am chi yabej, yujtol xiwil no xajanbal.

⁶⁵ A yet jun tiempoal tu' ukeb c'u max cha' Salomón k'in yetok masanil conob Israel satak Jehová. Caw wal xiwil anima max wajnaj ocok, max titc'al eb bay mojonal yet Hamat, masantac'al chi apni oc bay a' aej ayoc mojonal yetok Egipto. A yet max lajwi ukeb c'ual k'in tu', cax max naon eb chaon el yich ukebxa c'ual k'in, yuj tu' xan 14 c'u max yak' k'in tu'.

⁶⁶ Axa yet max lajwi k'in tu xin, cax max tak'lican Salomón bay eb anima, axa eb anima tu' max yal eb watx' k'anej yin Salomón, cax max paxtok eb bay yatut yin tzalojc'ulal yuj masanil tzet yetal watx' max yun Jehová yetok yinatil David is chekbej, c'al is conob Israel.