Babel Libroal Yabixal Eb Rey 21 - A Txꞌan Biblia Yin Kꞌanjobal 1989

Yinak ec' Acab is yawoj Nabot

¹ A yet junel ay jun winak chi yik Nabot aj Jezreel. Ay jab is tx'otx' bay ay an uva bay cawilal yatut cham rey Acab is reyal Samaria.

² Ay jun c'ual max yal Acab bay Nabot: —Ak' jab a tx'otx' tu' ayin cax ok wawon janic'ok witaj bay, yujtol caw wal c'atanxac'al watut ayocok. Axa junokxa tx'otx' caw wal watx' chi wak' is q'uexelok, ma xin chin man ayach, ẍi bay.

³ Max tak'wi Nabot bay cham rey Acab: —Maj cha c'ul Dios ta chin txonil in satak max yak'can in mam ayin, ẍi bay.

⁴ Caw wal ayoc Acab yin somc'ulal, cax max paxtok bay yatut. Tx'okxa chi jay c'ul yuj somc'ulal yuj tzet max yal Nabot bay. Maxc'al apni oc bay yatut, max toj aj telanok. Max paxcan oc acan bay yich tx'at, c'am chi cha' low ba.

⁵ Max jitzontok ba xal Jezabel is yistzil bay is c'atan, max yalon xal: —¿Tzet yuj xan ayach oc yin somc'ulal, cax c'am cha cha' low a ba? ẍi xal.

⁶ Max tak'wi Acab tu': —Max in k'anjab yetok Nabot aj Jezreel ta chi txon jab is tx'otx' bay ti' wet bay tu', ma xin chi wak' junokxa tx'otx' is q'uexelok, palta maj yal c'ul max yak' ayin, ẍi.

⁷ Max tak'wi xal Jezabel: —¿Tzet yuj xan chi tac a c'ul yuj jun tu'? ¿Tom man reyalok Israel ayji xin? C'am tzet cha na' yuj jun tu'. Ajan wanok cax chach lowi. Ayin ok wiec' jun tx'otx' tu' bay Nabot cax ok wak'on ayach, ẍi xal.

⁸ Max lajwi tu' max watx'nen xal jun tx'an carta yin is bi Acab, cax max yaon oc xal is sello yet rey tu' yin tx'an. Max yaontok xal bay eb yicham winakil conob bay cajan Nabot tu'.

⁹ Max yalontok xal bay eb yul tx'an carta tu': Alek tol chi oc c'ajbanc'ulal yuj eb anima cax che chotban ay Nabot satak eb anima tu'.

¹⁰ Cax che chotban ay is satak cawanok winak yob is nabal chi oc yin lek'ti testigoal. Chi yalon eb tol yob max yal Nabot tu' yin Dios c'al yin cham rey. Chi lajwi tu xin, cax che yion eltok Nabot tu' bay tiel conob cax che k'okon camok, ẍitok xal.

¹¹ Masanil eb yet conob Nabot c'al eb yicham winakil conob, max yikej eb axca max yaltok xal Jezabel yin tx'an carta.

¹² Max yalon el eb xol anima masanil tol chi oc eb yin c'ajbanc'ulal, max yak'on eb jun is lugar Nabot tol miman yelapnok bay max ay chotan satak anima.

¹³ A wal yet jun bek tu' max apni oc cawan eb lek'ti' testigo max yalon aj eb satak masanil anima tu', tzetbil tol yob tzet max yal Nabot yin Dios c'al yin cham rey. Max lajwi tu' max yiontok eb tiel conob max k'okon cam eb.

¹⁴ Ayman max yatok eb k'anej bay xal Jezabel tol mayal cam Nabot.

¹⁵ Maxc'al yab xal Jezabel, max yalon bay Acab: —A tinani' ocokab can tx'otx' tx'otx' Nabot aj Jezreel etok, a ton tx'otx' maj yal c'ul max txon ayach, axa tinani' xin, mayal cami, ẍi xal.

¹⁶ A yet max yaben Acab tol mayal cam Nabot, max bet watx'nenxac'al oc ba sat tx'otx' tx'otx' tu'.

¹⁷ Max lajwi tu xin, max yalon Jehová bay cham Elías aj Tisbe:

¹⁸ Asi' a cha' cham Acab reyal Samaria. A tinani' a tu' ay bay Jezreel bay is tx'otx' Nabot, jun tx'otx' mayal yiec' bay.

¹⁹ Cax chalon bay: Max chek Jehová wal ayach yujtol max a mak' cam Nabot, cax cheon ec' tzet yetal ay bay. Yuj tu xin, a bay max lek'lay aj chiq'uil nak yuj no tx'i', a tu' ok lek'lay c'apax aj et yuj no', ẍi Jehová, cachi bay.

²⁰ A yet max yilon oc Acab cham Elías max yalon bay: —Max quin ilchaj pax oj, ach wajc'ul, ẍi bay. Max tak'wi cham Elías: —Ja' toni, mayal ach chaloj wuj yujtol max axac'al oc a ba yin onen tzet yetal yob satak Jehová.

²¹ Yuj tu' xan max yal Jehová: Ok witek uchlejbail eban, cax ok c'aycan el masanil eb winak yin enatil, winak wal tol caw wal mimanbil, c'al eb chekbej yayji xol co conob Israel ti'.

²² Axca wal max wut in c'ayon el is yinatil Jeroboam is c'ajol Nabat c'al is yinatil Baasa is c'ajol Ahías, axca wal tu' ok wut enatil, yujtol max a tx'emtek yowal in c'ul, yujtol chekbaj conob Israel yin yaon oc is mul, ẍi Jehová.

²³ Ac'ala' axca tu' max yun yalon Jehová yin xal Jezabel chi yalon axca ti': Tol ok chilaytok is chibejal xal bay yul conob Jezreel yuj no tx'i', ẍi Jehová.

²⁴ A jantak enatil ok cam bay yul junok conob, ok chilaytok is mimanil eb yuj no tx'i'. Axa mac ok cam bay yinlak conob xin, a no ostoc ok chiontok, ẍi cham Elías.

²⁵ (C'am junokxa max yaxac'al oc ba yunen yobtakil satak Jehová axca max yun cham rey Acab, yujtol a xal Jezabel is yistzil, a' max ak'onc'al yunej.

²⁶ Caw wal yajbejtak max yut ba yuj max oc yin ayilal bay comon dios axca max yut ba eb amorreo, juntzan eb max ilay el satak conob Israel yuj Jehová.)

²⁷ A yet max yaben Acab tzet max yal cham Elías, max tzilontok tel nuk' is pichil. Max yaon oc jun makan pichilej tol caw wal el axca coẍtal. Max oc yin c'ajbanc'ulal, cax max way yetok is pichil tu'. Caw wal cusc'ulal yayji chi eq'ui.

²⁸ Yuj tu' xan max yal Jehová bay cham Elías:

²⁹ ¿Xam wal el yoc Acab yin ayilal in satak? Yuj wal tol max oc yin ayilal in satak, xan man ok witek jun uchlejbail tu' yiban yinatil yet iquisto ec' ti'. Ato yet a junok is c'ajol ayoc yin reyal, catatu' ok waontek yiban yinatil tu', ẍi Jehová bay cham Elías.