Babel Libroal Yabixal Eb Rey 18 - A Txꞌan Biblia Yin Kꞌanjobal 1989

Cham Elías yetok rey Acab

¹ Max ec'tok oxeb abil xin, max k'anjab pax Jehová bay cham Elías: Asi' tx'ox a ba bay Acab yujtol ok wak' jay nab junelxa, ẍi Jehová.

² Axa toj tu' yuj k'anjab yetok Acab. A yet tu', caw wal ow wajil bay Samaria,

³ cax max yawten Acab cham Abdías ayoc is mayordomook. A cham tu' chi oc yin ayilal bay Jehová yin masanil is c'ul.

⁴ A yet c'amto chi uj jun ti', yet lananxa mak'on cam xal Jezabel is yistzil Acab, eb chekbej Jehová, 100 eb cham max col-lay yuj Abdías tu'. Max pojon ay cham nan eb, yin cincuentatak max yutej. Max toj cham c'uban el eb bay yul cab ch'en nach'en, cax max bet yak'on tzet max lo eb c'al tzet max yuc' eb yet jun tiempoal tu'.

⁵ Max yalon Acab bay cham Abdías: —Titan, cax chon toj co beytzen bay yul nación ti', ta ayto bay ay aej, c'al jiloni ta ayto bay chi chaloj yan no chej juj, yet watx' c'am chon can yin tol c'am co chej, ẍi bay.

⁶ Yuj tu' xan max poj ba eb; tx'ok bay max toj Acab, tx'ok bay max toj c'apax Abdías.

⁷ A yet ayoc Abdías yul be xin, cax max elol cham Elías bay yul be. Ayman max nachaj el cham Elías yuj Abdías, max ay nojan bay, max yaloni: —¿Mamin, ma ach ti' Elías ach? ẍi Abdías.

⁸ —Ja' ayin toni. Asi', al bay Acab tol ayin ec' cayti', ẍi cham Elías.

⁹ Max tak'wi Abdías: —¿Tzet in mul xan chin aoc yul k'ab Acab, yet chin mak'lay cam yuj?

¹⁰ Yin bi Jehová co Diosal tol iquis, chi wal ayach tol c'amxa junok nación bay maj ec' a sayomal yuj in yajawil tu'. A yet max yalon eb rey tu' tol c'am ach ec' bay yul is nación eb, max yalon wajawil tu' tol chi yak' eb is ti' ta yel c'am ach bay tu'.

¹¹ Axa tinani' chin a chekon walon bay in yajawil tu' tol ayach ec' cayti'.

¹² Axa ok yunej, asannej chin el a c'atan tinani', cax ok mi jaycan Yespíritu Dios ach ul yiontok, txequel baytal ta ok ach apnok, axa yet ok in apnok walon bay Acab tu', cax ok tit ach ul yiloni; ta c'am achxa pax ec'ok, axa in mak'lay cam yuj tu'. Ayin a chekbej in ti', yintax wach'ejal max in occ'al yin ayilal bay Jehová.

¹³ ¿Tom c'amto mac chi alon ayach tzet max yun in colon eb is chekbej Jehová bay xal Jezabel yet lanan mak'lay cam eb yuj xal? Max in c'ubaj el 100 eb bay yul cab ch'en nach'en, cincuentatak max wut eb, max wak'on tzet max lo eb c'al tzet max yuc' eb.

¹⁴ Cax chalon paxok ta chi wal bay wajawil tol ayach ec' cayti', asan mi tol chin mak'lay cam yuj, ẍi Abdías.

¹⁵ Max yalon cham Elías: —Satak Jehová Cham iquis Yajaw yin masanil, Cham ayin oc is chekbejok, chi wal ayach tol c'am chi ec'tok in k'anjab yetok Acab tu' tinani', ẍi cham.

¹⁶ Lajwi tu' axa toj Abdías yalon bay Acab. A yet max yaben xin, cax max toj il-lay cham Elías yuj.

¹⁷ Axa yet max il-laytok cham yuj xin, max yaloni: —A… ¿tom ach lanan etnen conob Israel ti'? ẍi Acab.

¹⁸ —Mayinnak lanan wetnen jun conob ti', palta ach yetok masanil eb ecan, yujtol max e bekcan e yiken is chekbanil Jehová yuj e yoc yin ayilal bay comon dios Baal.

¹⁹ Yuj tu xan a tinani', atok yiomal masanil eb jet conob Israel, cax chi toj eb bay jolom witz Carmelo, yetok eb 450 chekbej Baal yetokc'al eb 400 is chekbej xal dios Asera, eb chi ak'lay is gasto yuj xal Jezabel. A tu' ok in chalej in ba yetok eb, ẍi cham Elías.

Teyelejbail cham Elías yetok eb is chekbej Baal

²⁰ Max chekon Acab wajay oc masanil conob Israel, yetok masanil eb is chekbej comon dios bay jolom witz Carmelo.

²¹ Max lajwi tu xin, max jitzontok ba cham Elías bay is c'atan eb anima tu', max yalon cham axca ti': —¿Bak'in wal ok e bekc'al yayi, c'al yaj e nabal? Tatol a Jehová, Dios toni, asannejokab bay chex oc yin ayilal, palta tatol a Baal tu' Dios xin, asannejokab c'apax bay chex oc yin ayilal, ẍi cham. C'am wal jabok max tak'wi eb anima tu'.

²² Max yalon pax cham Elías: —A xol masanil eb is chekbej Jehová, asanxanej in iquis in, axa pax eb yet Baal xin, ay 450 eb.

²³ Yuj tu xin, iektek cac'onok no ach'ej toro, cax chi sic'len eb chekbej Baal junok yet, cax chi coc' tzoc'nentok eb no', chi yaon ajtok eb yiban te si', palta c'amc'al k'ak' chi oc yalan. Ayinxa chin watx'nej junxa no' wet tu', cax ok waon ajtok no' yiban te si', ac'ala' c'am k'ak' ok waoc yalan.

²⁴ Chi lajwi tu' cax che yawten e dios tu', ac'ala' c'apax ayin ti' ok wawtej Jehová in Diosal. A mac ok aontek k'ak' yiban xajanbal ti', aokab jun tu' ok oc co Diosalok, ẍi cham Elías. —Yunokab axca tu', ẍi eb conob.

²⁵ Max lajwi tu' max yalon cham Elías bay eb is chekbej Baal axca ti': —Sic'lejek junok no' e yet cax che watx'nen ajtok yiban te si', ayex babel che watx'nej can e yet yujtol xiwil ex. Chi lajwi tu' che yawten e diosal tu' yin, palta c'am che yaoc k'ak' yalan, ẍi cham.

²⁶ Max mak'on cam eb no' yet tu', cax max yaon ajtok eb no' yiban te si'. Yettax max k'inibi masantac'al yet max oc chuman ac'ala' yawji eb bay Baal tu', cax chi yalon eb: Tak'wan ayon Baal, ẍi eb. Chi aj t'uklajbok eb, cax chi ec' oyoyok eb yinlak is xajanbal max watx'nej tu', c'amc'al mac max tak'wi bay eb.

²⁷ A yet max oc chuman c'u xin, chi tzewi cham Elías yin eb: —E yip chi el e yaw, tutun tol dios xin, ay mi tzet chi na, ma xin, aytok txuljok, ma xin, ay bay aytok chek ba, ma xin, tol chi wayi, xan awjanek, axtawal ok el is wayan, ẍi cham.

²⁸ Max occ'al ijan eb yelc'al yaw, max c'oli c'upontok ba eb yetok cuchillo c'al yetok ch'en tekbal el chic', axcata is beybal eb, bacan chic'xac'al max yuttok ba eb,

²⁹ palta c'amc'al tzet. Yet max ec'tok chuman, ac'ala' yel yaw eb, chi ajc'al t'uklajbok eb, masantac'al max oc yorail axcata chi yun yak'lay xajanbal bay Jehová, c'amc'al jabok max tak'wi bay eb.

³⁰ Max lajwi tu' max yalon cham Elías bay eb anima: Titanek in c'atan, ẍi. Masanil anima xin, max jitz oc ba eb is c'atan cham, cax max oc ijan ca watx'nen aj altar yet Jehová ec'nak uchnajok.

³¹ Max wajban oc cham 12 ch'en ch'en axca is bisil eb is tribual Jacob, cham max yal Jehová bay tol Israel chi yikcanok.

³² Max watx'nen jun altar bay Jehová, max watx'nen c'apax jun sanjail aej yinlak altar tu'. A yul sanja tu' chi mi aytok canebok galón aej yul.

³³ Max lajwi tu' cax max watx'nen ay cham te si', max oc ijan cham tzoc'oncoj no wacax tu', axa yaon ajtok yiban te si' tu'.

³⁴ Max yalon cham: —Ak'ek noj canebok moc aej cax che secon ay yiban xajanbal tu' c'al yiban te si', ẍi cham. Max lajwi tu' max yalon pax cham tol chi yitek eb a' cayelokxa, max sectok eb a' yiban xajanbal tu'.

³⁵ Caw wal chi el nuk' a' yinlak xajanbal tu', max nojcan sanja tu' yuj a'.

³⁶ Axa yet max apni yorail axcatac'a chi yun yak'lay xajanbal, max jitzon oc ba cham Elías satak altar tu', max yalon cham: Mamin Jehová in Diosal yetok cham Abraham, Isaac, c'al Israel, tinani' ojtaknelayokab elok tol co Diosal ayon israel on ti' ayji, cax a chekbej wayji, cax tol ach max a chek wun juntzan ti'.

³⁷ Tak'wan ayin Mamin Jehová, yet watx' chi yojtaknej el juntzan anima ti' tol asannej ach Dios ach, cax chi yochej a c'ul tol chi meltzoj is nabal juntzan anima ti' en junelxa, ẍi cham Elías.

³⁸ Yet wal jun bek tu' max ayol jopnaj k'ak'ej yuj Jehová bay satcan, cax max tz'atok te si' c'al xajanbal tu', ch'en ch'en c'al pokok, max tanaj a' aej ay bay sanja tu'.

³⁹ A yet max yilon eb anima axca tu' max ay nojnaj masanil eb sat tx'otx', max yalon eb: Asan Jehová ti' Dios, ẍixac'al eb.

⁴⁰ Max lajwi tu xin, max yalon cham Elías bay eb: —Mitx'ek eb is chekbej Baal tu', c'am junok chi eli, ẍi cham. Max mitx'lay ay eb yuj eb anima tu', max ilaytok eb bay ti a' aej chi yik Cisón. A bay tu' max mak'lay cam eb.

Is txaj cham Elías yet chi yak' pax nab

⁴¹ Max lajwi tu xin, max yalon cham Elías bay Acab: —Asi' lowok, toxa chi jay jun miman yaxnab chi wabej, ẍi cham.

⁴² Max yiken Acab, max toj lowok. Axa cham Elías max ajtok bay jolom witz bay Carmelo, max ay jajanok, cax max ay nojan txajlok masantac'al max ayc'ay is sat bay nan xol is jolom penec.

⁴³ Max yalon cham bay is chekbej: —Ajantok jolom witz, cax chach toj t'anan yiban a' mar, ẍi cham. Axa yajtok tu', max toj t'anan yiban a' mar. Lajwi tu' axa meltzojtek bay cham Elías, max yaloni: —C'am wal jabok tzet max wila', ẍi bay. —Asi' junelxa, ẍi cham. Axa toj tu'.

⁴⁴ A yet max lajwi ukel cheklaytok, max yaloni: —Ay wal ch'an jab asun bay yiban a' mar, c'uxan chi makay el yuj co k'ab chi jila', ẍi jun chekbej tu'. Max lajwi tu' max yalon cham Elías bay is chekbej tu' axca ti': —Asi' al bay Acab tu' tol chi yaoc no chej yin is carruaje cax chi meltzojtok, axa talaj chi yunej, majxa je' yapni oc bay na yuj nab, ẍi cham.

⁴⁵ Max ajtok Acab yul is carruaje max toj bay Jezreel. Lanantoc'al tu' max k'ekk'olil satcan yuj asun, max tit jun owal cak'ek' axa jay jun miman yaxnab tu'.

⁴⁶ Axa pax cham Elías xin, max ak'lay is tec'anil yuj Jehová. Ayman max jitz aj is jokan pichil, max c'alon is nan, cax max toj lemnajok. Max babjitok satak Acab masantac'al max apni oc eb bay Jezreel.