Babel Libroal Yabixal Eb Rey 17 - A Txꞌan Biblia Yin Kꞌanjobal 1989

Yalnak cham Elías tol majxa yak' nab

¹ Ay jun is chekbej Dios chi yik Elías, aj Tisbe yul yet Galaad. A' max alon bay rey Acab: Yin bi Jehová Diosal Israel tol iquis, bay ayin oc is chekbejok, chi wal ayach tol a yet jayeb abil ti' majxa yak' nab, tamwal jabokxa yal ak'bal ok ayok, masantac'al ayin ok wal junelxa, ẍi cham.*fn*

² Lajwi tu' max yalon Jehová bay cham:

³ Elan cayti' cax chach toj a c'ubaj el a ba bay ti a' aej Querit, bay yichcanil a' Jordán.

⁴ A jun a' tu' ok oq'uej, ayinxa ok wal bay no joj tol ok tok yak' no' a lobej, ẍi Jehová.

⁵ Max yikej cham Elías tzet max yal Jehová, max toj c'ubaj el ba bay ti a' Querit bay satak eltok a' Jordán.

⁶ Junjun k'inibalil c'al junjun yayc'ualil chi yitok no joj tu' is lobej c'al is chibej cham, axa jun yaliẍ aej tu' chi yuc' cham.

⁷ Palta max ajapnok tiempoal yet max tanaj a' aej tu' yujtol c'amxa chi yak' nab bay jun nación tu'.

Cham Elías yetok xal ix camnakxa yichamil aj Sarepta

⁸ Max lajwi tu' max yalon Jehová bay cham Elías:

⁹ Elan cayti' cax chach tojcan bay conob Sarepta bay yul yet Sidón, chach cancan bay tu' junok tiempoal. Mayal wal bay jun xal ix camnakxa yichamil, a ok ak'on a lobej, ẍi Jehová.

¹⁰ Max el Elías bay tu' cax max tojcan bay Sarepta. A yet max apni oc cham bay tilak conob, max yilontok cham jun xal ix camnakxa yichamil lanan wajon xal c'ax. Max awtelaytek xal yuj cham, max yalon cham axca ti': —Elok wal yin a c'ul chi toj e' junok vaso aej wuq'uej, ẍi cham.

¹¹ Lananxa toj xal yiontek a', max awtelay pax xal yuj cham junelxa: —Elok c'apax yin a c'ul chetek junok bijan pan in lo', ẍi cham.

¹² Max tak'wi xal: —Chi wak' in ti' satak Jehová a Diosal, c'am jabok ixim pan watx' yayji wuj. Junxanej betxan ixim harina yanebil ec' wuj yul jun xij, yetok ch'an jabxa aceite yul jun ẍalu. Tinani' chi ul in waj cabok in c'ax ti', cax ok in watx'nen ch'an junok in pan ok in lo' yetok jun wune ti', echxac'al ok co lo' cax chi lajwi, axa jechbanen co cam tu', ẍi xal.

¹³ Max yalon cham Elías bay xal: —C'amxa chach oc il, asi', watx'nej a pan axca alon tu', asan xin, babel cha watx'nej junok wet chak' taj bay yalan tik'ak'il tan, cax cheontek ayin, catatu' ok a watx'nen et ok a lo' yetok nak unin tu'.

¹⁴ Yujtol mayal yal Jehová co Diosal ayon Israel on ti', tol man ok lajwok jab harina ayaytok yul xij tu' c'al janic' aceite yul ẍalu tu' masantac'al yet ok yak' nab junelxa yuj Dios, ẍi cham.

¹⁵ Max lajwi tu xin, max toj xal watx'nen axca yalon cham tu'. Masanil yul tiempoal wajil tu', max low cham, c'al xal, c'al yetok jun yaliẍ unin tu'.

¹⁶ C'amc'al chi lajwi jun betxan harina tu' c'al jab aceite tu', axca max yun yalon Elías yuj Jehová.

¹⁷ Max lajwi yec'tok janic' tiempoal xin, max yaban ay jun yune' xal tu' caw wal ow max yun is yailal tu'; max camxac'al.

¹⁸ Max yalon xal bay cham Elías axca ti': —¿Tzet yayji oc xin, ach mamin chekbej Dios? ¿Tom yuj ak'on nachajtek in mul yuj Dios, cax chi cam jun wune' ti'? ¿Tom a yuj tu' xan max ach jayocok? ẍi xal.

¹⁹ —Itek jun one' tu' cayti', ẍi cham. Max yion ec' cham nak yaliẍ unin tu' bay xal, cax max yiontok bay yul is cuarto bay ay is posada, max telban ay bay sat is tx'at.

²⁰ Ayman max aj yaw cham bay Jehová: Mamin Jehová, ¿tom chatek cusc'ulal yiban jun xal ix max ak'on in posada ti', cax chak'on is camichal jun yune' xal ti'? ẍi cham.

²¹ Max lajwi tu', oxel max ay pakan cham yiban nak unin tu', cax max aj pax yaw yin ipejal bay Jehová: Mamin Jehová in Diosal, chin k'an ayach tol chak' pax yiquisal nak yaliẍ unin ti', ẍi cham yin is txaj.

²² Max yaben Jehová tzet max yal cham, cax max yak'on jay Dios is c'ul nak unin tu' junelxa.

²³ Ayman max yiaytek cham nak bay babel piso bay ayic' is txutx nak unin tu', cax max yak'on cham bay xal junelxa, max yaloni: —Ilabi, mayal jay pax c'ul nak one' ti', ẍi cham.

²⁴ Max yalon xal bay cham: —A wal tinani' chi wawal oc yin in c'ul tol yel chekbej ton Jehová Dios ayji, a ton Cham chi ak'on onej, cax chach k'anjab yin jichanil, ẍi xal.