Markuq 5 - Marku mau sau 1951; Zaiwa

Nat jum le hkat pyam e

¹ Ahkwi hau nawng he-hpaw ma Gerase bang mung hpyang yang maw je kaw e.

² Yang gë, lai mai htaw law e hkun-jang, a-joi-a-yung e nat dap e byu ra yu lup-dung mai htaw law lwi, Yang le te-yu e.

³ Hau yu a ni jang gë, lup pe ma ngut lwi e, aw ngut-kaw-lang, yang le sham taw twi e lang, a waw twi taw.

⁴ Hka-su-mu-ga-le, hki kyum e sham taw twi e, myaw myaw ling yang le twi taw kaw-lang, sham taw twi le lang hpit pyam lwi, hki kyum le law-hkyawp-law-nyang pyam lwi e, aw ngut-kaw-lang, yang le me-yu ra wum a baw kaw.

⁵ Ni-wi-min-wi hka nam le hau lup pe bum pe hka ni wun lwi, puk i-jang yang gung-du le lu-gawk e zan-che ni ra.

⁶ Yesu le we we mai byu myang jang, yang din e lwi Yang le pai le e, “Myang dik e Karai Kasang yang zaw Yesu e, ngaw Nang e hai tu le hta?”

⁷ “Nang ngaw le a zing-ri shang ga, Karai Kasang jang ngaw Nang le dung taw le,” ga lwi, hte maw e puk e.

⁸ Hka-su-mu-ga-le, Yang gë, “a-joi-a-yung nat nang e, hau yu jang mai htaw law a!” ngu lwi, yang le tai taw poi be.

⁹ Yesu gë, “Nang e ming hai ngut le hta?” ga lwi, yang le mi jang. Yang gë, “Nga maw myaw myaw ngut le mu, nga e ming Legu ngut le,” ga lwi, Yang le tu e.

¹⁰ Hau htaw ma, hau mung mai yang maw le a hkat pyam shang ga, yang Yesu le gyai ju-dung e.

¹¹ Ahkwi hau bum hki pe ma wa jum maw but zaw ni akaw.

¹² Hau mu lwi nat pe gë, “Nga maw hau wa pe jang waw wang shang ga, nangkat kaw la,” ga lwi, Yang le dung kaw e.

¹³ Hau hkun Yang yang maw le ahkang bi kat e, a-joi-a-yung nat pe kum gë, htaw law lwi, wa pe jang wang e ngut mu, wa jum gë, hau gam-kum mai nawng shut din wang lwi, nawng ma myaw-shi byu kaw e. Hau wa pe gë, i tung kaw ngut akaw.

¹⁴ Wa zung bang kum gë, hpang-law lwi, hau wa e mau-hka hau hkyaw tai kyaw kaw e. Hau hkun hau su dut law e hkyaw le wu wu ra, yang maw htaw e-law kaw e.

¹⁵ Yang maw Yesu jang je le, Legu lawm e nat dap e su gë, me-bu wut lwi hë hpyang ma e i-mit bun ging lwi zung taw e le, yang maw myang kaw e ngut mu, gyu-dan byu kaw e.

¹⁶ Hau hkyaw le myang e bang le, hau nat dap e byu e wa pe hka-su dut law e le, yang maw le lawm tai kyaw kaw e.

¹⁷ Hau mu lwi, yang maw e mau-hkyaw mai htaw law ra hkyaw le, Yang le chawm-ju dung kaw e.

¹⁸ Hau lai ma wang le Yang e ra-ha ni ra ga, hë hpyang nat dap su gë, Yang le ju-dung e.

¹⁹ Yang lum ahkang a bi e za. “Nang yum ma bang e nang bin-chang wi jang dum law lwi, Hau yum-sing nang le hka-myaw wa karum lwi, shaw-gyaw e le law tai kyaw a!” ga lwi, yang le tai kat e.

²⁰ Hau yan-mai yang htaw law lwi, Yesu Yang le hka-myaw wa karum be e le Dekapoli mau ma tai kyaw lwi, lung-lang bang mau-ba bum kaw e.

Yesu le Ya-iru wut yu e

²¹ Ahkwi Yesu gë, lai ma he-hpaw shut dum gu-dap law hkun, byu jum maw Yang jang le mung kaw e. Yang gë, hau nawng yam ma ni taw le.

²² Han hkun, tara jawng a-gi pe ma, Ya-iru ngu su byu ra yu je le lwi, Yang le myang jang Yang e hki wang ma hki-hput-htu mu,

²³ “Nga mi-we-zaw ti su shi law ni a-be. Yang ge law lwi, dwi ni shang ga, yang e a-htaw ma law ke bi ra, le je a!” ga lwi, Yang le gyai gyai ju-dung e.

²⁴ Hau mu lwi, yang e ra-ha e-law e. Byu lajum maw le Yang jang chang bum lwi, yang maw gë, Yang le zang shaw jin-jap kaw e.

Swi yut yut naw e mi-we-zaw le law ge bi e

²⁵ Ra htse i zan swi yut yut naw e mi-we-zaw ra yu le lawm ni ra.

²⁶ Yang gë, chi sara-maw myaw myaw e law ma a-shaw-a-wi myaw myaw hwi le e, yang waw ma waw lung-lang le ban hpyu yam kaw-lang, ra zwi le a waw ge, je je wi law e.

²⁷ Yang gë, Yesu e hkyaw le waw gyaw jang, hau shiwa-hpung hkau yam htang ma e-je lwi, Yang e me-bu le sawp e.

²⁸ Hka-su-mu-ga-le, yang gë, “Yang e me-bu le za lang, ngaw waw sawp le gë ngaw ge law ra,” ga e.

²⁹ Hau hkun-jang yang e swi yut kan byu law lwi, yang e a-na ge byu e le yang gung se be.

³⁰ Yesu gë, yang jang ma e wum-aw htaw law e le, Yang e i-mit ma hau hkun-jang se e mu, hau shiwa-hpung hpyang ling law u-jang, “Nga e me-bu le, aw sawp kaw e hta?” ga lwi, mi e.

³¹ Hau mu lwi, Yang e lagyaw pe. “Shiwa byu pe Nang le jin-jap nyam shaw dut e le Nang myang taw lwi e, ‘Ngaw le aw sawp akaw?’ ga ashi nung li?” ga lwi, Yang le tu kaw e.

³² Yang yu gë, hau a-mu kut e mi-we-zaw le byu-wu ra ma-tu, ling-wu ni e.

³³ Hau mi-we-zaw kum gë, yang jang dut law e a-mu le se mu, gyu-nan u-jang hwi le lwi, Yang e hë ma hki-hput-htu lwi, yang e hkyaw lung-lang teng e hkyaw za tai kyaw e.

³⁴ Yang jau gë, “Mi-we-zaw e, nang e lum e i-mit gë, nang le law ge bi be. Ngwi-ngwi-ngawn ngawn e-law ahkoi! Nang e a-na-ahkya ge shang ga,” ga lwi, yang le tai kyaw e.

Ya-iru yang zaw le dum dwi law nang e

³⁵ Yang dang nyaw taw ashi le, tara jawng a-gi e yum ma bang je le lwi “Nung zaw shi byu be. Hau sara le hai mu lwi shitsang ni ashi hta?” ga kaw e.

³⁶ Yesu yu gë, hau le tai e dang le hai a ngam mu, “Hka gyu! Lum e i-mit za baw a!” ga lwi, tara jawng a-gi wa le tai kyaw e.

³⁷ Hau hkun Petru, Yaku e Yaku e yang-gu Yawhan mai gaw-tu Yang jang chang ra ahkang aw le le a bi.

³⁸ Ahkwi hau tara a-gi e yum shut je jang, ki-ki-kyawng-kyawng, ngau-bi-ngau-nap, i-yawn nik nge maw le Yang myang e.

³⁹ Yum hkau hpyang wang law lwi, “Nung maw hai mu lwi ki-ki-kyawng-kyawng, ngau-bi-ngau-nap dut ni akaw hta? Zaw-shang gë, shi e a ngut. Yup-ngawn ni e ngut le,” ga lwi yang maw le tai e.

⁴⁰ Yang maw kum gë, Yang le nyap u-jang, wi pyam kaw e. Yesu gë, lung-lang bang le hkat pyam yau jang, hau zaw-shang e yang-nu yaug-wa e, Yang e ra-ha ni e bang le wut yu lwi, hau zaw-shang le taw jang shut wang law kaw e.

⁴¹ Hau hkun zaw shang e law le Yang zwi taw lwi, “Talihta Kumi,” ga e. Hau su ga e gë, “Zaw mi e! Taw a! Ngaw ngu taw le,” ga e ngut le.

⁴² Hau hkun-jang, Hau zaw-mi gë taw lwi, saw law e. Yang e asak gë, ra htse i zan ngut taw le. Hau mu lwi yang maw gë, gyai gyai mau-ha bum kaw e.

⁴³ Hau hkyaw le aw le a se shang ga, Yang yang maw le gyai ga tai taw be. Hau htaw ma zaw-shang le zaw-shu bi ra ma-tu Yang tai taw be.