Markuq 3 - Marku mau sau 1951; Zaiwa

Law-jum-shi e byu le law ge bi le

¹ Hau hkun tara jawng ma Yang dum wang lwi. Hau ma law-jum-shi e byu ra yu ni taw ra.

² Yu-ban-ni le hau yu le law ge bi ra lu? Yesu le mura haw ra, yang maw gyam ni akaw.

³ Hau jang Yang gë, law-jum-shi su le, “A-gung ma taw-yap a!” ga lwi, tai e.

⁴ Yang gë yang maw le, “Yu-ban-ni ma ge e a-mu sai ra, a ge e a-mu sai ra; byu a-sak le hki yu ra, a ngut jang sat-pyam ra gë, hka lum ge kut ra lu?” ga tai e. Yang maw kum gë, jit le a ga kaw.

⁵ Hau su mu yang maw i-mit htan e ma-jaw, Yang mit-yawn lwi nik-yaw i-jang, yang maw le hkyu shaw ling-wu lwi, “Nang e law lam a!” ga lwi, hau yu le tai e. Hau yu le law lam lwi, yang law ge byu be.

⁶ Hau mu lwi Hparishe pe htaw lwi, Yang le hka-su-kut sat-pyam ra, ga lwi, Herodi ngu bang e hau jang bawng ni akaw.

A-na-a-hkya hwi bang le law ge bi e

⁷ Ahkwi Yesu gë, Yang e lagyaw wi e hau nawng shut htawt law bakaw. Galile mung ma byu ra jum ra wi buchang kaw e.

⁸ Hau za a ngut; Yuda mung e Yerusalem wa ma Idumia mung e Yawdan lang he-hpaw ma bang e Turu e Sidun ling hkyu pe ma byu ra jum ra wi Yang kut kat e a-mu hkyaw pe le waw gyaw lwi, Yang jang shut je le bum kaw e.

⁹ Shiwa byu pe Yang le a zang-htung ra-ma-tu lai zaw ra lum Yang e matu hen taw ra, Yang e lagyaw wi le tai taw be.

¹⁰ Hka-su-mu-ga-le, byu myaw shaw le Yang law ge bi e yan-mai a-na-a-hkya hwi bang lung-lang bang Yang le waw zang-htung shaw ga lwi, Yang jang jun-wang law kaw e.

¹¹ A san e nat pe le hka yam Yang le myang kaw-lang, Yang e hë ma ngawm lwi, “Nang gë, Karai Kasang e Yang zaw ngut taw ra,” ga lwi, puk kaw e.

¹² Yang gë, “A law-dan shit shang ga,” ga lwi, yang maw le gyai gyai tan taw le.

Lagyaw ra htse i yu le wut yu e

¹³ Dum hau bum shut Yang daw law lwi. Yang aw e bang aw le ngut-kaw-lang wut yu e mu lwi, yang maw Yang jang shut je le bum kaw e.

¹⁴ Hau mu lwi Yang e ra-ha ni ni ra e dang nyaw maw ra ma-tu nang kat lwi, nat pe le waw hkat pyam ra a-hkang waw yu shang ga, ga lwi,

¹⁵ Byu ra htse i yu le hkin yu lwi. Yang maw le lagyaw ga lwi, ming taw be.

¹⁶ Hau ra htse i yu ma e Simun le, Petru ga lwi, ming nge ming be.

¹⁷ Zebedi e yang zaw Yaku e Yaku e yang gu Yawhan nik tang le, Buanerga ga lwi, ming nge ming be. Hau gë, mau-ming e yang zaw nik ga e ngut le

¹⁸ Andre, Hpilip, Barhtolume, Mahte, Htaw-ma, Alhpe yang zaw Yaku, Htade, Kanani byu Simun e.

¹⁹ Yang le ap-pyam ra su Yuda Iskarut ngat akaw.

²⁰ Hau htang le Yang gë, Yum hkau shut wang lwi. Yang maw zang Jang a waw zaw law shaw, shiwa byu zup-mung ni akaw.

²¹ Yang e bwi-num wi hau hkyaw le waw gyaw jang, “Yang i-mit a ging law,” ga lwi, Yang le jup-yu ra htaw e law kaw e.

²² Hau htaw ma, Yerusalem mai gyaw law e mau-sau ka sara pe le, “Yang gë, Bezebula baw e su ngut taw le. Nat pe a-gi e Yang nat pe le hkat pyam ra,” ga lwi, tai kaw e.

²³ Hau mu Yang gë, yang maw le wut yu lwi, dang-ke dawng tai e gë, “Satan gë, Satan le hka-su-kut waw hkat pyam ra lu?”

²⁴ “Mung ra mung ma e bang bawng a tsung le gë, hau mung waw jaw ni ra a ngut.

²⁵ Yum ra lum e i-kun byaw byu le gë, hau yum i-kun waw dut ra a ngut.

²⁶ Hau e ra jung za, Satan yang yum-sing e yum sing byaw gang lum law jang gë, yang a waw ni ni; htum byu ra za ngut taw le.

²⁷ Hau htaw ma, wum baw su le hë a twi le gë, yang e yum hkau ma wang lwi e, yang e ze le lu-yu e gë, aw a waw kut. Yang le hë twi lwi she yang e ze le waw yu ra ngut le.

²⁸ Ngaw nung maw le teng teng tai kyaw kaw le, wa-htsang byu pe e yu-bak lung-lang e yang maw e lu-mu dang a-myu-myu le hkyut pyam ra a-hkang waw akaw.

²⁹ Ngut-kaw-lang hau joi-yung weni le lu-mu e bang aw ngut-kaw-lang, ra-pyat-ra-dai waw hkyut pyam ra a ngut. Hau byu gë, ra-pyat-ra-dai yu-bak waw su ngut wat le,” ga akaw.

³⁰ Hau su ga e gë, Yang le a joi a yung e nat dap le, ga lwi, yang maw tai e dang majaw tai e ngut le.

Lum bang gë Yesu yang gu mang, nam maw, bwi num jat ngut le

³¹ Hau u le Yang nu e Yang gu pe gë, yum hkum ma yap taw lwi, Yang le wut nang kat kaw e.

³² Hau hkun shiwa byu pe gë, Yang e ling hkyu ma zung taw kaw e. Yang maw gë, “Wu a! Nang nu e nung gu pe yum he-lut shut mai Nang le haw taw akaw,” ga lwi, tai kaw e.

³³ Tu i-jang Yang yang maw le tai e gë, “Nga nu e Nga gu pe, aw-yu ngut le lu?” ga e.

³⁴ Dam Yang gë, ling hkyu ma zung ni e bang le wu i-jang, “Nga nu e Nga gu le wu ke.

³⁵ Karai Kasang e i-mit chang e bang, aw ngut-kaw-lang, Nga gu, Nga nam maw, Nga nu jat ngut le,” ga akaw e.