Markuq 16 - Marku mau sau 1951; Zaiwa

Yesu dum dwi taw law e

¹ Ahkwi yu-ban ni lai byu jang, Magdala Mari e Yaku yang-nu Mari nik e Salome gë, hau mang le but bi ra ma-tu nam ngawn a htsu wi kaw e.

² Hau bwi-ni ra bat e hë ni nap-gyaw naw naw le bwi htaw jang, yang maw gë, hau lup shut e-law kaw e.

³ Hau hkun yang maw gë, “Hau lup dawng shat ma e, i-nung ma-tu hau lu-gawk le aw waw king pyam bi ra lu?” ga lwi, yang maw yang chang tai lum kaw e.

⁴ Wu kat le, hau lu-gawk king pyam taw e le yang maw myang kaw e. Hau gë, ja kaw taw le.

⁵ Hau lup hkau shut wang le, du-baw e me gang e law yaw shut zung taw e i-ram ra yu le yang maw myang kaw e mu, mak byu kaw e.

⁶ Yang jau gë, “Nung maw hka mak byu kaw. Ngadang ma jen taw e Nazaret wa Yesu le nung maw haw taw akaw. Yang taw law be. Yang shi ma a ni law. Yang le kat taw e jaw-waw le wu wu ke.

⁷ Ngut-kaw-lang, nung maw e hë ma Galile mau shut Yang le law bura ga, ga lwi, Yang lagyaw wi e Petru le law tai kyaw ke. Yang tai kat e ra jung za hau ma nung maw Yang le hwi kaw ra,” ga lwi, yang maw le tai kat e.

⁸ Hau hkun yang maw htaw law lwi, hau lup mai hpang byu kaw e. Hka-su-mu-ga-le, gyu nan mau mak byu e yang maw hwi bakaw. Gyu kaw e yan-mai yang maw aw le le hai le a tai kaw.

Yang Iagyaw pe le Yang gung-du law dan shit e

⁹ Ahkwi hau bwi-ni ra bat e hë ni naw naw le Yang dwi taw byu law e htang, nit nat hkat pyam bi e Magdala Mari le Yang gung sang-hë law dan shit e.

¹⁰ Yang htaw lwi, mit-yawn ngau-bi-ngau-nap dut ni akaw, Yesu Yang htang chang wu e bang le, tai kyaw kat bi kaw e.

¹¹ Yang gë, ladwi ni le e, Yang gung yang myang-wu e le, yang maw waw gyaw kaw e hkun, a lum a jing kaw.

¹² Hau htang yang maw jang ma, yaw-saw dum shut lam e law e byu i yu le, Yang i-hpyaw-i-sam gaw-tu kut lwi, yang nik le htaw shit e.

¹³ Yang nik gë, dum law lwi, gaw bang le tai kyaw shit kaw e. Yang maw le a gyaw jing kaw.

¹⁴ Hau htang lagyaw ra htse ra yu hau za zang-zaw ni kaw le, Yang yang maw le Yang gung law dan shit e. Yang shi e mai dum dwi taw law e myang bang e dang le nan a jing kaw e yan-mai, yang maw a lum a jing e, e i-mit-htan ni e le, tan pyam e.

¹⁵ Yang dum yang maw le, “Nung maw mi-dam gawm jam shaw lem e-law lwi, wa-htsang byu hu a-myu jup shaw le, hau kabu gara dang-lu le nyaw maw kyaw ke.

¹⁶ Lum-jing lwi, baptisma hkam yu su gë, hki-yu e hwi ra. A lum a jing su jau gë, daw dan e hwi ra,

¹⁷ Lum jing e bang waw shit ra lamik hkaw gë, shi gu ngut taw le. Yang maw Nga ming mai nat pe le waw hkat pyam bakaw ra. Dang a-myu gaw-tu dang le waw tai kyaw bakaw ra.

¹⁸ Yum-sing law e lang-mwi le waw zwi le e, mwi shi e jung zang-shu kaw-lang, hai le a mu kaw ra. Naw hpyaw hwi bang e a-htaw ma yang maw law ke bi lwi, hau bang ge law bakaw ra,” ga lwi, yang maw le sang taw e.

Yesu mau-hkung shut daw law e

¹⁹ Hau mu Yum-sing Yesu gë, yang maw le dang tai taw e htang, mau-hkung shut shwi taw yu e hwi lwi, Kara Kasang e law-yaw shut zung taw le.

²⁰ Yang maw le lam law lwi, jaw-waw hkang maw ma nyaw maw shit kaw e, hau yum-sing yang maw e ra-ha mu zwi ni lwi, yang maw nyaw maw a dang teng e sak-se dut ra ma-tu, lamik hkaw waw dut nang ni e. A-men.