Markuq 13 - Marku mau sau 1951; Zaiwa

Naw-ku jawng byaw law ra

¹ Ahkwi hau naw-ku jawng mai htaw law hkun, Yesu e lagyaw ra yu gë, “Sara e, wu a! gyai hkik e lu-gawk e gyai hkik e yum ngut taw ra nung,” ga lwi, Yang le tai e.

² Yesu gë, “Shi kaw e yum pe le nang byu-wu be lu? shi ma a hpyaw hpi yam e za, lu-gawk ra lum e a-htaw ma ra lum lang, a ke law shaw dut byu bura,” ga lwi, yang le tai e.

³ Hau hkan Tsan-lun bum htaw ma, naw-ku jawng dwi-dwi-ma zung taw le, Petru, Yaku, Yawhan e Andre gë,

⁴ “Hau gu gë, hka-nam ngut ra hta? Shi gu lung-lang dik law ra ngut jang, hai kum la-dan htaw law ra hta? Nga maw le tai kyaw ra,” ga lwi, Yang le ha mi kaw e.

Yesu e ra-ha waw ni ra ma tu

⁵ Yesu gë, “Nung maw jang ma aw ngut-kaw-lang, hkyaw shwi law-ngaw pyam e a hwi shang ga, sa-di ni ke!

⁶ Byu myaw myaw wa Nga ming e paw htaw lwi, ‘Ngaw gë, hau yu wa ngut ni le,’ ga lwi, byu myaw myaw le hkyaw shwi law-ngaw pyam bakaw ra.

⁷ Gye zan e, majan paw htaw law ra dang-lu le nung maw waw gyaw jang, hka mit-nik-hkik kaw. Hau hkyaw pe gë, dut law ra ngut le, ngut-kaw-lang, hau htang-htum e gë a ngut shi.

⁸ A-myu e a-myu, ra mung e ra mung, shi-da-da gum-lau lum bakaw ra. Jaw-waw gaw-ta-tu ma, layang nun law ra, mut maw le mut law ra, hau jau gë, wi dik e a-pun-a-wang ngut taw le.

Zing-ri e hwi jang hka-su-kut ra

⁹ Nung maw yu gë, yum-sing gung-yang sa-di ni ke! Yang maw gë, sa-wun-hpung ma nung maw le ap pyam bakaw ra. Tara jawng pe ma nung maw nu-bat e hwi kaw ra. Nga ming yan-mai zau pe e, hkaw-hkam pe jang sak-se dut ra ma-tu, yang maw hë ma nung maw waw yap-taw kaw ra.

¹⁰ Hau kabu gara dang-lu le byu a-myu hu jup shaw le hë waw nyaw maw shit ra ngut le.

¹¹ Nung maw le tara a-gi pe jang shut shwi e lwi ap-pyam jang gë, hka ngu lwi dang tai ra i-mit le, hë hka mit-nik-hkik kaw. Hau a-hking ma nung maw le dang tai nang ra e ra jung za tai gyaw ke. Hka-su-mu-ga-le, nung maw dang tai ni ra bang a ngut, hau joi-yung, we-ni yang yu tai ni ra.

¹² Hau hkun ma yang-mang gë yang-gu le, yang-gu gë yang-mang le, yang-wa gë yang zaw le, shi e shut ap-hang pyam bakaw ra. Yang-zaw pe le, yang-nu-yang-wa pe le gum-lau taw lwi, sat pyam nang bakaw ra.

¹³ Nga ming yan-mai byu lung-lang bang a-ju-a-wawm e nung maw hwi kaw ra. Htang-htum je shaw shirang su jau gë, hki-yu e hwi ra ngut le.

A-shaw-a-wi hwi ra bwi-ni maw

¹⁴ Hau law-hten-law-hpyaw e a-cha-a-jut gë, a waw yap ra jaw-waw jang ma yap taw le le, nung maw myang le gë, (Mau-sau ngap ni e su gë, mit wu shang ga,) hau hkun Yuda mung ma ni e bang gë, bum lang shut hpang-law kaw shang ga.

¹⁵ Yum htaw ma ni e su gë, hka gyaw law law, yang e yum ma ze ra jung jung le yu ra le, hka wang law law.

¹⁶ Yaw-htung ma ni e su gë, yang e wut bu law yu ra le, hka tau law lashang ga.

¹⁷ Hau bwi-ni ma gung law lai bang e zaw-shang nau shu a-shi bang gë, ja ja wi bakaw ra.

¹⁸ Hau mu lwi e, Hau gë, gyaw myaw le a dut shang ga, a-kyu dung ni ke!

¹⁹ Hka-su-mu-ga-le, Karai Kasang hpan taw e mau-hë-mi-hë mai ahkwi je shaw a dut wu shi e, htang shut le a waw dut ra nik-hkik e gë, hau bwi-ni ma dut htaw law bura.

²⁰ Hau bwi-ni le, hau yum-sing a law tawt pyam le gë, aw yu e gung-shaw le a waw lut ra. Ngut-kaw-lang, Yang hkin yu be e hkin-yu bang e ma-tu, hau bwi-ni pe le law-tawt taw be.

²¹ Hau hkun byu ra yu yu, ‘Wu ke! shi ma Hkristu ni taw ra’, a ngut le, ‘Hkristu he ma ni taw ra,’ ga lwi, nung maw le tai le gë, nung maw hka jing kaw.

²² Hka-su-mu-ga-le, mau e Hkristu ngut-kaw-lang, mau e mi-htoi ngut-kaw-lang, paw htaw law lwi, hkin-yu e bang le ge ge waw shwi law-ngaw le, waw shwi law-ngaw shaw, mau-hpaw a-mu htaw shit kaw ra ngut le.

²³ Nung maw yu, sa-di ni ke! Ngaw nung maw le shi lung-lang tai hkyau taw be.

Yesu zau ra ling dum gyaw law ra

²⁴ Nik-hkik e htang ma bwi-ni pe ma, bwi gë, chut byu law lwi, lamaw le, shum byu law bi ra.

²⁵ Ki pe le mau-hkung mai bit-gyaw byu lwi, mau-hkung htaw ma jaw e i-tsam pe gë, nan law bakaw ra ngut le.

²⁶ Hau hkun le hau byu-yang-zaw gë, daru magam e hpung-wup maw e mu, mut-mau le ji lwi je le e le, yang maw myang bakaw ra.

²⁷ Hau hkun mau-mang pe le Yang nang-kat lwi, lai-dun mi shut hpyang mai, mau-mi htum shut mai mau-hkung htum e ma je shaw, Yang hkin-yu e bang le law-mung yu bakaw ra.

Shi-myaw gam dang-ke

²⁸ Hau htaw ma, shi-myaw gam le wu lwi, hau e dang-ke le maw-yu taw ke. Hau e a-kaw, a-kyang jup law lwi a-ha nyun law jang, ngye nam jang law e le nung maw se ni akaw.

²⁹ Hau e ra jung za, hau hkyaw le dut hë law e le nung maw myang e hkun, Yang gë, hkam dawng yam ma jang law e le se gyaw ni ke.

³⁰ Nung maw le Ngaw teng teng tai kaw le, ahkwi ni e shi ra pyat ma a myu byu pe a lai law byu shi le, hau hkyaw lung-lang dut byu bura.

³¹ Mau-hkung e mi-gung lai law byu kaw-lang, Nga e bang gë a lai byu ra.

³² Ngut-kaw-lang, hau bwi-ni e yam le hau i-wa mai gaw tu, aw le a waw se. Mau-hkung ma mau-mang pe e hau byu-yang-zaw lang, hau le a waw se kaw.

³³ Hau yam le nung maw a se taw kaw yan-mai, sa-di ma-ja ni ke!”

Yesu ra ling dum gyaw law ra le, ru ma-ja ni e

³⁴ “Hau hkyaw, byu ra yu we e mung hpyang e-law ni lwi, yang e yum le pyam taw le, yang e jun pe a-hkang bi le e, ra yu e ra yu le a-mu ban gam jang, hknm-zung su le le, ‘Ma-ja ni shang ga!’ ga lwi, tai taw e hkyaw le wi taw ra.

³⁵ Hka-su-mu-ga-le, hau yum sing gë, chut-shum le, gam gung le, waw tun hkun le, nap kyaw le, dum je law ra e le, nung maw a se taw e yan-mai, ru ma-ja ni ke.

³⁶ Hau su a ngut le gë, yang dan law je law lwi, nung maw a bun e yup ni le law myang bura.

³⁷ Nung maw le Ngaw tai e ra jung za, lung-lang le Ngaw tai taw e dang gë, ru ma-ja ni ke!” ga lwi, yang maw le tai e.