Markuq 11 - Marku mau sau 1951; Zaiwa

Yesu gë, Yerusalem ma wang law e

¹ Ahkwi yang maw gë, Yerusalem e tsan-lun bum ma Bet-hpa-ge e Be-hta-ni dum pe jang law jang, Yang lagyaw i yu le nang-kat lwi, tai e gë,

² “Nung nik hë hpyang ma wa shut e-law ke. Hau ma wang law e hkun, aw le a ji wu shi e law-tse zaw twi taw e le nung nik myang ra, hau le hpi lwi she law ke.

³ Su pe nung nik le, Hai yan-mai hau su kut akaw, ga mi jang, nung nik gë, ‘Hau yum-sing aw le,’ ngu lwi, tu ke. ‘Hau jang yang hau le nung nik le hi kat bura,’ ga e.”

⁴ Yang nik gë, e-law lwi, hkum he-lut gai-hkyaw ma law-tse zaw twi taw e le myang lwi, hau le hpi she law e.

⁵ Hau ma yap taw bang ra wam gë, “Nung nik hai mu lwi, hau law-tse zaw le hpi she akaw hta?” ga lwi, yang nik le mi jang.

⁶ Yesu yang nik le tai kat e e ra jung za, tai kyaw kaw e. Hau mu lwi, yang maw gë, yang nik le nang kat kaw e.

⁷ Hau hkun yang nik gë, hau law-tse zaw le Yesu jang shut she law lwi, hau e htaw ma yang maw e me-bu ke lwi, Yang hau ma taw ji e.

⁸ Byu myaw myaw wa yum-sing e me-bu le hkyaw ma hkang bi kaw e, gaw-bang gë, yaw htung ma sik-kyang zan yu lwi, hau hkyaw ma chang hkang kaw e.

⁹ Hë ma e-law bang e htang ma chang e bang gë, “Hawsanna! Yum-sing e ming-ning-san e je le su le gë, hkya-awn re dut le.”

¹⁰ Hau rau je le be. “Nga jik e Dawi yang mung gë, hkya-awn ra dut le. Myang-dik e jaw-waw ma, Hawsanna ngut shang ga,” ga lwi, puk garu kaw e.

¹¹ Hau hkun Yerusalem ma naw-ku jawng hpyang Yang wang lwi, a-zing ban-shaw le ja-hkum wu yau jang, bwi gyum law e yan-mai Yang htaw lwi, lagyaw ra htse i yu pe e ra-ha Be-hta-ni dum shut law byu kaw e.

Shi a zwi e shi-myaw gam le yang ning e

¹² Htang nap-kyaw Be-hta-ni dum mai htaw law kaw le, Yang zang-mut be.

¹³ Hau hkun we we mai a-ha-ha e shi-myaw-gam ra gam Yang myang lwi, hau ma shi ra cham cham waw yu ra, Yang mit lwi, hwi e-law e. Hau shut je e-law jang, shi-myaw shi zwi nam a ngut e yan-mai, a-ha za Yang myang e ngut mu.

¹⁴ “Ra-pyat-ra-dai nang jang ma a-shi aw le a waw zaw shang ga,” ga lwi, Yang hau sik-gam le tai e. Yang e lagyaw wi le le waw gyaw kaw e.

Naw-ku jawng le ra ling dum sai ra

¹⁵ Hau hkun yang maw gë, Yerusalem shut je kaw e. Hau naw-ku jawng ma le Yang wang lwi, hau jawng ma ze ung e bang e, wi e bang le, hkat pyam le e, ngun byan bang e gu pe e, hpung-kywi ung e bang e tang-hku pe le, dun leng pyam bi e.

¹⁶ Hau jawng hkau shut hkaw ra lum lang, yu lai wang ra Yang a dawng.

¹⁷ Yang yang maw le nyaw maw lwi, “Nga e yum gë, a-myu byu hu jup shaw e ma-tu a-kyu dung e yum ngu bura, ga lwi, ka taw e a ngut kaw lu? Nunn maw jau ge, hau le chang-dau-damya lu hkyung kut bakaw nung!” ga lwi, tai e.

¹⁸ Hkin-jawng a-gi pe e mau-sau ka sara pe hau waw gyaw jang, Yang le sat-pyam ra hkyaw haw kaw e. Hka-su-mu-ga-le mung byu lung-lang Yang e nyaw maw e hkyaw le mau-ha ni e yan-mai, yang maw ge Yang le gyu ni akaw.

¹⁹ Yang gë, min wi htang hau wa yam shut htaw lam law e.

Lum e i-mit e waw kut ra

²⁰ Hau htang ra nap le lam lai law le, hau shi-myaw gam gë, a-mit e ra-ha kyu-byu e le, yang maw myang kaw e.

²¹ Hau mu lwi, Petru bun u-jang, “Rabai e, wu wu a! Nang ning pyam e shi-myaw gam ge, kyu-byu ba nung,” ga lwi, Yang le tai e.

²² Yesu tu u-jang, “Karai Kasang le lum ni ke.

²³ Nung maw le Ngaw teng teng tai e gë, aw ngut-kaw-lang, shi bum le, ‘nang bun byu lwi, nawng ma htawt wang byu a,’ ga lwi, lum shut e i-mit a baw e za, yum-sing tai e e ra jung za dut ra, lum e ngut le gë, hau hkyaw dut ra ngut le.

²⁴ Hau mu Ngaw nung maw le tai e gë, nung maw dung-ma-dung e aw-ma-aw waw yu bakaw ra, ga lwi, lum ni ke, hau jang nung maw waw yu bura.

²⁵ A-kyu dung u-jang, yap ni e hkun, byu ra yu yu nang le ra jung jung shut le gë, mau-hkung htaw ma nung maw e i-wa gë, nung maw e mura le hkyut pyam bi shang ga, yang e mura le le hkyut pyam hi ke,” ga e.

Hkin-jawng a-gi pe, mau-sau ka sara pe, a-gi su wun pe gë, Yesu le mi kaw e

²⁷ Hau htang yang maw gë, Yerusalem shut dum wang kaw e, ahkwi naw-ku jawng hkau ma saw wun ni le, hkin-jawng a-gi pe, mau-sau ka sara pe e a-gi su wun pe Yang jang shut je le lwi,

²⁸ “Nang gë, hai ahkang e shi a-mu pe le kut ni le hta? Shi gu le waw kut ra shi ahkang gë, Nang le aw wa bi e hta?” ga lwi, tai kaw e.

²⁹ Yesu gë, “Ngaw gë, dang ra hkun nung maw le mi wu kaw ra, Ngaw le tu bi kaw la, hau hkun hai ahkang e shi gu le Ngaw kut ni le gë, Ngaw nung maw le tai kyaw ra.”

³⁰ “Yawhan e baptisma hkyaw gë, mau-hkung shut mai ngut le lu? hau a ngut, byu jang mai ngut le lu? Ngaw le tu bi kaw la,” ga lwi, yang maw le tai e.

³¹ Yang maw yu gë, shida-da bawng lwi, “Mau-hkung shut mai ngut le nga maw ngu le gë, ‘Hau ngut le, nung maw hai mu lwi yang le a lum kaw e hta?’ ga lwi, ‘Yang tu bura.’

³² Byu jang mai ngut le, nga maw ngu le gë,” mung byu pe le yang maw gyu ni akaw. Hka-su-mu-ga-le, Yawhan mi-htoi ngut e le lung-lang bang gë, ge ge wa hkam ni akaw.

³³ Hau mu lwi, yang maw Yesu le tu u-jang, “Nga maw a se,” ga lwi, tai kaw e. Hau hkun Yesu gë, “Shi a-mu pe hai ahkang e Ngaw kut ni e gë, Ngaw nung maw le a tai kyaw ra ngut le,” ga lwi, yang maw le tai e.