Mark 8 - Anglo-Saxon Wessex Gospels c1000 AD

Cum turba multa esset cum iesu

¹ Eft on þam dagen him wæs mide mycel manigeo ⁊næfden hwæt hyo æten. Ða cwæð he tosomne geclepeden his leorningcnihten.

² Ic gemiltsie þisse manigeo. for þan hy þri dages me ambidiað ⁊næbbed hwæt hyo æten.

³ Gyf ich hyo fæstende to hyre huse læte be weige hyo geteorieð. sume hyo comen feorran.

⁴ þa andswerede him hys leorningcnihtes. Hwanen maig anig man þas mid hlafen on þissen westen gefellen.

⁵ Þa axode he hyo hu fele hlafe hæbbe ge. hyo cwæðen seofen.

⁶ Þa het he sitten þa manige ofer þa eorðan ⁊nam þa seofe hlafes ⁊gode þancede ⁊hyo bræc ⁊sealde his leorningcnihten. þt hyo toforan heom asetten ⁊hyo swa dydon.

⁷ ⁊hyo næfden buten feawe fisxe ⁊he þa bletsede ⁊het beforen heom asetten ⁊hyo swa dyden.

⁸ ⁊hyo æten ⁊wurðen fylde ⁊hy namen þæt of þam brithmen (sic) belaf seofen wilien fulle.

⁹ Soðlice þa þe þær æten. wæren feower þusendæ ⁊he hyo forlet.

¹⁰ End sone he on scyp mid his leorningcnihten astah ⁊com on þa dæles dalmanuða.

¹¹ ⁊þa ferden þa farisei ⁊ongunnen mid hym smeagen ⁊tacne of hefene sohten ⁊his fandeden.

¹² Þa cwæð he reowsiende on his gaste. hwi secd þeos cneorys taken. Soðlice ic eow segge ne beoð þisse cneorisse tacen geseald.

¹³ ⁊hyo þa forlætende eft on scyp astah ⁊ferde ofer þanne muðan.

¹⁴ ⁊hyo ofergeaten þt hyo hlafes ne namen ⁊hyo næfden on scype mid heom buten ænne hlaf.

¹⁵ ⁊he heom. bæd ⁊cwæð. Lokiað ⁊warniað fram farisea ⁊herodes hæfe.

¹⁶ Þa þohten hyo betweoxe heom ⁊cwæðen. næbbe we nane hlafes.

¹⁷ þa se hælend þt wiste. he cwæð. hwæt þence ge for þan ge hlæfes næbbeð. gyt ge ne oncnaweð ne ongyteð. gyet ge hæbbeð eowre heorte geblende.

¹⁸ Eagen ge hæbbeð ⁊ne geseoð ⁊earen ⁊ge ne hereð. ne ge ne þenceð

¹⁹ hwanne ic bræc fif hlafes ⁊twegen fixas ⁊hu fela wiligenne ge naman fulle. Hy cwæðon þa twelfe.

²⁰ Ænd hwanne seofan hlafas feower þusende ⁊hu fele wiligene britsena ge namen fulle. hy saiden seofen.

²¹ Ða saigde he heom. hwi ne ongyte ge hyt.

²² ⁊hyo comen þa to bethsaida ⁊hyo brohten hym þa ænne blindne ⁊hine bæden þt he hine ætrine.

²³ ⁊þa ætran he þas blinden hand end lædde hine buton þa wic ⁊spætte on his eagen ⁊his hand on asette ⁊hine axode. hwæder he aht geseage.

²⁴ Ða quoth. he. þa þæ he hine beseag. ic geseo men swilce treow gangende.

²⁵ Eft he asette his hand ofer his eagen ⁊he geseah þa ⁊warð geeodneowed. swa þt he brihtlice eall geseah.

²⁶ Ða sende he hine to his huse ⁊cwæd. ga to þinen huse ⁊þeah þu on tun ga nanen þu hit ne segge.

²⁷ Þa eode he ⁊his leorningcnihtes on þt castell ceastre philippi ⁊he on weige his leorningcnihtes axode. hwæt seggeð men þt ic syo.

²⁸ Ða andswereden hyo. sume Johannem þanne fulluhtere. sume heliam. sume sumne of þam witegen.

²⁹ Ða cwæð he. hwæt segge ge þt ic syo. Þa andswerede petrus hym ⁊quoth. Þu ert crist.

³⁰ ⁊þa bead he hym þt hyo nanen be him ne saigden.

³¹ Ða ongan he hyo læren þt mannes sune gebered feole þinge þolien ⁊beo aworpen fram ealdormannen ⁊heahsacerden ⁊bokeren ⁊beon ofslagen ⁊æfter þreom dagen arisan.

³² ⁊spæcen þa openlice ⁊þa nam petrus hine ⁊gan hine þreatigen.

³³ þa bewende he hine ⁊kydde petre ⁊quoth. Ga on bæcc sathanas for þan þu nast þa þing þe synde godes. Ac þa þing þe synde manne.

³⁴ Ða cwæð he togædere geclepede manega mid his leorningcnihten. Gyf hwa wile me felgien wiðsace hine sylfne ⁊nime his cwolmenge ⁊folgie me.

³⁵ Se þe wile his sawle hæle gedon. se hyo forspilð. Se þe forspild his sawle for me ⁊for þam godspelle se hyo gehælð.

³⁶ Hwæt fremed men þeah he ealne middeneard gestreonig ⁊do his sawle forwurðe.

³⁷ odðe hwilc gewrixl syld se man for his sawle.

³⁸ Soðlice se þe me forsihð ⁊mine word on þisre unrihthameðen ⁊synfullen cneorysse. þane mannes sune forsihð. þanne he cemð on his fader wulder mid his halgen ænglen.