Mark 5 - Anglo-Saxon Wessex Gospels c1000 AD

¹ Þa comen hyo ofer þare sæs muðan on þt rice jerasenorum.

² ⁊him of scipe gangenden him sona agen arn an man of þam byregenen on unclænen gaste.

³ Se hæfde on byregene scref ⁊hine nan man mid racetegen ne mihte gebinden.

⁴ for þan he oft mid fotcopsen ⁊racetegen gebunden toslat þa raketegen ⁊þa fotcopses tobræc ⁊hine nan man gewelden ne myhte.

⁵ ⁊symle daiges ⁊nihtes he wæs on byrigenne ⁊on munten remende ⁊hine sylfne mid stanen ceorfende.

⁶ Soðlice þa he þane hælend feorren geseah. he arn ⁊hine gebæd.

⁷ ⁊mycelere stefne remde ⁊þus cwæð. Eale mære hælend godes sune. hwæt is me ⁊þe. ic hælsige þe þurh god þt þu me ne ðreage.

⁸ Ða cwæð se hælend. eala þu unclæne gast ga of þisen men.

⁹ Ða axsede he hine hwæt is þin name. Ða cwæð he min name is legio. for þan we manege synde.

¹⁰ ⁊he hine swiðe bæð þt he hine of þam riche ne dyde.

¹¹ þær wæs ymb þanne munt mycel swinheord. læsiende.

¹² ⁊þa unclæne gastes hine bæden ⁊cwæðen. Send us on þas swin þt we hyo on gan.

¹³ þa lefde se hælend sone ⁊þa eoden þa unclæne gastes on þa swin ⁊on mycelen rere se heord warð on sæ bescofen twa þusende ⁊wurðan adruncen on þare sæ.

¹⁴ Soðlice þa þe hyo hielden flugen ⁊cyddan on þare ceastre ⁊on lande ⁊hyo ut eoden þt hyo geseagen hwæt þær geworðan wære.

¹⁵ ⁊hyo comen to þam hælende ⁊hyo geseagen þane þe mid deofle gedreht wæs. gescridne sitten ⁊hales modes ⁊hyo him ondretten.

¹⁶ ⁊hyo rehten heom þa þe hit geseagen. hu hit gedon wæs be þam þe þa deofelseocnysse hæfde ⁊be þam swinen.

¹⁷ ⁊hyo bæden þt he of hire mæren fore.

¹⁸ Þa he on scyp eode hine ongan byddan se þe ær mid deofle gedreht wæs. þt he mid him wære.

¹⁹ Him þa se hælend ne geteiþede. ac he saigde him. ga on þinen huse to þinen heowen ⁊kyð heom hu mycel drihten gedyde ⁊he gemiltsede þe.

²⁰ ⁊he þa ferde ⁊ongan bodigen on decapolim hu fele se hælend hym dyde ⁊hyo ealle wundredon.

²¹ End þa se hælend eft on scype ferde ofer þane muðen him com to mycel menigeo ⁊wæs embe þa sæ.

²² ⁊þa com sum of heahgesamnengen Iairus hatte ⁊þa he hine geseah he astrehte hine to his foten.

²³ ⁊hine swiðe gebæð ⁊he cwæð. Min dohter is on ytemesten siðe. cum ⁊sete þine hand ofer hyo þt hye hal sige ⁊libbe.

²⁴ Þa ferde he mid hym ⁊hym felgede micel menige ⁊þrungen hine.

²⁵ Ænd þa þt wif þe on blodes rine twelf wintre wæs.

²⁶ ⁊fram manigen læcen feole þinge þolede ⁊dælde æall þt hyo ahte ⁊hit naht ne fremede ac wæs þe wyrse.

²⁷ Ða hi be þam hælende gehyrde hy com wið efte þa menigeo ⁊his reaf ætran.

²⁸ Soðlice hyo cwæð gyf ic furðer his reaf ætrine ic by hal.

²⁹ ⁊þa sone warð hire blodes rine adruwede ⁊hyo on hire fredde þæt hyo of þam witege gehæled wæs.

³⁰ And þa se hælend oncneow on hym selfen þæt hym magen ofeode. he cwæð bewend to þare mænige. Hwa ætran mine reaf.

³¹ Ða cwæðen his leorningcnihtes. Þu geseohst þas menigeo þe þrungen þe ⁊þu cwedst hwa ætran me.

³² ⁊þa beseah hine þt he geseahge þane þe þt dyde.

³³ þt wif þa ondrædende ⁊forhtigende com ⁊astrehte hyo beforen him ⁊saigde him eall þt riht.

³⁴ Ða cwæð se hælend. dohter þin geleafe þe hæle gedyde. ga þe on sibbe ⁊beo of þisen hal.

³⁵ Hym þa gyt spræcenden hio comen fram þam heahsamnungen ⁊cwæðen. Ðin dohter ys dead hwi drecst þu leng þane lareow.

³⁶ Ða he geherde þt word. þa cwæð se hælend ne ondræd þu þe gelef for an.

³⁷ Ænd he ne let hym anigene felgian. buton petrum ⁊Iacobum ⁊Iohannem Iacobes broðer.

³⁸ ⁊hyo comen on þas heahealdres hus ⁊he geseah mycel gehled wepende ⁊gemeriende.

³⁹ ⁊þa he ineode he cwæð. Hwi sende ge gedrefede ⁊wepeð nis þis mæden dead. ac hyo slepð.

⁴⁰ Ða tealden hyo hym. He þa ealle utadrifene. nam petrum ⁊þas maidenes moder ⁊þa þe mid heom wæren ⁊ineode swigende þær þæt maiden wæs.

⁴¹ ⁊hire hand nam ⁊cwæð. thalimthacumi. þt is on ure þeode gereht. maide þe ic segge aris.

⁴² ⁊hyo sona aras ⁊eode. Soðlice hyo wæs twelf wintre ⁊ealle hyo wundredon. mycelere wundrunge.

⁴³ ⁊he heom þearle bebead þt hyo hit nanen men ne saiden ⁊he het hire syllen æten.