Mark 3 - Anglo-Saxon Wessex Gospels c1000 AD

¹ End eft he eode on gesamnunge ⁊þær wæs an man forscruncen handde hæbbende

² ⁊hyo gemden hwader he on restedagen gehælde þt hyo hine gewreiden.

³ Þa cwæð he to þam men þe forscruncene hand hæfde. aris gemang heom.

⁴ Ða cwæð he alyfð restedagen wel to donne hwæðer ðe yfele sawle gehælen hwaðer to forspillen ⁊hyo swigedon.

⁵ ⁊hyo besceawiende mid eorre ofer hire heorte blindnisse. he unrot cwæð to þam men. aþene þine hand ⁊he aþenede hyo. þa warð his hand gehæled sone.

⁶ Ða farisei mid herodianiscen utgangende þeohtendon ongean hine. hu hyo hine fordon mihton.

⁷ ⁊þa ferde se hælend to þare sæ. mid his leorningcnihten ⁊mycel menigeo him felgede fram galilea ⁊iudea.

⁸ ⁊ierusalem ⁊fram idumea ⁊begeonden iordane ⁊to him com mycel menige ymbe tyrum ⁊sydonem geherende þa þing þe he worhte.

⁹ ⁊he cwæð to his cnihten þt hyo hym on scype þenedon for þare manigeo þæt hyo hine ne ofþrungen.

¹⁰ Soðlice manege he hælde. swa þt hyo ætrinen his ⁊swa fele swa untrumnysse

¹¹ ⁊unclæne gastes hæfden. Ða hyo hyne geseagen hyo toforan hym astrehten. þus cweðende clepeden. þu ert godes sune.

¹² ⁊he hym swiðe forbead. þt hyo hine ne geswuteledon.

¹³ ⁊on ænne munt he ferde ⁊to hym geclypede þa þe he wolde ⁊hyo to hym comen

¹⁴ ⁊he dyde þt hyo twelf mid him wæren ⁊he hyo asende godspell to bodienne.

¹⁵ ⁊he heom anweald sealde untrumnysse to hælenne ⁊deofelseocnysse ut to adrifenne.

¹⁶ ⁊he nemde symon petrum

¹⁷ ⁊jacobum zebedej ⁊iohannem his broder ⁊him naman onsette boaneries þt is þunres bearn.

¹⁸ ⁊andream ⁊philippum ⁊bartholomeum ⁊thomam ⁊iacobum alphej ⁊taddeum ⁊symonem chananeum.

¹⁹ ⁊iuda scarioth. se hine sealde.

²⁰ ⁊eft him to com swa mycel manigeo þt hyo næfden hlaf to ætenne.

²¹ ⁊þa hyo hine gehyrden hyo ferden þæt hyo hine namen ⁊þus cwæðen. Soðlice he is on hatheortnysse gewend.

²² ⁊þa bokeres þe wenden fram ierusalem cwæðen. Soðlice he hafð belzebub ⁊on deofle ealdre he deofelseocnisse utadrifð.

²³ ⁊he hyo togadere gecleopede ⁊on bispellen heom to cwæð. hu maig sathanas sathana un adrifen (sic)

²⁴ ⁊gif his rice on him sylfen byoð todæled hu maig hit standen.

²⁵ ⁊gyf þt hus ofer hit sylfen bið todæled hu maig hit standen.

²⁶ Ænd gif sathanas winð angen hine sylfne he beoð todæled ⁊he standen ne maig ac hafð ende.

²⁷ Ne maig man þane strangen his ehte ⁊his fate bereafian ⁊on his hus gan butan man þanne strangen ærest gebinde þanne his hus reafige.

²⁸ Soðlice ic eow segge ealle synne sende manne bearne forgefene ⁊bismerunge þam þe hye bysmeriged.

²⁹ Soðlice ic eow segge se þe þanne halgan gast bysmerieð se næfð on ecnysse forgyfenysse. ac beoð eches geltes sceldyg.

³⁰ for þam þe hyo cwæðen. he hafð unclæne gast.

³¹ Þa comen to him his moder ⁊his gebroðre ⁊þærute stoden ⁊to him senten ⁊to hym clepeden.

³² ⁊mycel maniga ymbe hine sæt ⁊to him cwæðen. Her is þin moðer ⁊þine broðre ute ⁊seceð þe.

³³ He þa heom andswerede ⁊cwæð. hwilc is min moder ⁊mine gebroðre.

³⁴ ⁊he quoth. Ða behealdende þe him abuten sæten. her is min moder ⁊mine gebroðre.

³⁵ Soðlice se þe deð godes willen se is min moder ⁊min broðer ⁊mine swustren.