Mark 16 - Anglo-Saxon Wessex Gospels c1000 AD

¹ ⁊þa saternes daig wæs agan sye magdalenisce Marie ⁊Iacobes Marie ⁊salomee bohten wertgemang þt hyo comen ⁊hine smereden.

² Ænd swiðe ær anen restedaige comen to þare byregenne up asprungenne sunna.

³ ⁊cwæðen heom betweonen. hwa awylt us þysne stan of þare byregene dure.

⁴ Þa hyo hy beseagen. hyo geseagen þane stan aweig aweldne. soðlice he wæs swiðe mycel.

⁵ Ænd þa hyo eoden on þa byregenne hyo geseagen ænne geongne on þam swiðren healfe sittende hwiten gerlen oferwrogene ⁊hyo þa forhteden.

⁶ Þa quoth he to heom ne fortige ge na. ge seceð þane nazarenisca hælend ahangene. he aras. nis he her. her is syo stowe þær hy hine leigden.

⁷ ac fareð ⁊seggeð his leorningcnihten ⁊petre. þt he gæd toforen eow on galilee. Þær ge hine geseoð swa he eow sæde.

⁸ ⁊hyo ut eoden ⁊flugen fram þare byrigene ⁊wæren aferde. for þare sihðe þe hyo geseagen ⁊hyo nane men naht ne saigden. soðlice hyo heom andredden.

⁹ Þa he aras on ærne morgen on restedaige; ærest he atewde þare magdalenisca marie of þare þe he ut adraf seofen deofelseocnysse.

¹⁰ ⁊hy þa ut eode ⁊hit þam cydde þe mid him wæren heofende ⁊weopende.

¹¹ þa hyo gehyrden þt he leofede ⁊hyo hine geseagen. þa ne lyfden hyo him.

¹² Æfter þam heom twam he wæs atewed on oðren heowe. heom on þane tun farende.

¹³ ⁊hyo þa foran ⁊þt odren cydden ⁊hye heom ne gelyfden.

¹⁴ Ða æt þan ytemesten hyo ændlefene æt mete sæten. heom atewede se hælend ⁊here unbelefen ⁊heora heorten getremede. forþan þt hye hine geseagen arise hi hit ne gelyfden.

¹⁵ ⁊he saide heom. Gað swa wid swa middeneard bodiende þt godspel ealle gescefte.

¹⁶ þt se þe gelyfd ⁊is gefunted he is hal ⁊ge se þe ne gelyfd he is fordemd.

¹⁷ Þa tacnen þe hæbbed þa þe gelyfeð þis folgeð. On mine name deofle gad ut. tungen spreced neowe.

¹⁸ ⁊naddren benemed ⁊gyf he deadlice drenc drinced ne mag he heom derigen ⁊gyf hye uppen seocen here hande asetteð þe bet heom scel wurðe.

¹⁹ ⁊ure hlaford hælend crist seððen he wið heom gesprecen hæfde; he astah in to heofene ⁊sitt on godes swiðre.

²⁰ Hyo þa fulfelde bodeden swa wid swa al. þas hlafordes weorces ⁊his bispelles fulfellende mid felgenden tacnen. AMen.