Mark 15 - Anglo-Saxon Wessex Gospels c1000 AD

¹ Ða sone on morgen worhten þa heahsacerdes heore gemot. mid ealdren ⁊boceren ⁊eallen werede ⁊lædden þane halend gebunden ⁊sealden hine pilaten.

² Ða axode pilatus hine eart þu iudea kining. Ða andswerede he hym. Ðu hit sægst.

³ Þa wreiden hine þa heahsacerdes. on manegen þingen.

⁴ Eft pilatus hine axode ne andswerest þu nan þing. loca hu mycelen hyo þe wreigeð.

⁵ Ða ne andswerede se hælend him nam mare swa þæt pilatus wundrede.

⁶ On symmeldaig wæs his gewune. þt he heom forgefe ænne bundenne swa hwilcne swa hyo bæden.

⁷ Ða bæden hyo barraban. se wæs gebunden mid þam replingen. se þurh swicecræft manslyht worhten.

⁸ ⁊þa he ferde þa ongan syo manigeo hine biddan swa hy symle dyden.

⁹ Ða cwæð pilatus. Wille ge þt ic eow forgefe iudea kyning.

¹⁰ he wiste þt þurh ande hine sealden þa heahsacerdas.

¹¹ Ða astireden þa biscoppes þa manige þt he heom barraban forgefe.

¹² Eft pilatus him andswerede. hwæt do ic be iudea kyninge.

¹³ hyo eft grætten ⁊cwæðen. hoh hine.

¹⁴ Þa saigde pilatus. hwæt yfeles dyde he. hyo þas þe ma cleopeden ahoh hine.

¹⁵ Pilatus wolde þa þam folce gecwemen ⁊forgef heom barraban ⁊sealde heom þanne hælend beswungen þt he ahangen wære.

¹⁶ Þa lædden þa cempen hine on þas domernes cæfertun ⁊hyo togædere ealle wered cleopeden.

¹⁷ ⁊scridden hine mid purpren ⁊him on setten þernene helm awundene.

¹⁸ ⁊ongunnen hine þus greten. hal beo þu iudea kyning.

¹⁹ ⁊beoton hine on þt heafeð mid reode ⁊spetten him on ⁊hire cneow beigden ⁊hine ædmetten.

²⁰ Ænd syððen hyo hine bismeredon. unscriddan hine þam purpran ⁊scriddan hine mid his reafen ⁊lædden hine þæt hyo hine ahengen.

²¹ ⁊genedden sumne weigferende symonem cyreneum cumende of þam tune alisandres fader ⁊ruffi. þt he his rode bære.

²² ⁊hyo lædden hine on þam stowe golgotha. þt is on ure þeode gereht heafedpanna stowa.

²³ ⁊sealden him gebytered win ⁊he hit ne onfeng.

²⁴ And þa hyo hine ahengen hyo dælden his reaf ⁊hlote wurpen. hwæt gehwa name.

²⁵ Ða wæs undertid ⁊hyo ahengen hine.

²⁶ ⁊ofergewrit his geltes wæs awriten iudea kyng.

²⁷ ⁊hyo ahengen mid him twegen scaðen ænne on his swiðeren healfe ⁊oðerne on his winstren.

²⁸ þa wæs þt gewrit gefylled þt cwæð ⁊he wæs mid unrihtwisan geteald.

²⁹ And þa þe forðstopen hine gremedon ⁊hyra heafod cwehten ⁊þus cwæðen. Wala se towerpð þt tempel ⁊on ðrim dagen eft getymbred.

³⁰ gehæl þe sylfne of þare rode stigende.

³¹ Eal swa þa heahsacerdas bysmeriende betwexe þam bokeren cwæðen. odre he hæle gedyde. hine sylfne he ne maig halne don.

³² Crist israele kyng astig nu of rode þt we geseon ⁊gelefen. And þa þe mid him ahangeden wæren him mid gebundene.

³³ And þare syxte tide wurðe þeostre geworðene geond ealle eorðan. odðe nontide.

³⁴ And to nontide se hælend clepede mycele stefne heloy heloy lama sabathani. þt is on ure geþeode. min god min god. hwi forlædst þu me.

³⁵ ⁊sume þe þær abuton stoden ⁊þis gehyrdon hyo cwæðen. nu þes clyped heliam.

³⁶ þa arn hyre an ⁊fylde ane spunge mid eisile ⁊on reod sette ⁊him drincen sealde ⁊cwæð. læteð þt we geseon hwæðer helias cume hine niðer to settenne.

³⁷ Se hælend þa asende his stefne ⁊forðferde.

³⁸ Ænd þas temples wahirift wæs tosliten on twa of ufewearden odðe niðeweard.

³⁹ Ða þas hundredes man þe þær stod agen geseah þt se hælend swa clepiende forðferde. he cwæð. Soðlice þes man wæs godes sune.

⁴⁰ And þa wif wæren feorren behealdende ⁊betwux þam wæs sie magdalenisce Marie ⁊Marie iacobes moðer ⁊salomee.

⁴¹ ⁊þa he wæs on galilee hy felgden hym ⁊him þenoden ⁊manege oðre þe him mide ferden on ierusalem.

⁴² Ænd þa æfen wæs geworden þt wæs parasceue. þt is ær sæterdaige

⁴³ þa com iosep se æðele refe of arimathia se sylfe godes rice geanbidode ⁊he dyrstilice in to pilate eode ⁊bæd þas hælendes lichame.

⁴⁴ Þa wundrede pilatus gyf he þa gyt forðferde. Ða clypede he þanne hundredes man ⁊hine axode hwæðer he dead wære.

⁴⁵ Ða he wiste þt. þa agyf he þane lichame iosepe.

⁴⁶ Ða bohte iosep ane scytan ⁊hine þæron befeold ⁊on byrigenne leigde syo wæs of stane aheawan ⁊wyltel ænne stan to þare berienne dure.

⁴⁷ Þa com Marie magdalene ⁊Iosepes Marie ⁊beheolden hwær he geleigd wære.