Mark 14 - Anglo-Saxon Wessex Gospels c1000 AD

¹ Soðlice þa æfter twam dagen wæren eastren ⁊þa sohten þa heahsacerdes ⁊þa boceres hu hyo hine mid facne namen ⁊ofslogen.

² Þa cwæðen hy næs na on freolsdaige þy læs þas folces gehlyd wurðe.

³ and þa se hælend wæs on bethania on symones huse anes hreofelen ⁊þær sæt. Þa com an wif ⁊hæfde hire sealfebox deorewurðe nardes ⁊tobrokene sealfboxe ofer his heafed aget.

⁴ Sume hit unwurdlice forbæren ⁊betweoxe heom sylfen cwæðen. for hwi wæs þises sealfe forspillednyss geworðen.

⁵ þeos sealfe mihte beon geseald to þrem hund panegen ⁊beon þearfen geseald ⁊yrseden agen hy.

⁶ Þa quoth. se hælend. Læted hyo hwi synde ge hire grame. god werc hyo on me worhte.

⁷ Soðlice symble ge hæbbed þearfen mid eow ⁊þanne ge willeð ge magen heom tæle don. me ge symble næbbeð.

⁸ þeos sealde þt hyo hæfde. hyo com to smeriene minne lichame on berigenne.

⁹ Soðlice ich eow segge swa hwær swa þis godspell geboded byo on eallen middenearde byð geboded þt hyo þis on his geminde dyde.

¹⁰ Ða iudas scarioth þt is wiðersace an of þam twelfen ferde to þam heahsacerden þt he hine heom beleawde.

¹¹ Ða hyo þis geherden hyo fageneden ⁊beheton him feoh to syllene ⁊he smaigde hu he hine digelice sealde.

¹² And þam formen daige azimorum. þa hyo eastren offredon. his leorningcnihtes him saiden hwider wilt þu þt we faren ⁊gegærewian þe þt þu eastren æte.

¹³ Þa sende he twegen of his leorningcnihten ⁊sæden heom. Gað on þas cestre ⁊ginc agen yrnð sum man berende sume wæterflaxan. Folgieð him.

¹⁴ ⁊swa hwider swa he ingað segged þas huses hlaferde. Ure lareow sægð hwær is min gysthus ⁊min gereord. hwær æte ic eastren mid minen leorningcnihten.

¹⁵ And he inc geswuteleð micele halle geþefte ⁊gegerewiað us þare.

¹⁶ þa ferden his leorningcnihtes ⁊comen on þare cestre ⁊funden hit eall swa he saigde ⁊gegarewedon þa eastren.

¹⁷ Soðlice þa æfen com heom twelf mid him.

¹⁸ sittende ⁊etende sæde se hælend. Soðlice ic eow segge. þt eower an þe mid me æt gesyld me.

¹⁹ þa ongunnen hio beo dreorige ⁊betwuxe heom cwæðen. cwedst þu eom ic hit.

²⁰ Ða sæde he heom. an of eow twelfen me sylð. Se þe his hand on disce mid me dypd.

²¹ Ænd witodlice mannes sune gað swa be hym awriten is. Wa þam men þurh þane þe mannes sune beoð geseald. betere hym wære þt se man akenned nære.

²² Heom þa ætende afeng se hælend hlaf ⁊hine bletsiende bræc ⁊sealde heom ⁊þus cwæð. nymed þis is min lichame.

²³ ⁊onfeng calice ⁊gode þances dyde ⁊sealde heom ⁊ealle heon ofdruncen.

²⁴ Ða saide he heom þis is min blod þare nywe cyðnissan. þt beoð for manigen agoten.

²⁵ Soðlice ic eow segge þt ic henen forð ne drince of þises wingeardes kynne. oððe þanne daig þanne ic hine neowe drince on godes rice.

²⁶ Ænd gecweðenen lofe hyo ferdon on elebergene munt.

²⁷ Þa quoth se hælend ealle ge beoð geuntreowsede on þisse nihte. for þam þe hit awriten is. ic slea þanne heorde ⁊beoð þa scep todræfde.

²⁸ Ac æfter þan þe ic arise ic cume beforen eow. on galilea.

²⁹ Þa saide petrus him. þeah þe ealle swician. ne swicige ic þe na.

³⁰ Ða cwæð se hælend. Soðlice ic þe segge. þt þu on þisen nihte ær coc twewe cræwe þreowe wiðsæcst min.

³¹ ⁊he þæs þe mare spæc ⁊þah me geberige mid þe to sweltene. ne ætsace ic þin ⁊swa hyo cwæðen ealle.

³² Ða comen hyo to anen tune þas nama wæs getsemani ⁊he cwæð to his leorningcnihten. Sitteð her oð þt ic me gebidde.

³³ ⁊he nam þa mid him petrum ⁊iacobum ⁊iohannem þa ongan he forhtigen ⁊sarigen.

³⁴ ⁊sæde heom. Vnrot is min sawle odðe deað gebiddeð her ⁊wakieð.

³⁵ Ða he lithwon forðstop. he astrehte hine ofer þa eorðan ⁊gebæd. gyf hit beon mihte. þt he on þare tide fram him gewite.

³⁶ ⁊þa quoth. he. abba. þt is fader on ure geþeode alle þing þe sende mihtilice afyrre þisne calic fram me. ac na þt ic wille ac þt þu.

³⁷ Ða com he ⁊funde hyo slæpende ⁊cwæð to petre. Simon slæpst þu. ne mihtest þu ane tide wacien.

³⁸ wacieð ⁊gebiddað þt ge on costnunge ne gan. witodlice se gast is geare. ac þt flæsc is untrum.

³⁹ And eft he gebæd þa ylcen spæce.

⁴⁰ ⁊þa he hine eft agen bewende. he funde hyo slæpende. heore eagen wæren gehefegede ⁊hyo nyston hwæt hyo him andswereden.

⁴¹ Þa com he ðriddan siðe ⁊sæde heom slæpeð nu ⁊resteð genoh hit is. time is cumen nu is mannes sune geseald on synfulre hande.

⁴² arised uten gan. nu is gehende se þe me syld.

⁴³ him þa þe gyt spræcende com iudas scarioth þt is wiðersaca. an of þam twelfen ⁊mid him mycel manige. mid sweorden ⁊mid sahlen. fram heahsacerden ⁊bokeren ⁊ealdren.

⁴⁴ Soðlice his læwa heom taken sealde ⁊þus cwæð. Swa hwilcne swa ic kysse. se hit ys nymeð ⁊lædeð hine wærlice.

⁴⁵ ⁊sone swa he com he genehlacte hine to ⁊cwæð. Lareow; ⁊cyste hine.

⁴⁶ ⁊hyo heore hande on hine wurpen ⁊namen hine.

⁴⁷ Soðlice an of þam þe þær embeuten stoden his sweord abræd ⁊slog þas sacerdes þeow ⁊his eare of acarf.

⁴⁸ Ða cwæð se hælend heom andsweriende. Swa swa to anen scæðan ge ferden mid sweorden ⁊treowen me gefon.

⁴⁹ þanne ic daighwamlice mid eow wæs on temple lærende ⁊ge me namen. ac þt þa gewrite syen gefellde.

⁵⁰ Ða forleten his leorning cnihtes ealle hine ⁊flugen.

⁵¹ Sum gungling him fylgde mid ane scytan bewæfed nacod ⁊hy name hine.

⁵² þt wærpendre þare scete nacod he heom fram fleah.

⁵³ ⁊hy lædden þanne hælend to þam heahsacerde ænd comen ealle þa sacerdes. ænd bokeres ⁊ealdres. togædere.

⁵⁴ Petrus heom felgede ferren oð þas heahsacerdes cæfertun. and he set mid þam þenum ⁊wermden hine æt þam fyre.

⁵⁵ Ða heahsacerdas sohten ⁊eall geþeaht. tale agen þanne hælend. þt hyo hine to deaðe sealden ⁊hyo ne fundon.

⁵⁶ Manege sæden lease cyðnyssen agen hine ⁊þa cyðnisse næren þaslice.

⁵⁷ Ða arise sume ⁊saigden lease cydnysse agen hine ⁊þus cwæðen.

⁵⁸ Sodes we gehyrden hine seggen ic toweorpe þis handworhte temple ⁊æfter þrem dagen ic oðer unhandworht getimbrige.

⁵⁹ ⁊heore cydnysse næs þasgelic.

⁶⁰ Ða aras sum heahsacerd on heora midlene ⁊acxode þanne hælend. Ne andswerest þu nan þing agen þt þas þe onweorped.

⁶¹ he swegede ⁊naht ne andswerede. Eft hine axode se heahsacerd. Ert þu crist. Þas gebletsedes godes sune.

⁶² Þa sæde se hælend ic eom ⁊ge geseoð mannes sune on swiðren healfe sitten. his maignes ⁊cumende mid heofenes genipen.

⁶³ Ða cwæð se heahsacerd his reaf slytende. hwi wilnige we gyt cyðera.

⁶⁴ ge geherden his bismer. hwæt þincð eow. Ða hyrden hyo ealle hine ⁊cwæðen. þt he wære deaðes scyldig.

⁶⁵ Ænd sume agunnen hym on spæten ⁊oferwreon his ansiene ⁊mid festen hine beaten ⁊him to cwæðen. Ared ⁊þa þenas hine mid handen beoten.

⁶⁶ ⁊þa petrus wæs on cæfertune þa com to him an þinen þas heahsacerdes.

⁶⁷ ⁊þa hye geseah petrum wermende þa cwæð hy. Þu wære mid þam nazareiscen hælende.

⁶⁸ Ða ætsoc he ⁊cwæð. Ic nat ne ic kan hwæt þu saigst ⁊he eode þa of þam cæfertune ⁊se coc creow.

⁶⁹ Eft þa hine cneow oðer þinen ⁊hyo ongan cweðen to þam þe þær abuten stoden. Soðlice þes is of þam.

⁷⁰ ⁊he eft ætsoc. Ænd eft þa embe litel þa þe eft stoden cwæðen to petre. Soðlice þu ert of þam galileisc þu ert.

⁷¹ Ða ætgan he ofsacan ⁊swerien. soðes ne can ic þanne man þe ge seggeð.

⁷² ⁊þa eft sone creow se coc. Ða gemunde petrus þas hælendes word þe he him saide. ær se coc creowe twige. þrewe þu me ætsæcst. þa ongan he wepen.