Mark 13 - Anglo-Saxon Wessex Gospels c1000 AD

¹ Þa he of þam temple eode. þa quoth. an of his leorningcnihten to him. Lareow loca hwilce stanes her synt ⁊hwilce getymbrenge. þisses temples.

² þa cwæð se hælend. ne geseo ge ealle þas mycelen getymbrenge. ne beoð her læfd stan ofer stan þe ne wurð toworpen.

³ Ða hyo sæten on oliuetes dune. ongean þæt tempel. synderlice hine petrus ⁊Iacobus ⁊Iohannes ⁊Andreas acsoden.

⁴ Sege us hwænne þas þing gewurðen ⁊hwilc taken beoð þanne ealle þas þing gewurðe sculen ⁊hwilc tacen byð þanne ealle þas þing onginneð ⁊beon sculen geended.

⁵ þa ongan se hælend heom andsweriende to cweðen. warnieð þt eow nan man ne beswice.

⁶ Soðlice manege cumeð on minen namen ⁊cweðað. ic eom crist ⁊beswiced manege.

⁷ ⁊þanne ge gehereð gefehte ⁊gefyhte hlisan. ne ondræde ge eow. hit byred þæt hit gelimpe. ac þanne gyt nys ænde.

⁸ Soðlice þeod arist ongean þeode ⁊rice ongen rice ⁊byoð eorðen steriunge geond stowe ⁊hunger. þis synde sare angin.

⁹ Warnieð eow sylfe. hyo sylleð eow on geþeohte ⁊swinged on gesamnungen ⁊ge standeð beforen demen ⁊kyningen for minen naman heom on gewitnysse ⁊on ealle þeode.

¹⁰ Ærest gebyreð beon þæt godspell geboded.

¹¹ ⁊þanne hyo syllende eow lædeð ne forsmeage ge hwæt ge spræcen. ac spreceð þæt eow on þare tide geseald byð. Ne sende ge na sprecende ac se halge gast.

¹² Soðlice se broðer þanne broðer to deaðe sylð ⁊se fæder his sune ⁊þa bearn ariseð agen heore maiges ⁊mid deaðe hyo geweccæð.

¹³ ⁊ge beoð eallen on hatigunge for minen namen. Soðlice se beoð hal se þe oð ende þurhwunieð.

¹⁴ Þanne ge geseoð þare towardnysse asceonunge standen þær hyo ne scel þanne ongyte se þe ræt. fleon þanne on muntes þa þe synde on iudee.

¹⁵ ⁊se þe is ofer þecene ne stige he on his hus. ne he in ne ga þt he aht on his huse nyme.

¹⁶ ⁊se ðe byð on acere ne cherre he ongean þt he his reaf nime.

¹⁷ Wa kennenden on þam dagen

¹⁸ byddeð þt þis on wintre ne gewurðe.

¹⁹ Soðlice on þam dagen beoð swilce gedrefednysse. swilce ge ne (sic) wurðon. of fremðe. þare ge sceafte þe god gescop. odðe nu. ne nane ne gewurdeð.

²⁰ Ænd gyf drihten þas dages ne gescyrte. nan flæsc ne wurðe hal ac for þam gecorenen þe he gecheas he scyrte þa dages.

²¹ Ænd gyf eow hwilc saigð witodlice her is crist. witodlice þær he is. ne gelyfe ge.

²² Soðlice lease cristes ⁊lease witegen ariseð ⁊wirceð forbeacne to beswicene. Eac gyf hit beon maig þa gecorene.

²³ Warnied eow. nu ealle þing þe ic eow foresæde.

²⁴ ac on þam dagen æfter þare geswæncednysse beoð sunne aþeostred ⁊se mone his brihtnysse ne sylð.

²⁵ ⁊heofenes steorren beoð fallende ⁊beoð astyrede þa manege þe on heofena synde.

²⁶ Ðanne gesyeð hyo mannes suna cumende on genipum mid mycelen maigne ⁊wuldre.

²⁷ þanne sent he his ængles ⁊hyo gaderieð his gecorene of feower winden of eorden heahnysse oð heofenes heahnysse.

²⁸ Leorniað an byspell be þam fictreowe. þanne his twi beoð mare ⁊leaf beoð akenned. ge witen þæt sumer is gehende.

²⁹ ⁊wite ge þanne ge þas þing geseoð þæt he ys dure gehende.

³⁰ Soðlice ic eow segge þt þeos cneores ne gewit ær þan ealle þas þing gewurðen.

³¹ heofene ⁊eorðe gewitoð. witodlice mine word ne gewiteð.

³² Be þam daige ⁊þare tide nan man nat. ne engles on heofene ne mannes sunu buton fæder ane.

³³ Warnied ⁊wacieð ⁊gebyddað eow ge nyten hwænne sye tid is.

³⁴ Swa se man þe ælþeodilice ferde. forlet his hus ⁊sealde his þeowen þane anweald gehwilces weorces ⁊beode þam dureworde þt he wacie.

³⁵ Eornestlice wacieð. ge nyten hwænne þas huses hlaford cymd. þe on æfen þe on midre nihte. þe on hancrede. þe on morgen.

³⁶ þe læs þe he eow slæpende gefinde þanne he færenge cymð.

³⁷ Soðlice þt ic eow segge. eallen ic hit segge wakieð.