Luke 5 - Anglo-Saxon Wessex Gospels c1000 AD

¹ Soðlice wæs geworðen þa þa manege him to comen þæt hyo godes word gehyrden. he stod wið þane mere genesareth.

² ⁊he geseah twa scipe standende wið þanne mere. Ða fixeres eoden ⁊wexon heore nett.

³ He þa astigende on an scyp; þæt wæs symones. bed hine þæt he hit lithwan fram lande tuugen ⁊on þam scype sittende he lærde þa manega.

⁴ Ða he spræcen geswac he cwæð to symone. Teoh hit on deopan ⁊læteð eowre nett on þanne fiscwær.

⁵ Ða cwæd symon him andswerede. Ela bebended (sic) ealle niht swikende we naht ne fengen. Soðlice on þinum worde ich min nett utlæte.

⁶ ⁊þa hyo þæt dydon. hyo betugen mycele maniga fixsca; ⁊heore nett wæs tobroken.

⁷ ⁊hyo becneden heore geferen; þe on oðren scypen wæren. þt hyo comen ⁊heom felsten. Ða comen hyo ⁊gefelden baða þa scype swa þæt hyo neh wæren gesencten.

⁸ Þa petrus þæt geseah he feoll to þas hælendes cneowen; ⁊cwæð. Drihten gewit fram me for þam ich em sinful man

⁹ ⁊he wundrede ⁊ealle þa þe mid hym wæren on þam wære þare fixsca þe hyo gefengen.

¹⁰ Gelice Iacobum ⁊Iohannem Zebedeis sunes. þa wæren symones geferan. Þa cwæð se hælend to symone. ne ondræd þu þe. Heonen forð þu byst menn feonde.

¹¹ ⁊hyo tugen hyre scyp to lande ⁊forlæten hyo ⁊folgedon þam hælende.

¹² Þa he wæs on anre ceastre þa wæs þær an hreofla ⁊þa he geseah þanne hælend þa astrahte he hine ⁊bæd ⁊þus cwæð. Drihten gif þu wilt. þu miht me geclænsien.

¹³ Ænd he æthran hine his handa aþenede ⁊cwæð. Ic wille; syo þu geclænsed. Ænd sone se hreofla hym fram ferde.

¹⁴ ⁊he bed him þt he hit nanen men ne saigde. ac ga ⁊atewe þe þam sacerde. ænd bring for þinre claensinge swa moyses bebead heom on gewitnysse.

¹⁵ Witodlice þas þe ma seo spræc be him ferde ⁊mycele menega comen þæt hyo gehyrdon ⁊wurðen gehælede fram heora untrumnesse.

¹⁶ He þa ferde on westen ⁊hine gebæd.

¹⁷ Þa wæs anen daige geworðen þæt he sæt ⁊hyo lærde ⁊þa wæren þa farisei sittende ⁊þare lagelareowwæs. þa comen of ælche castelle galilee ⁊Iudee ⁊ierusalem ⁊drihten magen wæs hyo to gehælene.

¹⁸ Ænd þa bæren men on anen bedde enne man; se wæs lame.

¹⁹ ⁊hyo ne mihten hine inbringen ⁊aleggen beforan hym; for þare maniga þe mid þam hælende wæs. Ða astigen hyo up on þanne rof ⁊þurh þa watelas hine mid þam bedde asende beforan þam halende.

²⁰ Ða he geseah heora geleafe. he cwæð. La man þe synd þine sinne forgefene.

²¹ Ða agunnen þencen þa bokeres ⁊farisei ⁊cwæðen. hwæt is þes þe her sprecd woffunga. hwa maig senna forgefen buton god ane.

²² Ða seo hælend gecneow heora geþances; he andsweriende cwæð to heom. Hwæt þence ge on eowre heorten

²³ hwæðer is eþere to cweðene þe synt þine senne forgefene; hwaðer to cweðene aris ⁊ga.

²⁴ þæt ge witen þæt mannes sune on eordan anweald hafð synne to forgefena. Ænd he sægde þam lamen. þe ich segge aris; nym þin bed ⁊ga on þin hus.

²⁵ ⁊he sone beforen heom aras; ⁊nam þæt he on læig ⁊to his huse eode ⁊god wuldrede.

²⁶ ⁊hyo ealle wundredon ⁊god mærsedon ⁊wæren mid eige gefylde ⁊cwæðen soðes we todaig wundre geseagen.

²⁷ Þa æfter þan he uteode ⁊geseah publicanum þe wæs oðer name leuj gehaten. æt cheapscamele sittende ⁊he cwæð to hym felge me.

²⁸ ⁊he hym þa felgede ⁊ealle hys þing forlet.

²⁹ Ænd leuj dyde him michele gebeorscipe on his huse ⁊þær wæs mycele manege manfulra ⁊oðre þe mid him sæton.

³⁰ Þa murcneden þa farisei ⁊þa bokeres ⁊cwæðen to his leorningcnihten. hwi æte ge ⁊drinkeð mid manfullen ⁊senfullen.

³¹ Ða andswerede se hælend ⁊cwæð to heom. Ne beþurfen læches þa þe hale synde. ac þa þe unhæle hæbbeð.

³² Ne com ich rihtwise to clepian. ac synfulle on deadbote.

³³ Ða cwæðen hyo to hym. hwi fæsted iohannes leorningcnihtes gelomlice ⁊halsunge doð ⁊eal swa fariseen ⁊þine æteð ⁊drinceð;

³⁴ Þa cwæð he. cwedst þu magen þas bredgumen bearn fæsten. swa lange swa se bredgume mid heom ys.

³⁵ Soðlice þa dages cumeð þanne se bredgume heom beoð aferred. þanne fæsted hyo on þan dagen.

³⁶ Ða sæde he heom an bispell. Ne asende nan man scyp on neowan reafe. on eald reaf elles þæt neowe slyt ⁊se neowe scyp ne helpd þan ealden.

³⁷ Ne nan man ne synt niwe win on ealde butta elles þæt neowa win breceð þa butta ⁊þæt win beoð agoten ⁊þa butta forwurðed.

³⁸ Ac neowe win is to asendenne on neowe butta þanne beoð þa butte gehealdenne.

³⁹ ⁊ne drincð nan man eald win ⁊wille sona þæt neowe he cweð þæt ealde is betere.