Luke 4 - Anglo-Saxon Wessex Gospels c1000 AD

¹ Soðlice se hælend wæs full halgen gaste ⁊ferde fram iordane. Se halend wæs fram halig gaste gelæd on sumen westene

Ductus est iesus in desertum á spiritu ut temptaretur a diabolo

² feortig dagen ⁊wæs fram deofol costnod ⁊he on þam dagen nan þing ne æt. And þam dagen gefylleden hine hingrede.

³ Þa cwæð se deofel hym to. gyf þu syo godes sunu. sæge þisen stanen þæt he to hlafe gewurðe.

⁴ Ða andswerede him se hælend. Hit ys awriten þæt se man ne leofeð be hlafe anen. ac of ælcen godes worde.

⁵ And þa lædde se deofel hyne ⁊atewede him ealle þa rice eorðe ymbhwyrftes on anre brihtan hwile.

⁶ ⁊to him cwæð. Ealne þisne anweald ic þe sylle ⁊heora wuldor for þan þe hy me synde gesealde ⁊ich hye sylle þan þe ich wille.

⁷ Witodlice ealle hyo beoð þine gif þu geeadmedest beforan me.

⁸ Ða andswerede him se halend. Hit is awriten. Drihten þinne god þu geeadmest ⁊hym ane þeowast.

⁹ Ða lædde he hyne on Ierusalem ⁊gesette hine ofer þas temples ricg ⁊hym to cwæð. Gyf þu syo godes sunu asend þe heonen nyder.

¹⁰ Soðlice hit ys awriten þæt he hys ænglen be þe bebeot þt hyo þe gehealden;

¹¹ ⁊þt hyo þe mid handen nymen þe læs þe þu þinne fot æt stane ætsperne.

¹² Ða cwæð se hælend him andsweriende. hyt is gecweðen ne costa þu drihten þinne god.

¹³ ⁊ealle þare costlinge gefylledera. se deofel hym sume hwile fram gewat.

¹⁴ Þa ferde se hælend on gastes mægne on galileam ⁊his hlise be him ferde on eall þæt riche.

¹⁵ ⁊he lærde be heora samnunge ⁊wæs fram eallen gemearsod.

¹⁶ Ða com he to nazareth. þær he afed wæs ⁊he eode on restedaige on þa gesamnenge æfter his gewunen ⁊he aras þt he rædde.

¹⁷ ⁊hym wæs geseald ysaias boc þas witegan ⁊sona swa he þa boc unfeld þa funde he þær awriten;

¹⁸ drihtnes gast is ofer me for þan he smerede me. He sende me þærfen bodian ⁊gehæften alysendnysse ⁊blinden gesihðe. forbrokene gehælen.

¹⁹ ⁊bodian drihtnes anfenge gear ⁊edleanes daig.

²⁰ And þa he þa boc befeold he hye þam þeigne sealde ⁊agef ⁊sæt ⁊ealre hire eagen on þare samnunge wæren on hine behealdende.

²¹ Ða ongan he heom to cwædene. Soðlice to daig ys þis writ on eowren earen gefylled.

²² ⁊hyo ealle wæren þis gecnawe ⁊wundredon be þam worden þe of hys muðe eode ⁊þus cwæðen. Nis þes Iosepes sune.

²³ Þa cwæð he. Witodlice ge seggeð me þas gelicnysse. eala leche gehæl þe sylfne. Do her on þinen earde swa fela wundre swa we gehyrden gedone on chapharnaum.

²⁴ Ða cwæð he. soðlice ic eow segge þæt nan witege nis andfenge on hys æðele.

²⁵ Soðlice ic eow segge manega wudewan wæren on helias dagon on israel. þa þa seo heofena wæs beloken þreo gear ⁊six monþas. Þa wæs geworðan mycel hunger on ealre eorðan

²⁶ ⁊to þare nanun næs helias asend. buton to anre wudewan on sarepta sydonie.

²⁷ And manega lichþrowæres wæron on israel under helyseo þam witegan; ⁊heore nan næs æclænsed butan naaman se scirescan.

²⁸ Þa wurðen hyo ealle on þare gesamnunge mid eorre gefylled. þas þing geherende.

²⁹ ænd hyo arison ⁊scufen hine of þare ceastre. ænd lædden hine ofer þas muntes cnæp ofer þane hyra burh getymbred wæs þæt hyo hine nyðer bescufan.

³⁰ þa ferde he þurh hyra midlen.

³¹ And he ferde to kapharnaum on galileisce ceastre ⁊he þær on ræstedaigen lærde.

³² ⁊hyo wundreden be his lare; for þan hys spræce on anwealde wæs.

³³ And on hire samnunge wæs sum man unclæne deofol hæbbende ⁊he hrymde michelere stefne

³⁴ ⁊cwæð. Læt la nazareisce hælend. hwæt is us ⁊þe come þu us to forspillene. ich wat þæt þu ert godes halga.

³⁵ And þa cydde hym se hælend and cwæd. Adumba ⁊ga hym of ⁊þa he ut adraf hine on hire midlene; ⁊he hym fram gewat. and hym naht ne derede.

³⁶ Ða wurðen hyo ealle forhte ⁊spraeken heom betweonen ⁊cwæðen hwæt is þæt word þæt he on mihte ⁊on mægne unclænen gaste bebeot ⁊hyo ut gað.

³⁷ Ða wæs hys hlise gewidmærsod on ælcere stowe þas rices.

³⁸ Soðlice he aras of here samnunga ⁊ferde on symones hus. Ða wæs simones sweger geswenched on mycelen feofren ⁊hyo hine for hire bæden.

³⁹ ⁊he standende ofer hyo þam feofre bebead ⁊he hyo forlet ⁊hyo sone aras ⁊hym þenede.

⁴⁰ Soðlice þa sunne asah ealle þe untrume wæren on mistlicen adlen hyo lædden him to ⁊he sindrigen his hand onsettende hyo gehelde.

⁴¹ Þa ferden þa deofle of manegen hremende ⁊cweðende. Sodes þu eart godes sune ⁊he ne geþafede þæt hye any þing spræcen. for þan he hyo wisten þæt he crist wæs.

⁴² Ða gewordenen daige se hælend utgangende ferde on westene stowe ⁊þa manega hine sohten ⁊hyo comen to hym ⁊behæfden hine; þæt he heom fram ne wite.

⁴³ Ða sægde he heom. Soðlice me geþafened oþren ceastren godes riche bodian. for þan to þan ich eom asend

⁴⁴ ⁊he wæs bodiende on galilea gesamnunge.