Luke 22 - Anglo-Saxon Wessex Gospels c1000 AD

¹ Þa soðlice geneahlacte freolsdaige azimorum se ys gecweðen eastre.

² ⁊þare sacerda ealdres ⁊þa bokeres smægdon hu hyo hine forspildon. Soðlice hyo adredden heom þt folc.

³ Ða eode sathanas on iudam se wæs oðre name scariot an of þam twelfen.

⁴ þa ferde he ⁊spræce mid þare sacerde ealdre mannen ⁊ðugede (sic) ealdren hu he hine heom sealde.

⁵ And hyo fagenedon ⁊hym weddeden feoh to syllene.

⁶ ⁊he behet ⁊he sohte hu he æðelicest hine beften þare manigeo gesealde.

⁷ Ða com se daig azimorum on þam hyo wolden heore eastren gewyrcan

⁸ ⁊he sende petre ⁊iohanne ⁊cwæð to heom. fared ⁊gearewiað us þt we ure eastren gewyrcen.

⁹ Ða cwæðen hyo. hwær wilt þu þæt we gearewien.

¹⁰ ⁊he cwæð to heom. Nu þanne ge on þa cestre gað; eow angen eornð an man mid wæterbuke. fylgieð hym on þt hus þe he ingað;

¹¹ ⁊seggeð þam hushlaforde. vre lareow þe segð. hwær ys cumena hus þær yc min eastren wyrce mid mjnen leorningcnihten.

¹² ⁊he eow betæcð mycele healle gedæfte gegarewiad þara.

¹³ Ða ferden hyo ⁊gemetten swa he heom saigde ⁊hyo gearewedon eastren.

¹⁴ Ænd þa time wæs he sett ⁊his twelf apostles mid hym.

¹⁵ ⁊he saigde heom. Of gewilnenge ic gewilnede mid eow æten þas eastren ær ich forðfare.

¹⁶ Ic eow segge þæt ic heonenforð ne eta. ær hyt syo on godes rice gefylled.

¹⁷ ænd onfeng calice ⁊þances dede ⁊cwæð. Onfoð ⁊dæled betweoxe eow.

¹⁸ Soðlice ic eow segge þt ich ne drinke of þises wingearde kynne ær godes rice cume.

¹⁹ And he onfeng hlaf ⁊þancode ⁊heom sealde ⁊cwæð. Þis ys myn lichame se is for eow geseald. doð þis on minen gemynde.

²⁰ Ænd swa eac þanne calic; syððen he geeten hafde ⁊cwæð. Þes calic is niwe cyðnis on minen blode se beoð for eow agoten.

²¹ Ðahhwædere her ys þes læwen hand mid me on myssan.

²² ⁊witodlice manne (sic) sune gæð æfter þam þe him forstihteð wæs. Ðeahhwæðere wa þam men þe he þurh geseald beoð.

²³ And hyo ongunnen betweox heom smægen hwilc of heom þt to donne wære.

²⁴ Ænd hyo fliten betweoxe heom hwilc heore wære yldest.

²⁵ Ða saide he heom kyninges wealded heore ðeode. And þa þe anweald ofer hyo hæbbeð synde fremfulle genemnede

²⁶ ac ne beo ge na swa. Ac gewurðe he swa swa gingre se ðe yldre ys betweox eow. And se forsteppend ys beo he swilce he þein syo.

²⁷ Hwæðer ys yldre se ðe ðenað þe se þe sytt. witodlice se þe sit. Ic eom on eowren midlene swa swa se þe þenað.

²⁸ Ge synden þe mid me þurhwunedan on minen geswinchen.

²⁹ ⁊ic eow dihte swa min fader me rice dihte.

³⁰ þt ge æten ⁊drincan ofer mine mysan on minen rice ⁊ge sitten ofer þrimsettel demende twelf mæðe israel.

³¹ Ða cwæð drihten. symon symon nu sathanas gyrnde þæt he eow riddrede swa swa hwæte.

³² Ic gebæd for þe þt þin geleafe ne geteorige. Ænd þu æt sume cyre gewend ⁊tryme þine broðre.

³³ Ða cwæð he drihten ic eom gære to farene mid þe ge on cwarterne ge on deað.

³⁴ Þa cwæð he. Ic segge þe petrus; ne cræwð se coc todaig ær þu me ætsecst þreowe.

³⁵ Þa cwæð he to heom. Ða ich eow sende buton seode ⁊codde ⁊gescy. wæs eow anig þing wane. Ða cwæðen hyo nan þing.

³⁶ Ða cwæð he. ac se þe hæfð seod gelice nyme codd ⁊se þe næfð sylle hys tunecan ⁊begge hym sweord.

³⁷ Soðlice ich segge eow þt gyot scel byon gefulled. þt be me awriten ys ⁊þt he mid rihtwisan geteald wæs. Witodlice þa þing þe be me synd hæbbeð ænde.

³⁸ ⁊hyo cwæðen. drihten her synde twa sword ⁊he quoth. þæt ys genoh.

³⁹ Ænd æfter gewunen he utgeode on þanne munt oliuarum. þt ys elebgerena (sic) ⁊his leorningcnihtes hym fylgdon.

⁴⁰ ⁊þa he com to þare stowe he sæde heom. ge byddað þt ge on costnenga ne gan.

⁴¹ And he wæs fram heom aloken swa mycel swa ys anes stanes werp ⁊gebeigden cneowen he hine gebæð.

⁴² ⁊cwæð. Fader gyf þu wilt; afyr þisne calic fram me þeahhwæðere ne gewurðe min wille ac þin.

⁴³ Ða tywde (sic) him godes ængel of heofene ⁊hine gestrangode.

⁴⁴ ⁊he wæs on gewinne ⁊hine lange gebæd ⁊his swat wæs swilce blodes dropen on eorðe eornende.

⁴⁵ ⁊þa he of gebede aras; ⁊com to hys leorningcnihten. he hyo funde slæpende for sarignesse.

⁴⁶ ⁊he saide heom; hwi slæpe ge; arisað ⁊biddað þæt ge on costnunge ne gan.

⁴⁷ Hym þa þa gyt swæccenden (sic). Þa com þt wered ⁊him toforen eode an of þam twelfen. se wæs genemned iudas ⁊he geneahlahte þam hælende þt he hine keste.

⁴⁸ Ða cwæð se hælend. judas. mannes sune þu mid cosse sylst.

⁴⁹ Ða geseagen þa þe hym abuton wæren. þæt þær toward wæs ⁊cwæðen. drihten sla we mid sweorde.

⁵⁰ Þa sloh heore an þare sacerda ealdres þeow ⁊his swiðre eare ofakarf.

⁵¹ Ða andswerede se hælend læted þus ⁊þa he ætran his eare he hit gehælde.

⁵² Þa cwæð se hælend to þam ealdormannen ⁊to þam witon ⁊to þas temples ealdren. Ge ferden to me swa swa to anen sceaðen. mid sweorden ⁊mid sæglen. þt ge me gefengen.

⁵³ Ða ich wæs daighwamlice mid eow on þam temple. ne aþeneden ge eower handa on me. ac þis ys eower tid ⁊þeostre anweald.

⁵⁴ Ða namen hyo hine ⁊lædden hyne to þare sacerde ealdres huse ⁊petrus felygede feorran.

⁵⁵ And petrus wæs mid heom on middan þam cafertune þær hyo æt þam fyre sæton.

⁵⁶ Ða hine geseah sum þinen æt leohte sittende ⁊hine beheold. þa cwæð hye ⁊þes wæs mid hym.

⁵⁷ Ða ætsoch he ⁊quoth. eale wif ne can ich hine.

⁵⁸ ⁊þa embe litel hine geseah oðer ⁊cwæð. þu ert of heom. Ða cwæð petrus. eale man ic ne eom.

⁵⁹ ⁊þa æfter litlen faece swilce anre tide sum oðer saigde ⁊cwæð. Soðlice þes wæs mid eom. witodlice he ys galileisc.

⁶⁰ Þa cwæð petrus. eala mann nat ich hwæt þu sægest. And þa hyo þæt spræken samnunga se coc creow.

⁶¹ Þa drihten bewende hine ⁊beseah to petre. Ða gemunede petrus drihtnes wordes þe he cwæð. þæt þu min ætsæcst þrewa todaig ær se coc crawe.

⁶² Ða eode petrus ut ⁊biterlice weop.

⁶³ ⁊þa þe þane hælend heolden hine bismeredon ⁊beoton.

⁶⁴ ⁊oferwrugen hys ansiene ⁊þurscen his nebb ⁊axoden hine ared wlych (sic) ys se þe þe smat.

⁶⁵ And manega oðre þing hyo hym to cwæðen. desigende.

⁶⁶ And þa þa daig wæs. þa togædere comen þas folces aldren ⁊þare sacerda ealdormenn ⁊bokeras ⁊lædden hine to heore gemote ⁊cwæðen.

⁶⁷ Sege us gyf þu syo crist. Ða cwæð he. Þeah ich eow segge; ge me ne lyfað.

⁶⁸ þeah ich eow axsie ge ne andsweriað me. ne ne forlæteð.

⁶⁹ Heonenforð byoð mannes sune sittende on godes mægnes swiðre healfe.

⁷⁰ Ða cwæðen hyo ealle ert þu godes sune; Ða cwæð he. ge seggeð þæt ich eom.

⁷¹ And hyo cwæðen. hwi georne we geot gewitnysse. we sylfe geherden of his muðe.