Luke 18 - Anglo-Saxon Wessex Gospels c1000 AD

Iudex quidam erat in ciuitate qui deum timuit nec hominem

¹ Þa saigde he heom sum byspell þæt hit is riht þæt man symle gebidden ⁊na geteorige.

² and þus cwæð. Sume dema wæs on sumer cestre. se god ne ondredde ne nenne man ne onþracode.

³ Ða wæs sum wudewa on þare cestre; þa com hyo to him ⁊cwæð. Wrec me wið minne wiðerwinne.

⁴ Þa nolde ne langere tide. Æfter þam þa quoth. he.

⁵ þeah ich god ne ondræde. ne ic man ne onþracige. þeah forþan þe þeos wudewe me is gram. ich wreke hyo. þelæs hyo æt nextan cume me beropende.

⁶ Þa cwæð drihten. gehyreð hwæt se unrihtwise deme cweeð (sic).

⁷ Soðlice ne deeð god his gecorenra wrace cleopiende to hym daiges ⁊nihtes; ⁊he ðeld on him hafð.

⁸ Ich eow segge þæt he raðe heore wræce deð. Þeahhwæðere wenst þu þanne mannes sune cymð. gemet he geleafen on eorðan.

⁹ Ða cwæð he to sumen þis byspell. þe on hyo selfe truweden ⁊oðrum forhugodon.

Duo homines ascendebant in templum ut orarent

¹⁰ Twegen men ferden to sume temple þt þt hyo; hyo gebæden. an sunderhalge ⁊an manfull.

¹¹ Ða stod se phariseus ⁊hine þus gebed. god þe ich þances do. forþan ich ne em swilche odre men. reaferes unrihtwise. unrihthameðes. oððe eac swylc þes manfulle.

¹² Ic faeste twige on wuca. ic gife teondunge ealles þas þe ich hæbbe.

¹³ Ða stod se manfulla feorran ⁊nolde forðan his eagen ahebben up to þam heofene. ac he beot his breost ⁊cwæð. God beo þu milde me senfulle.

¹⁴ Soðlice ich eow segge þæt þes ferde gerihtwised to his huse. forþan þe ælc þe hine upahefd beoð genyðered ⁊se þe hine nyðered byoð upahafen.

¹⁵ Ða brohten hyo cyldre to hym þæt he hyo ætrine. Ða his leorningcnihtes hyo geseagen hyo cydden heom.

¹⁶ Ða cleopede se hælend hyo to hym ⁊cwæð. Læteð þa litlinges to me cumen ⁊ne forbeode ge heo swylcere ys godes rice.

¹⁷ Soðlice ic eow segge swa hwilc swa ne onfegð godes rice swa swa cyld. ne gæð he on godes rice.

¹⁸ Ða axode hine sum aldor. godne lareow hwæt do ich þæt ich eche lyf hæbbe.

¹⁹ Ða cwæð se hælend hwi segest þu me godne. nis nan man god buten god ane.

²⁰ Canst þu þa bebode; ne ofsleh þu. ne fyrena þu. ne stell þu. ne leoh þu. wurðe þinne fader ⁊þine moder.

²¹ Ða cwæð he eal þis ic heold. of minre geogeðe.

²² Ða cwæð se hælend an þing þe is wane. syle eall þt þu hafst ⁊gyf eall þt þearfen. þanne hafst þu goldhord on heofene ⁊cum and folge me.

²³ Ða he þas word gehyrde he warð geunrot. forþam þe he wæs swiðe welig.

²⁴ Ða se hælend hine unrotne geseah he cwæð. Eale hu earfodlice gæð on godes rice þa þe feoh hæbbed.

²⁵ eðelicor mæg se olfend gan þurh anre nedle eage. þanne se welige on godes riche.

²⁶ Ða cwæðen þa þe þis gehyrden ⁊hwa mæg hal beon.

²⁷ þa saide he heom. Gode beoð mihtilice þa þing þe mannen synde unmihtilice.

²⁸ Þa cwæð petrus. Ealle þing we forleten ⁊folgedon þe.

²⁹ Ða cwæð he. Soðlice ic eow segge nis nan mann þe his hus forlæt. oððe mæges oððe broðre. oððe wif. oððe bearn; for godes rice.

³⁰ ðe ne onfoð michele mare on þisse tide ⁊ece lyf on towearde worelde.

Assumpsit iesus discipulos suos secreto ⁊ait illis. Ecce ascendimus

³¹ Þa nam se hælend his leorningcnihtes ⁊cwæð to heom. Fareð to ierusalem ⁊ealle þing beoð gefylde þe be mannes sune þurh witegene awritene synde.

³² He beoð þeoden geseald ⁊byoð bismereð ⁊geswungen ⁊onspætt.

³³ ⁊æfter þam þe hyo hine swingeð hyo hine ofslead ⁊he ðridde daige arist.

³⁴ ⁊hyo naht þas ongeatan ⁊heom wæs þis word behydd.

Cum appropinquaret iericho

³⁵ Þa he neahlahte jerico sum blind man sæt wið þane weig wædliende.

³⁶ ⁊þa he gehyrde þa manigeo farende. he axode hwæt þt wære.

³⁷ þa saigden hyo þæt þær ferde se nazarenisce hælend.

³⁸ Þa remde he ⁊cwæð. Eale hælend dauiðes sune gemiltsce me.

³⁹ ⁊þa þe forestopen hine þredden þæt he swugede. þas þe mære he clypede. Dauides sune gemiltse me.

⁴⁰ Ða stod se hælend ⁊het hine læden to him. Ða he nehlahte he axode hine.

⁴¹ hwæt wilt þu þæt ic þe do. Ða cwæð he. Drihten þt ich geseo.

⁴² Ða cwæð se hælend. geseoh. þin geleafe þe gehælde.

⁴³ ⁊he sone geseah ⁊hym fylgde. god wuldriende ⁊eall folc god lof sealde. þæt hyo þt geseawen.