Luke 1 - Anglo-Saxon Wessex Gospels c1000 AD

¹ Note: Nu we willeð her eow areccan lucas boc þas halgen godspelleres. for þan þe witodlice manega þohte þare þinge race geendeberden þe on us gefylde synde;

² swa us betahten þa þe hyt of fremðe gesægen ⁊þare spræce þeenæs wæren.

³ Me geþuhte geornlice eallen oð ændebyrdnysse writen þe þu seleste theophilus.

⁴ þt þu oncnawe þare worde sodfæstnysse of þam þe þu gelæred ært.

⁵ On herode dagen iudea cyninges wæs sum sacerd on namen zacharias of abian tune ⁊his wif wæs of aarones dohtren ⁊hire name wæs elisabeth.

⁶ Soðlice hyo wæren ba twa rihtwise beforen gode ⁊gangenden on eallen hys beboden ⁊rihtwisnesse. ba twa wrohte.

⁷ ⁊hyo nafden nan bearn. forðan elisabeth wæs unberende ⁊hyo on heore dagen baðe forðeoden.

⁸ Soðlice wæs geworðen þa zacharias hys sacerdhades brea. on his gewrixles endebyrdnysse before gode.

⁹ æfter gewunan. þara sacerdes hades hlotes he eode þæt he his offringe sette. Ða he on godes tempel eode

¹⁰ eall wered þas folkes wæs ute biddende on þare offrenge timen.

¹¹ Ða atewede hym drihtenes ængel standende on þas weofedes swiðren healfe.

¹² Þa warð zacharias gedrefed þæt geseonde ⁊him eige onreas.

¹³ Ða cwæð se ængel hym to. ne ondred þu þe zacharias. for þan þin bene is geherd ⁊þin wif elisabeth þe sune kenð ⁊þu nemnest hys name Iohannes

¹⁴ ⁊he byð þe to blisse ⁊manega on his akynnednysse gefageneð.

¹⁵ Soðlice he byð mære beforen drihtene ⁊he ne drincð win ne beor ⁊he beoð gefelleð mid halgen gaste; Þanne gyt of hys moder innoðe.

¹⁶ ⁊manege israele bearne he gechyrd to drihtene heore gode

¹⁷ ⁊he gæð toforen him on gaste ⁊on helias gemihte ⁊he fæderan heortan to heora bearnan gecyrre ⁊ungeleafulle. to rihtwise gleawscipe. drihtne fulfremed folc gegærewian.

¹⁸ Ða cwæð zacharias to þam engle. hwanan wat ich þis. Ic eom nu eald ⁊min wif on heora dagen forðeode.

¹⁹ Þa andswerede him se ængel. Ich eom gabriel se engel. ic þe stande beforen gode ⁊ich eom asend wið þe sprecen ⁊þe þis bodien.

²⁰ End nu abydst swigende ⁊þu spræken ne miht oð þanne dayg þe þas þing gewurðad. for þan þu mine worden ne lyfdest þa byð on heora timan gefylde.

²¹ And þæt folc wæs zachariam geabydende ⁊wundredon. þæt he on þæt temple gelæt wæs.

²² Ða he uteode ne mihte he heom to spræcen ⁊hyo oncneowen þæt he on þam temple sume gesihte geseah ⁊he wæs beacniende heom ⁊dumb þurhwunede.

²³ Þa wæs geworðen þa his þenunga dages gefylde wæren. he ferde to his huse.

²⁴ Soðlice æfter dagen elisabeth his wif geeacnode ⁊hy bedyglede hyo fif monðas ⁊cwæð.

²⁵ Soðlice me drihten gedyde þus on þam dagen þe he geseah mine hosp betwux mannen afyrran.

Missus est angelus gabriel á deo in ciuitatem galiléé

²⁶ Soðlice on þam syxten monðe wæs asend gabriel se engel fram drihtene on galilee cestre þare name wæs nazareth.

²⁷ to beweddedre femnen anen were þas name wæs ioseph of dauiðes huse ⁊þare femne name wæs mariam.

²⁸ Ða cwæð se ængel ingangende. Hal wæsse þu mid gyfe gefylled. drihten mid þe. Þu ert gebletsed on wifen.

²⁹ þa warð hyo on his spræce gedrefed ⁊þohte hwæt syo gretunge wære.

³⁰ Ða cwæð se ængel. ne ondræd þu þe Maria. Soðlice þu gyfe mid gode gemettest

³¹ soðlice nu þu on innoðe geeacnest ⁊sune censt ænd hys name hælend genemnest

³² ⁊se byoð mære ⁊þas heagestes sune genemned ⁊hym sylð drihten god his fæder dauides setll.

³³ ⁊he rixad on echnesse on Iacobes huse ⁊his riche ænde ne beoð.

³⁴ Þa cwæð maria to þam ængle hu gewurð þis for þan ich were ne oncnawe.

³⁵ Ða andswerede hyre se ængel. Se halge gast on þe bekymd ⁊þas heagestan mihte þe oferscædeð ⁊for þan þt halig þe of þe akenned byð; byð godes sune genemned.

³⁶ Ænd nu elisabeth þin mage sune on hire elde geechnede ⁊þes moneð is hire syxto sye is unberende genemned.

³⁷ forþy nis ælch word mid gode unmihtelic.

³⁸ Ða cwæð Maria. Her is drihtenes þinen. gewurðe me æfter þinen worde ⁊se ængel hire fram gewat.

Exurgens Maria abiit in montana cum festinatione

³⁹ Soðlice on þam dagen aras Maria ⁊ferde on muntlande mid efste. on iudeisse ceastre.

⁴⁰ ⁊eode into zacharias huse ⁊grette elisabeth.

⁴¹ Ða wæs geworðen. þa helisabeth geherde maRie gretinge. þa gefagene þæt chyld on hire innoðe. ænd þa warð elisabeth halgen gaste gefylled.

⁴² ænd hyo cleopede hludere stefne ⁊cwæð. Ðu ært betwux wifen gebledsed ⁊gebletsed ys þines innoðes wæstme.

⁴³ ⁊hwanen is me þis þæt mines drihtenes moder scolde to me cume.

⁴⁴ Sone swa þinre gretinge stefne on minan earen geworðan wæs. þa fagenede min chyld on minen innoðe.

⁴⁵ Ænd eadig þu ert þu þe gelyfdest þæt fulfremede sinde þa þing. þe þe fram drihtene gesaigde synde.

⁴⁶ Ða cwæð maria min saule mersed drihten.

⁴⁷ and min gast geblissode on gode minen hælende.

⁴⁸ For þam þe he geseah his þinene eadmodnysse. Soðlice henenforð me eadige seggeð ealle cneornesse.

⁴⁹ for þam þe me mychele þing dyde se þe mihtyg ys ⁊his name is halig

⁵⁰ ⁊hys mildheortnysse of cneornisse. on cneornesse hine ondrædende.

⁵¹ He worhte mægne on hys earme. he todælde þa ofermode. on moda heora heortan.

⁵² He warp þa rice of setlle ⁊þa eadmode he up anhof.

⁵³ Hyngriende he mid gode gefelde ⁊þa oformode ydele forlet.

⁵⁴ He afeng israel his cniht ⁊gemynde hys mildheortnysse.

⁵⁵ Swa he spræc to ure fæderen abrahame ⁊his sæde on a weorlde.

⁵⁶ Soðlice Marie wunede mid hire swylce þreo monðes; ⁊gewende þa to hire huse.

⁵⁷ Ða wæs afelled elisabethe kenningtyd ⁊hyo sune kende.

⁵⁸ ænd hire nehcheburas ⁊hyre cuðan þæt geherden þæt drihten hys mildheortnysse mid hire mærsede ⁊hyo mid hire blisseden.

⁵⁹ Þa on þam ehtode daige hyo comon þæt chyld to embscniðen ⁊nemden hine his fæder name zachariam.

⁶⁰ Þa andswerede his moder nese soðes. ac he beoð Iohan genemned.

⁶¹ Ða cwæðen hyo to hire. nis nan on þinre mægðe þisse name genemned.

⁶² Ða cwæðen hyo to his fæder. hwæt he wolde hine genemned beon.

⁶³ þa wrat he gebeðenen wexbrede Iohannes ys hys name. Ða wundredon hyo ealle.

⁶⁴ Ða warð sona hys muð ⁊hys tunge geopened ⁊he spræc drihten bletsiende.

⁶⁵ Ða warð eige geworden ofer ealle heora nehchegeburas ⁊ofer ealle iudea muntland wæren þas worð wiðmærsede.

⁶⁶ ⁊ealle þa þe hyt gehyrdon on heore heorten setten ⁊cwæðen. Wenst þu hwæt beoð þes cnapa; witoðlice drihtnes hand wæs mid hym.

⁶⁷ Ænd zacharias hys fæder wæs mid halgen gaste gefylled ⁊he witogode ⁊cwæð.

⁶⁸ Gebletseð syo drihten israele god; for þan þe he geneosede ⁊hys folces alysendnysse dyde.

⁶⁹ Ænd he us hæle horn arærde on dauides huse. hys cnihtes.

⁷⁰ Swa he spræc þurh hys halgene witegene muð. Ða þe of weorldes fremðe spræken.

⁷¹ ⁊he alesde us of uren feonden ⁊of ealre þare handen þe us hateden.

⁷² Mildheortnysse to werchen mid ure fæderen ⁊gemunen hys halgen kyðnesse.

⁷³ hyne us to sellene þanne að þe he uren fader abrahame swor.

⁷⁴ þæt we buton eyge of ure feondon handen alesde hym þeowian.

⁷⁵ on halignesse beforan hym eallen ure dagen.

⁷⁶ ⁊þu cnapa gæst ⁊beost þas heageste witega genemned. Ðu gæst beforan drihtnes ansiene hys wegas gearewian.

⁷⁷ To syllene hys folce his halge gewit on hira synna forgefenyssa.

⁷⁸ Ðurh innoðes ures godes mildheortnyssa. on þam he us neosede. of eastdæle upspringende.

⁷⁹ onlihtan þam þe on þeostrum ⁊on deaðes scade sitteð. ure fet to gereccenne on sibbe weig.

⁸⁰ Soðlice se cnape weox ⁊wæs on gaste gestræncþed ⁊wæs on westene oð þanne dayg his atewednysse on israel.