John 9 - Anglo-Saxon Wessex Gospels c1000 AD

¹ Ða se hælend for; þa geseah he ænne man. þe wæs blind geboren.

² ⁊hys leorningcnihtes hyne axoden and cwæðen. Lareow. hwæt synegede þes. Oððe his mages þæt he were blind geboren.

³ Se hælend andswerede; ⁊cwæð. ne synegede he ne hys magas. ac þæt godes weorc wære geswutolod on hym.

⁴ Me gebereð to wercen þas weorc þe me sende þa hwile þe hyt daig ys. nyht cymð þonne nan man wyrcan ne mayg.

⁵ Ic eom middaneardes leoht. þa hwile þe ic on middanearde eom.

⁶ Ða he þas þing sægde. þa spette he on ða eorðen ⁊worhte fenn of hys spatle ænd smerede mid þa fenne ofer hys eagen.

⁷ ⁊cwæð to hym. Ga ⁊þweag þe on syloes mere. he for ⁊þweah hyne ⁊com gesond.

⁸ Witodlice hys neahgeburas ⁊þa þe hyne geseagen þa he weadle wæs; cwæðen. hu nys þis se. þe sæt ⁊wædlede.

⁹ Sume cwæðen he hyt ys. Sume cwæðen nese; ac ys him gelich. he cwæð soðlice ic hyt eom.

¹⁰ Ða cwæðen hyo to hym. Hwu wæron þine eagen geopenedo. (sic)

¹¹ He andswerede ⁊cwæð. Se mann þe ys genemned hælend worhte fen ⁊smerede mine eagen ⁊cwæð to me. ga to syloes mere ænd þweah þe ⁊ic eode ⁊þwoh me ⁊geseah.

¹² Ða cwæðon hy to hym. hwær ys he. þa cwæð he; ic nat.

¹³ Hyo læddon to þam farisean þonne þe þær blind wæs.

¹⁴ Hyt wæs restedaig; þa se hælend worhte þæt fenn ⁊hys eagen untynde.

¹⁵ Eft þa farisei hyne axoden. hu he gesawe. he cwæð to heom. He dyde fenn ofer mine eagen ⁊ic þwoh ⁊ic gesyo.

¹⁶ Sume þa farisei cwæðen. nis þes mann of gode; þe restedaig ne healt. Sume cwæðon. hwu maig synful mann þæs taken wercann ⁊hyo fliten heom betweon.

¹⁷ Hyo cwæðen eft; to þam blindan. Hwæt segst þu be þam þe þine eagen untynde. he cwæð. he ys wytega.

¹⁸ Ne gelyfde þa iudeas be hym. þæt he blind wære ⁊gesawe; ær þam þe hy clypedon hys mæges. þe gesæwen

¹⁹ ænd axodon hyo ⁊cwæðon. Is þis eower sune þe ge segged þæt blind wære akenned. humæte gesehð he nu.

²⁰ Hys magas heom andsweredon ⁊cwæðen. we witen þæt þes ys ure sunu ⁊þæt he wæs blind akenned.

²¹ we nyten humæte he nu gesyhð. ne hwa hys eagen untynde. Axiað hyne sylfne. ylde he hæfð spreke for hyne sylfne.

²² Hys mages spræken þas þing forþam þe hyo ondreddan þa iudeas. Ða gedihton þa iudeas gyf hwa crist andette þæt he wære buton heore ferredene.

²³ Forþam cwæðen hys mages. he hafð ylde axioð hyne sylfe.

²⁴ Ða cleopedon hyo eft þanne mann þe ær blind wæs ⁊cwæðon to hym. Seige godes wuldor we wyten þæt he ys synful.

²⁵ ⁊he cwæð gyf he synfull ys þæt ich nat. an þing ic wat. þæt ich blind wæs ⁊þæt ic nu gesyo.

²⁶ Ða cwæðen hyo to hym; hwæt dyde he þe. hu untende he þine eagen.

²⁷ He andswerede heom ⁊cwæð. Ich saigde eow ær ⁊gyt segge ⁊ge gehyrdon. hwy wille ge hit eft geheran. cweðe ge. wille ge beon hys leorningcnihtas;

²⁸ Ða wæregeden hye hyne ⁊cwæðen. Syo þu hys leorningcniht. we sende moyses leorningcnihtas.

²⁹ We witon þæt god spræc wið moysese. nyton we hwanon þes ys.

³⁰ Se mann andswerede ⁊cwæð to heom. þæt is wunderlich þæt ge nyton hwanon he ys ⁊he untynde mine eagen.

³¹ we witon soðlice þæt god ne geherð synfulle. Ac gyf hwa ys gode gecoren ⁊hys willan wercð. þane he geherð.

³² Ne herde we næfre on worlde þæt anyg untynde þas eagen þe wære blind geboren.

³³ Ne myhte he þas þing don gyf he nære of gode.

³⁴ Hyo andsweredon ænd cwæðen to hym. Eall þu ert on sinnen geboren ⁊þu lærst us ⁊hyo drifen hyne ut.

³⁵ Ða se hælend gehyrde þæt hyo hine drifen ut. Þa cwæð he to hym. þa he hine gemette. Gelefst þu on godes sunu.

³⁶ He andswerede ⁊cwæð. Hwilc is drihten þt ich on hine gelyfe.

³⁷ And se hælend cwæð to hym. Þu hyne seage ænd se þe wið þe spræc se hyt ys.

³⁸ Þa cwæð he. drihten ic gelefe ⁊he fell nyðer ⁊geeadmedede hine.

³⁹ ⁊se hælend cwæð. to hym. Ic com on þisne middenearde to demenne. þæt þa sculon geseon; þe ne seoð ⁊beon blinde þa þe geseoð.

⁴⁰ Ða þet gehyrdon þa farisei þe mid hym wæron. Ða cwæðen hyo to hym. Cwæðst þu synt we blinde.

⁴¹ se hælend cwæð to heom. gyf ge blinde wæron nafde ge nane sinne. Nu ge seggeð þæt þæt ge geseon. þæt ys eowre synn.