John 2 - Anglo-Saxon Wessex Gospels c1000 AD

Nuptie facte sunt in chana galilee

¹ On þam þriddan daige wæren gyfte ge gewordene (sic) on chana galilee. ænd þas halendes moder wæs þær.

² Soðlice se halend ænd hys leorningcnihtes wæren gelaðode to þam gyftan.

³ ⁊þa þæt win getrukede þa cwæð þas hælendes moder to hym hyo nabbeð win.

⁴ Þa cwæð se halend to hire. la wif. hwæt ys me ⁊þe; gyt min time ne com.

⁵ Ða cwæð þas halendes moder to þam þenum; doð swa hwæt swa he eow segge.

⁶ Ðær wæren soðlice aset syx stenene waterfate. æfter iudea geclensunge. ælc wæs on twere sestra gemette. oððe on þreora.

⁷ Ða bead se halend þæt hyo þa fate mid watere gefyldon ⁊hyo gefelden þa odð (sic) þanne brerd.

⁸ Ða cwæð se halend. hladeð nu ⁊berað þare drihte ealdre ⁊hy naman.

⁹ Ða se drihte ealder þæs wines onbyrgde. þe of þam wætere geworðan wæs; he nyste hwanen hyt com. þa þenas soðlice wisten þe þæt water hloden. Se drihte ealdor clipende (sic) þanne bridgumen

¹⁰ ⁊cwæð to hym; ælc man sylð ærest god win ⁊þonne hyo drunkene beoð. þæt þe wyrse beoð. Ðu þe geheolde þæt gode win oð þys.

¹¹ Ðis wæs þæt forme taken þe se halend worhte on chana agalilee ⁊gesutelode his wuldor ⁊hys leorningcnihtes gelyfdon on hine.

¹² Æfter þisen he and hys moder ⁊hys gebroðra ⁊hys leorningcnihtes foron to capharnaum ⁊wuneden þær feawan dagen.

¹³ Ænd hyt wæs neah iudea eastron ⁊se halend for to ierusalem

¹⁴ ⁊gemette on þam temple þa þe sealdan oxan ⁊scep ænd culfran ⁊sittende meneteres.

¹⁵ ⁊he worhte swipan of strengen ⁊hyo ealle of þam temple adraf ge sceap. ge oxan ⁊he ageat þare menetera feoh ⁊towarp heoræ mysan.

¹⁶ ⁊sægde þam þe þa culfran cypton doð þas þyng henon. ne wyrce ge mines fæder hus to mangunhuse.

¹⁷ Ða gemundon hys leorningcnihtes þæt ðe awriten is. þines huses ande me ett.

¹⁸ Ða answeredon hym þa iudeas ⁊cwæðen. hwilc taken atewest þu us for þam þe þu þas þing dest.

¹⁹ Se halend heom andswerede ⁊cwæð. toweorpeð þis tempel ⁊ic hyt arere binnen þreom dagum.

²⁰ Ða iudeas cwæðen to hym. þis tempel wæs getymbred on six ⁊feortigon wintren ⁊arerst þu hit on ðrim dagum.

²¹ Soðlice he hyt cwæð be hys lichamen temple.

²² Ða he of deaðe aras; þa gemundon hys leorningcnihtes þæt he hyt be hym selfum cwæð. Ænd hyo gelyfdon halegum write ⁊þare spræce þe se halend spræc.

²³ Ða he wæs on ierusalem on eastron on freolsdaige. manege gelyfdon on hys naman. þa hyo geseawan ða tacne þe he worhtu (sic).

²⁴ Se halend ne geswutelode hyne sylfne heom. forþam he cuþe hyo ealle.

²⁵ ⁊forþam hym næs nan þearf þt aning (sic) man sæde witnysse be men. he wiste witodlice hwæt wæs on men.