Yesaia 27 - Twerɛ Kronkron

Aman akɛseɛ no asebrɛ

¹ Ɛda no na AWURADE de n’afena denden a ɛso na ɛyɛ den no bɛtwe dɛnkyɛmmirampɔn a ɔyɛ ɔwɔ a ne ho yɛ herɛ, dɛnkyɛmmirampɔn a ɔyɛ ɔwɔ a ɔpompono no aso, na wakum ɛpo mu ɔtweaseɛ kɛseɛ no.

² Ɛda no, monto bobe turo fɛfɛ no ho dwom:

³ Me, AWURADE, na mehwɛ so, megu so nsuo berɛ nyinaa mu; mehwɛ no awia ne anadwo, na hwee ammɛyɛ no.

⁴ Abohuro biara nni me mu; sɛ mehunu nkasɛɛ ne nwerɛ ɛ, anka mede ɔko bɛwura mu makɔhye ne nyinaa.

⁵ Agye sɛ wɔdwane bɛtoa me, na wɔne me di asomdwoeɛsɛm, asomdwoeɛsɛm na ma wɔne me nnie.

⁶ Nna a ɛbɛba no mu Yakob bɛgye nhini, na Israel afefɛ agu nhyerɛne, na wɔde aba ahyɛ wiase ani mama.

⁷ Wahwe wɔn sɛdeɛ ɔhwee wɔn ahwefoɔ no, anaasɛ wɔaku wɔn sɛdeɛ wɔkumm wɔn akumfoɔ no?

⁸ Wɔn bɔne na wosusuu so ne wɔn diiɛ, sɛ, ɔde mframa a ano yɛ den huu na wokaa no kɔeɛ apueeɛ mframa da no.

⁹ Enti, yei na wɔde bɛkata Yakob amumuyɛ soɔ, na yi a wɔreyi ne bɔne akorɔ no so aba nyinaa nie: Sɛ ɔbɛma afɔrebukyia aboɔ no nyinaa ayɛ sɛ akaadoo ntoantoa a afurofuro, na Asera nnua ne owia adum nsisi hɔ bio.

¹⁰ Na kuro a ɛyɛ den no ada mpan ayɛ tenabea a wɔato no sraha na wɔagya no sɛ ɛserɛ soɔ; ɛhɔ na anantwie mma didie, na ɛhɔ na wɔbutubutu wie ne mman no weɛ.

¹¹ Sɛ ne mmaboa no dwan a, wɔbubu, mmaa bɛpɛ kɔsɔ gya; na wɔyɛ ɔman a wɔnni nhunumu, enti wɔn yɛfoɔ no yam nhyehye no mma wɔn, na deɛ ɔnwonoo wɔn no nhu wɔn mmɔbɔ.

¹² Ɛda no ɛbɛba sɛ AWURADE bɛpore n’aba afiri Asuo Eufrate no hweamo ano akɔsi Misraim subɔn no ano, na wɔatase mo, Israel mma, mmaako mmaako.

¹³ Na da no, wɔbɛhyɛn totorobɛnto kɛseɛ, na wɔn a wɔyeraa Asiria asase soɔ, ne wɔn a wɔsumm wɔn kɔɔ Misraim asase soɔ no aba, na wɔabɛsɔre AWURADE, bepɔ kronkron no so wɔ Yerusalem.