Nnwom 86 - Twerɛ Kronkron

Ahohia kɛseɛ mu mpaebɔ

Dawid mpaebɔ.

¹ AWURADE, brɛ w’aso ase tie me, na meyɛ mmɔborɔni ne ohiani.

² Hwɛ me kra so, na meyɛ ɔhotefoɔ; wo, me Nyankopɔn, gye w’abɔfra a ɔde ne ho twere woɔ.

³ O AWURADE, hu me mmɔbɔ, na wo na mesu mefrɛ wo da mu nyinaa.

⁴ Ma w’akoa kra ani nnye, na wo, AWURADE, na mema me kra so mema.

⁵ Na wo, AWURADE, woyɛ, na wode kyɛ, na w’adɔeɛ dɔɔso ma wɔn a wɔfrɛ woɔ nyinaa.

⁶ AWURADE, yɛ aso ma me mpaebɔ, na tie me nkotosrɛ nne.

⁷ M’ahohia da mu mɛfrɛ wo, na wobɛgye me so.

⁸ Obiara nte sɛ wo, anyame mu, AWURADE, na biribiara nte sɛ wo nnwuma.

⁹ Amanaman a woyɛeɛ nyinaa bɛba abɛkoto w’anim, AWURADE, na wɔabɛhyɛ wo din animuonyam.

¹⁰ Na woyɛ kɛseɛ, na woyɛ anwanwadeɛ, wo nkutoo ne Onyankopɔn.

¹¹ AWURADE, kyerɛ me wo kwan, mɛnante wo nokorɛ mu; ka m’akoma bom ma no nsuro wo din.

¹² O AWURADE, me Nyankopɔn, mede m’akoma nyinaa bɛda wo ase, na mahyɛ wo din animuonyam daa,

¹³ sɛ w’adɔeɛ so wɔ me soɔ, na woayi me kra afiri Asamando bunu mu.

¹⁴ Onyankopɔn, ahantanfoɔ asɔre atia me, na atirimuɔdenfoɔ asafo rehwehwɛ me kra, na wɔamfa wo ansi wɔn ani so.

¹⁵ Na wo, AWURADE, woyɛ Onyankopɔn mmɔborɔhunufoɔ ne ɔdomfoɔ, wo boasetɔ kyɛ, na w’adɔeɛ ne wo nokorɛ dɔɔso.

¹⁶ Dane w’ani kyerɛ me, na dom me, fa w’ahoɔden ma w’akoa, na gye w’afenaa ba nkwa.

¹⁷ Yɛ me ho nsɛnkyerɛnneɛ ma no nsi me yie, na m’atamfoɔ nhunu, na wɔn ani nwu, sɛ wo, AWURADE, woaboa me akyekyere me werɛ.