Nnwom 38 - Twerɛ Kronkron

Amanehunu mu ahonu dwom

Dawid dwom a wɔde bɔ nkaeɛ afɔdeɛ.

¹ Ao, AWURADE, ntwi m’anim w’abufuo mu, na ntwe m’aso w’anibereɛ mu;

² na w’agyan awowɔ me aka mu, na wo nsa aduru me so.

³ W’abufuhyeɛ nti ahoɔden bi nni me honam mu, me bɔne nti nkwahosan bi nni me nnompe mu;

⁴ na me mfomsoɔ aboro me tiri so, ɛdɛn me so sɛ adesoa duruduro.

⁵ M’akuro bɔn na aporɔ m’agyimisɛm nti.

⁶ Mapompono na mapua koraa, da mu nyinaa mede awerɛhoɔ menam foofoo.

⁷ Na ahyehyekuro ayɛ m’asene mu ma, na ahoɔden bi nni me honam mu;

⁸ mahodwo na mabubu pasaa, m’akoma apinisie nti mesu denden.

⁹ AWURADE, deɛ mepɛ nyinaa da w’anim, na m’apenepene nhunta wo.

¹⁰ M’akoma bɔ paripari, m’ahoɔden atu, na m’aniwa hann mpo nni me ho bio.

¹¹ M’adɔfo ne me nnamfo afiri me haw no ho akɔgyina nkyɛn, na m’abusuafoɔ gyinagyina akyirikyiri.

¹² Na wɔn a wɔhwehwɛ me kra no asum me mfidie, na wɔn a wɔpɛ me bɔne no ka me sɛeɛ ho asɛm, na wɔdwene nnaadaasɛm da mu nyinaa.

¹³ Na me deɛ, mete sɛ ɔsotifoɔ a ɔnte asɛm, na mete sɛ emum a ɔmmue n’ano.

¹⁴ Na mayɛ sɛ onipa a ɔnte asɛm na n’anomu nni ntuatuaano.

¹⁵ Na wo, AWURADE, na m’ani da wo soɔ, AWURADE, me Nyankopɔn, wobɛbua.

¹⁶ Na mese: Mma wɔn ani nnnye wɔ me ho, na sɛ me nan watiri a, wɔanhoahoa wɔn ho wɔ me so.

¹⁷ Na mereyɛ mahwe ase, na me yea wɔ m’anim daa.

¹⁸ Na meka me mfomsoɔ, me bɔne nti me werɛ aho.

¹⁹ Na m’atamfoɔ ho yɛ wɛwɛwɛ, wɔn ho yɛ den, na wɔn a wɔtane me kwa no dɔɔso.

²⁰ Na wɔde bɔne tua papa so ka, papa a medi akyire nti wɔpɛ me ho asɛm.

²¹ AWURADE, nnya me, me Nyankopɔn, mma wo ne me ntam nnware.

²² Yɛ ntɛm bɛboa me, AWURADE, m’agyenkwa!