Nnwom 33 - Twerɛ Kronkron

Wiase sodie ho dwom

¹ Ateneneefoɔ, momfa anigyeɛ nhuro AWURADE mu, ɛsɛ wɔn a wɔtene no sɛ wɔyi no ayɛ.

² Momfa sankuo nna AWURADE ase, momfa sankuo a ɛso homa du nto no dwom!

³ Monto dwom foforɔ mma no, mommɔ sankuo yie nka ɛnne ho!

⁴ Na AWURADE asɛm tene, na ne nnwuma nyinaa wɔ nokorɛ mu.

⁵ Ɔdɔ asɛntenenee ne atemmuo, AWURADE adɔeɛ ahyɛ asase so ma.

⁶ AWURADE de n’asɛm na ɛyɛɛ ɔsoro, na ɔde n’anomu honhom yɛɛ emu asafo nyinaa.

⁷ Ɔka ɛpo nsuo boa ano kuo, ɔde ebunu sie deɛ ɛhɔ dɔ.

⁸ Ma asase nyinaa sofoɔ nsuro AWURADE, wɔn a wɔte wiase nyinaa mfɛre no;

⁹ na ɔno na ɔka a, ɛba mu, ɔno na ɔhyɛ a, ɛgyina hɔ.

¹⁰ AWURADE ma amanaman agyina dane hunu, ɔma aman adwene yɛ ɔkwa.

¹¹ AWURADE agyina deɛ, ɛgyina hɔ daa, n’akomam adwene wɔ hɔ ma awoɔ ntoatoasoɔ nyinaa.

¹² Nhyira ne nkurɔfoɔ a wɔn Nyankopɔn ne AWURADE, ne ɔman a wayi wɔn de ayɛ ɔno ara n’apɛgyadeɛ.

¹³ AWURADE firi soro hwɛ, ɔhunu nnipa mma nyinaa.

¹⁴ Ɔte ne tenaberɛ na ɔhwɛ asase sotefoɔ nyinaa.

¹⁵ Ɔno na ɔnwono wɔn nyinaa akoma, ɔhu wɔn nnwuma nyinaa mu.

¹⁶ Ɔhene biara mfa ɛdɔm dodoɔ nni nkonim, ɔbrane mfa ahoɔden kɛseɛ nnye ne ho.

¹⁷ Nkwagyeɛ mu, ɔpɔnkɔ yɛ ade hunu na wɔmfa n’ahoɔden dodoɔ nnye onipa.

¹⁸ Hwɛ, AWURADE ani wɔ wɔn a wɔsuro no so, ɛwɔ wɔn a wɔn ani da n’adɔeɛ soɔ no so,

¹⁹ sɛ ɔbɛgye wɔn kra afiri owuo mu, na wama wɔanya nkwa ɛkɔm mu.

²⁰ Yɛn kra twɛn AWURADE, yɛn boafoɔ ne yɛn kyɛm ne no.

²¹ Na ne mu na yɛn akoma bɛtɔ yɛn yam, ɛfiri sɛ yɛde yɛn ho ato ne din kronkron so.

²² AWURADE, ma w’adɔeɛ ntena yɛn so, sɛdeɛ yɛn ani da wo soɔ no.