Hiob 17 - Twerɛ Kronkron

¹ M’ahome asa, me nna ahi, damena na ɛwɔ hɔ ma me.

² Ampa ara ahiyifoɔ na wɔne me wɔ hɔ, na m’ani tua wɔn ntɔkwapɛ.

³ Si awowa ɛ, di me agyinamu wo ara w’anim. Hwan na ɔbɛgyina m’akyire?

⁴ Na wode nimdeɛ ahunta wɔn akoma, enti woremma wɔn so.

⁵ Deɛ ɔpa ne nnamfo de nya kyɛfa bie no, ne mma bɛhwere saa kyɛfa no.

⁶ Na ɔde me ayɛ aman akasabebuo, na wɔahinam m’ani so ntasuo.

⁷ M’awerɛhoɔ nti m’ani so asi, na me ho ade nyinaa ayɛ sɛ sunsum.

⁸ Teefoɔ ho dwiri wɔn yei ho, na deɛ ɔdi bem no bo huru ɔkɔnkɔnsani.

⁹ Nanso ɔteneneeni bɛkura ne kwan mu, na deɛ ne nsa ho teɛ no bɛkɔ so anya ahoɔden.

¹⁰ Na mo nyinaa, monsane mmra ɛ! Nanso merenhunu mo mu nyansafoɔ biara.

¹¹ Me nna atwam, wɔatwitwa m’atirimpɔ mu, m’akoma adeɛ a ɛpɛ no mu.

¹² Wɔde anadwo yɛ awia; wɔse: Hann bɛn deɛ esum wɔ.

¹³ Sɛ mede Asamando yɛ me fie, na meto me mpa esum mu,

¹⁴ na mese Amena sɛ: M’agya ne wo, ne mmoaa sɛ: Me na ne me nuabaa ne mo, a,

¹⁵ na afei, ɛhe na m’anidasoɔ wɔ? Na deɛ m’ani da soɔ no, hwan na ɔbɛhunu?

¹⁶ Ɛbɛsiane akɔ Asamando adaban mu berɛ a yɛn nyinaa home wɔ mfuturo mu.