Hesekiel 29 - Twerɛ Kronkron

Misraim sɛeɛ

¹ Afe a ɛtɔ so du no, bosome a ɛtɔ so du no da a ɛtɔ so dummienu no, AWURADE asɛm baa me nkyɛn sɛ:

² Onipa ba, dane w’ani kyerɛ Misraimhene Farao, na hyɛ nkɔm tia no ne Misraim nyinaa;

³ kasa na ka sɛ: Sɛ AWURADE Nyankopɔn seɛ nie: Hwɛ, me ne wo anya, Misraimhene Farao, asuboa kɛseɛ a ɔda n’asubɔnten mu a ɔka sɛ: M’Asubɔnten Nil wɔ me, me ara na meyɛ mefaeɛ.

⁴ Na mede nkɔtɔkorɔ bɛwura w’afono mu, na mama w’asubɔnten mu mpataa afemfam w’abena ho, na matwe wo afiri w’asubɔnten mu aba, wo ne w’asubɔnten mu mpataa a ɛfemfam w’abena ho no nyinaa.

⁵ Na mɛto wo atwene ɛserɛ so, wo ne w’asubɔnten mu mpataa nyinaa. Ɛserɛ petee so na wobɛtɔ, wɔrentase wo, na wɔremmoa wo ano; asase so mmoa ne ewiem nnomaa na mede wo bɛyɛ wɔn aduane.

⁶ Na Misraimfoɔ nyinaa bɛhunu sɛ mene AWURADE. Ɛsiane sɛ wɔyɛ nkyɛnkyɛmma poma ma Israel fie,

⁷ wɔsɔ wo nsa mu a, wobuka suane wɔn mmati nyinaa, na wɔtwere wo a, wobu ma wɔn sisi nyinaa hinhim.

⁸ Ɛno nti sɛ AWURADE Nyankopɔn seɛ nie: Hwɛ, mede nkrantɛ mereba wo so, na matwitwa wo mu nnipa ne mmoa,

⁹ na Misraim asase adane afo, na ɛso ada mpan, na wɔahunu sɛ mene AWURADE. Ɛsiane sɛ woka sɛ: Asubɔntene Nil no wɔ me, na me ara na meyɛeɛ.

¹⁰ Enti, hwɛ, me ne wo ne w’asutene ahodoɔ no anya, na mɛyɛ Misraim asase no afoafo, amamfo ne ahodwirideɛ, afiri Siene abantenten ho akɔsi Etiopia hyeɛ so tɔnn.

¹¹ Onipa nan remfa so na aboa nan rensi so, na wɔrentena so mfirinhyia aduanan.

¹² Na mɛyɛ Misraim asase pasaa, nsase a ayɛ pasaa mu, na ne nkuro ada mpan wɔ nkuro afoafo mu, mfirinhyia aduanan, na mɛbɔ Misraim apete amanaman mu, na mapansam wɔn agu nsase so.

¹³ Na sɛ AWURADE Nyankopɔn seɛ nie: Mfirinhyia aduanan akyiri no, mɛboa Misraim ano afiri aman a mabɔ wɔn apete hɔ no mu,

¹⁴ na mede Misraim nnommum no asane aba, na mede wɔn aba Patros asase so bio, wɔn asase a wɔfiri soɔ no so, na wɔayɛ ahennie a abrɛ aseɛ wɔ hɔ.

¹⁵ Ɛbɛyɛ ahennie mu deɛ abrɛ aseɛ, na ɛremma ne ho so bio wɔ amanaman so. Na mɛma wɔasua, na wɔanni amanaman so bio.

¹⁶ Na Israel fie remfa wɔn ho nto wɔn so bio, sɛ wɔkae wɔn bɔne a ɛne sɛ wɔhwehwɛɛ mmoa firii wɔn hɔ no. Na wɔahunu sɛ mene AWURADE Nyankopɔn.

Babel bɛfom Misraim afa

¹⁷ Na afe a ɛtɔ so aduonu nson no, bosome a ɛdi kan no da a ɛdi kan no, AWURADE asɛm baa me nkyɛn sɛ:

¹⁸ Onipa ba, Babelhene Nebukadnessar maa ne dɔm ko tiaa Tiro. Ɛyɛɛ ɔko kɛseɛ a na ɔhaw ne brɛ pii wɔ mu, nanso akatua biara amfiri Tiro ammɛka ɔno ne ne dɔm nsa, som a ɔsomeeɛ no ho.

¹⁹ Enti sɛ AWURADE Nyankopɔn seɛ nie: Hwɛ, mede Misraim asase merema Babelhene Nebukadnessar, na wasoa n’asafo yuu akɔ, na wafa n’asadeɛ, na wafom n’afomfadeɛ afa, na ayɛ ne dɔm no akatua;

²⁰ n’apaadeɛ a ɔsom ho no ano na mede Misraim asase bɛma no, sɛ n’apaadeɛ a ɔsomm ho, ɛfiri sɛ wɔyɛ maa me, AWURADE Nyankopɔn asɛm nie.

²¹ Ɛda no na mɛma abɛn bi afifiri ama Israel fie, na wo na mɛma wo kwan na woabue w’ano wɔ wɔn mu, na wɔahunu sɛ mene AWURADE.