Daniel He 13 - Twerɛ Kronkron

Susana ne Daniel atemmuo

¹ Na ɔbarima bi te Babel a wɔfrɛ no Yoakim.

² Ɔwaree Hilkia babaa a wɔfrɛ no Susana, ɔbaa hoɔfɛni a ɔsuro Awurade.

³ N’awofoɔ yɛ nnipa a wɔtene, na wɔatete wɔn babaa no wɔ Mose mmara kwan so.

⁴ Na Yoakim yɛ ɔdefoɔ, a ɔwɔ turo fɛfɛ bi a ɛtoa ne fie so; na Yudafoɔ taa ba ne nkyɛn ɛfiri sɛ, ɔno ne deɛ wɔbu no kɛseɛ wɔ wɔn nyinaa mu.

⁵ Saa afe no mu, wɔyii mpanimfoɔ mmienu firii ɔman no mu sɛ atemmufoɔ. Ɛfa wɔn ho deɛ, na Awurade aka sɛ: Amumuyɛ firi Babel na ɛbaeɛ, ɛfiri mpanimfoɔ a wɔyɛ atemmufoɔ no hɔ, wɔn a ɛsɛ sɛ wɔbu ɔman no.

⁶ Na saa mmarima yi taa kɔ Yoakim fie, ne wɔn a wɔwɔ amansosɛm ba wɔn hɔ.

⁷ Sɛ ɛduru owigyinaeɛ na sɛ nkurɔfoɔ no kɔ a, Susana taa tu mpasa wɔ ne kunu turom hɔ.

⁸ Da biara na mpanimfoɔ mmienu yi taa hwɛ no sɛ ɔredi akɔneaba, na wɔn kɔn firii aseɛ dɔɔ no.

⁹ Wɔhyɛɛ wɔn adwene so na wɔdanee wɔn ani firii Ɔsoro hwɛ anaasɛ wɔrekae asodie a wɔwɔ sɛ wɔbɛbu atɛn no so.

¹⁰ Susana ho akɔnnɔ bunkam faa wɔn baanu so, nanso wɔn mu biara anka ne haw ankyerɛ ne yɔnko,

¹¹ ɛfiri sɛ na ɛyɛ aniwuo ma wɔn sɛ wɔbɛka akɔnnɔ a wɔanya sɛ wɔpɛ no no.

¹² Da biara, na wɔde ahoperɛ hwɛ no.

¹³ Da koro bi wɔka kyerɛɛ wɔn ho sɛ: Ma yɛnkɔ fie, ɛfiri sɛ ɛberɛ a wɔde didi awia aso. Saa nti wɔn baanu firii hɔ na wɔdii mpaepae mu.

¹⁴ Nanso wɔsanee wɔn akyi no, wɔbɛhyiaa mu bio; na ɛberɛ a wɔn nyinaa hyehyɛɛ wɔn ho bisaa deɛ nti wɔyɛɛ saa no, wɔkekaa wɔn akɔnnɔ kyerɛɛ wɔn ho. Afei wɔhyɛɛ berɛ bi a wɔde bɛhu ɔno nko ara.

Mpanimfoɔ no hwɛ sɛ wɔdaadaa Susana

¹⁵ Da bi a na wɔrehwehwɛ anya berɛ a ɛsɛ no, ɔhyɛnee hɔ sɛdeɛ wayɛ pɛn no a mmaawa mmienu ka ne ho, na ɔpɛ sɛ ɔdware wɔ turo mu hɔ, ɛfiri sɛ na awia no abɔ dendeenden.

¹⁶ Na obiara nni hɔ ka mpanimfoɔ mmienu a wɔakɔhunta na wɔrehwɛ no no ho.

¹⁷ Ɔka kyerɛɛ ne mmaawa no sɛ: Momfa ngo ne ngo hwamhwam, na monto turom hɔ apono no mu na mentumi nnware.

¹⁸ Wɔyɛɛ sɛdeɛ Susana ka kyerɛɛ wɔn no. Wɔtotoo turom hɔ apono no mu na wɔkɔɔ nkyɛnmu apono no ho kɔfaa deɛ wahyɛ wɔn no; wɔanhunu mpanimfoɔ no, ɛfiri sɛ na wɔanhunta.

¹⁹ Ɛberɛ a mmaawa no firii adie no, mpanimfoɔ mmienu no sɔre kɔɔ ne so.

²⁰ Wɔkaa sɛ: Hwɛ, wɔatoto turom apono no mu, na obiara renhunu yɛn. Wo ho akɔnnɔ ahyɛ yɛn ma; enti pene so na wo ne yɛn nna.

²¹ Sɛ woampene so a, yɛbɛdi adanseɛ atia wo sɛ na aberanteɛ ka wo ho, na ɛno nti na womaa wo mmaawa no kɔeɛ.

²² Susana sii apene kaa sɛ: Fidie ayi me. Ɛfiri sɛ, sɛ meyɛ yei a, ɛyɛ owuo ma me; na sɛ manyɛ nso a, merentumi nnwane mfiri mo nsam.

²³ Mɛpɛ sɛ menyɛ; mɛwu wɔ mo nsam sene sɛ mɛyɛ bɔne wɔ Awurade ani so.

²⁴ Afei Susana de nne kɛseɛ teaam, na mpanimfoɔ mmienu no teateaam guu ne so.

²⁵ Na wɔn mu baako tuu mmirika kɔbuee turo no mu apono no.

²⁶ Na ɛberɛ a nnipa a wɔwɔ efie hɔ tee nteateam wɔ turom hɔ no, wɔtuu mmirika faa nkyɛnmu pono no mu hɔ kɔhwɛɛ deɛ ayɛ no.

²⁷ Na ɛberɛ a mpanimfoɔ no bɔɔ wɔn nkuro no, ɛyɛɛ asomfoɔ no aniwu kɛseɛ, ɛfiri sɛ na wɔntee asɛm a ɛte saa a ɛfa Susana ho pɛn.

Mpanimfoɔ no di adanseɛ tia Susana

²⁸ Adeɛ kyeeɛ no, ɛberɛ a nkurɔfoɔ twa hyiaa wɔ ne kunu Yoakim fie no, mpanimfoɔ mmienu no baeɛ a amumuyɛ pɔ ahyɛ wɔn mu ma, a wɔde repɛ Susana wuo. Nnipa no anim na wɔkaa sɛ:

²⁹ Monsoma nkɔfrɛ Hilkia babaa Susana a ɔyɛ Yoakim yere no mmra.

³⁰ Saa nti wɔsoma kɔfrɛɛ no. Na ɔne n’awofoɔ, ne mma, ne n’abusuafoɔ baeɛ.

³¹ Na Susana yɛ ɔbaa a wapɔ kɛse na ne ho yɛ fɛ wɔ nnipa ani so.

³² Na ɛberɛ a na ɔde nkatanim akata n’anim no, nnipa bɔnefoɔ no hyɛɛ no sɛ ɔnyi nkatanim no, sɛdeɛ ɛbɛyɛ na wɔatumi abɔ wɔn ani akɔnhoma wɔ n’ahoɔfɛ ho.

³³ Na wɔn a na wɔka Susana ho ne wɔn a wɔhunuu no no nyinaa na wɔresu.

³⁴ Afei mpanimfoɔ mmienu no gyinaa nkurɔfoɔ no anim de wɔn nsa guu ɔbaa no tiri so.

³⁵ Ɔde nisuo hwɛɛ Ɔsoro, ɛfiri sɛ na n’akoma da Awurade so.

³⁶ Mpanimfoɔ no kaa sɛ: Ɛberɛ a na yɛretu mpasa wɔ turom hɔ no, saa ɔbaa yi ne mmaawa mmienu baa hɔ, totoo turom apono no mu na ɔgyaa mmaawa no kwan.

³⁷ Afei aberanteɛ bi a na wahunta hɔ firi baa ne nkyɛn ne no bɛdae.

³⁸ Na yɛhyɛ turom hɔ mantwea baabi na yɛhunuu saa amumuyɛ yi na yɛtuu mmirika kɔɔ wɔn so.

³⁹ Ɛwom sɛ yɛhunuu sɛ wɔreyɛ atuu deɛ, nanso yɛantumi ansɔ ɔbarima no mu, ɛfiri sɛ na ne ho yɛ den sene yɛn, na ɔbuee apono no dwanee.

⁴⁰ Mmom yɛbɔɔ mmɔden kyeree ɔbaa yi na yɛbisaa no nipa ko a ɔbarima no yɛ,

⁴¹ nanso wanka ankyerɛ yɛn. Nnoɔma yi na yɛdedi adanseɛ. Ɛsiane sɛ wɔyɛ mpanimfoɔ ne atemmufoɔ ma nkurɔfoɔ no nti, badwa no gyee wɔn dii na wɔbuu ɔbaa no kumfɔ.

⁴² Ɛnna afei Susana de nne kɛseɛ teaam kaa sɛ: O mmerɛ santen Nyankopɔn, wonim kokoa mu nnoɔma, na wonim nnoɔma nyinaa ansa na aba;

⁴³ wonim sɛ mmarima yi adi adansekurumu atia me. Na seesei ɛsɛ sɛ mewu, nso menyɛɛ amumuyɛ nnoɔma a wɔaka ato me so no mu baako mpo!

⁴⁴ Na Awurade tiee ne su.

⁴⁵ Na ɛberɛ a wɔrekɔku no no, Onyankopɔn kanyanee honhom kronkron wɔ aberantewaa bi a wɔfrɛ Daniel mu,

⁴⁶ na ɔde nne kɛseɛ teaam sɛ: Menhia kyɛfa biara wɔ saa ɔbaa yi mogya a moreka agu yi ho!

Daniel gye Susana

⁴⁷ Nnipa no nyinaa danee wɔn ani hwɛɛ no bisaa sɛ: Asɛm bɛn na woreka yi?

⁴⁸ Daniel gyinaa wɔn mu kaa sɛ: O Israelfoɔ, adɛn na moyɛ nkwaseafoɔ saa, sɛ mobua Israel babaa fɔ wɔ berɛ a monhwehwɛ nhunuu asɛm no mu nokorɛ?

⁴⁹ Monsan nni asɛm no bio, ɛfiri sɛ saa mmarima yi adi adansekurumu atia ɔbaa yi.

⁵⁰ Yei nti nnipa no nyinaa sann wɔn akyi. Na mpanimfoɔ nkaeɛ no ka kyerɛɛ no sɛ: Bra bɛtena yɛn mu na ka kyerɛ yɛn, ɛfiri sɛ Onyankopɔn ama wo mpanimfoɔ gyinabea.

⁵¹ Daniel ka kyerɛɛ wɔn sɛ: Montete wɔn ntam ma ɛnware, na mɛhwehwɛ wɔn mu.

⁵² Ɛberɛ a wɔtetee wɔn mu no, ɔfrɛɛ wɔn mu baako ka kyerɛɛ no sɛ: Wo akɔkoraa omumuyɛni, bɔne a wayɛ no nna a atwam no aba awieeɛ,

⁵³ moabu ntɛnkyea, moabu deɛ ɔnni fɔ no fɔ wɔ berɛ a moagyae deɛ ɔdi fɔ no a mpo Awurade aka sɛ: Mmu onipa a ɔdi bem no fɔ, na nkum ɔteneneeni.

⁵⁴ Seesei ara deɛ, sɛ wose wohunuu ɔbaa yi ampa a, ka kyerɛ me: Dua bɛn ase na wohunuu wɔn sɛ wɔrefa wɔn ho? Ɔbuaa sɛ: Ɛyɛ aman dua ase.

⁵⁵ Daniel kaa sɛ: Ɛyɛ paa! Saa ntorɔ yi de owuo bɛbrɛ wo, ɛfiri sɛ Onyankopɔn bɔfoɔ anya asɛm afiri Onyankopɔn nkyɛn na ntɛm pa ara ɔbɛtwa wo mu mmienu.

⁵⁶ Afei ɔde no kɔɔ baabi, na ɔhyɛɛ sɛ wɔmfa ɔbaako no mmra. Na ɔka kyerɛɛ no sɛ: Wo Kanaan aseni a wonyɛ Yuda aseni, ahoɔfɛ adaadaa wo na akɔnnɔ adane w’akoma.

⁵⁷ Saa kwan yi so na wode Israel mmammaa afa soɔ, na wɔnam suro so ne mo adeda; nanso Yuda babaa mpene mo amumuyɛ so.

⁵⁸ Afei ka kyerɛ me: Dua bɛn ase na wokyeree wɔn sɛ wɔrefa wɔn ho? Ɔbuaa sɛ: Ɛyɛ odum kɛseɛ bi ase.

⁵⁹ Daniel ka kyerɛɛ no sɛ: Ɛyɛ paa! Saa ntorɔ yi de owuo bɛbrɛ wo, ɛfiri sɛ Onyankopɔn bɔfoɔ de n’afena retwɛn sɛ ɔbɛtwa wo mu mmienu, na wasɛe mo baanu.

⁶⁰ Afei abadwafoɔ no nyinaa teaam kɛseɛ hyiraa Onyankopɔn, ɔno a ɔgye wɔn a wɔn ani da ne soɔ no.

⁶¹ Na wɔsii agyinaeɛ tiaa mpanimfoɔ mmienu no, ɛfiri sɛ Daniel nam wɔn anom asɛm so ahunu wɔn sɛ wɔadi adansekurumu; na wɔyɛɛ wɔn sɛdeɛ anka mpanimfoɔ mmienu no atirimpɔ bɔne a ɛfa wɔn yɔnko ho no teɛ.

⁶² Wɔkumm wɔn sɛdeɛ Mose mmara no kyerɛ no. Saa nti wɔgyaa mogya a ɛdi bem no da no.

⁶³ Hilkia ne ne yere yii Onyankopɔn ayɛ maa wɔn babaa Susana, na saa ara na ne kunu Yoakim ne n’abusuafoɔ, ɛfiri sɛ wɔhunuu Susana sɛ ɔdi bem wɔ aniwudeɛ ho.

⁶⁴ Na ɛfiri saa da no rekɔ Daniel nyaa anidie kɛseɛ wɔ nnipa no mu.