4 Mose 26 - Twerɛ Kronkron

Wɔkan Israelfoɔ

¹ Na ɔhaw no akyiri no, AWURADE ka kyerɛɛ Mose ne Ɔsɔfoɔ Aaron ba Eleasa sɛ:

² Monkan Israelfoɔ asafo no nyinaa dodoɔ mfiri deɛ wadi mfirinhyia aduonu soɔ mfa nkɔ, sɛ wɔn mpanimfie teɛ, Israel mu nnipa a wɔtumi kɔ sa nyinaa.

³ Na Mose ne Ɔsɔfoɔ Eleasa ka kyerɛɛ wɔn, Moab mpaperɛ so, Yordan fa a ɛbɛn Yeriko sɛ:

⁴ Kan wɔn a wɔadi mfirinhyia aduonu de rekorɔ no, sɛdeɛ AWURADE hyɛɛ Mose ne Israelfoɔ a wɔfiri Misraim asase so baeɛ no.

⁵ Israel abakan ne Ruben: Ruben mma ne: Hanok, Hanokfoɔ abusua; Palu deɛ, Palufoɔ abusua;

⁶ Hesron deɛ, Hesronfoɔ abusua; Karmi deɛ, Karmifoɔ abusua.

⁷ Yeinom ne Rubenfoɔ mmusua, na wɔn nnipa a wɔkan wɔn no yɛ mpem aduanan mmiɛnsa ne ahanson aduasa.

⁸ Na Palu mma: Eliab.

⁹ Na Eliab ba: Nemuel ne Datan ne Abiram. Yeinom ne Datan ne Abiram a wɔfrɛɛ wɔn firii asafo no mu no a wɔne Mose ne Aaron hameeɛ, Kora asafo no mu, wɔn ham a wɔne AWURADE hameeɛ no mu;

¹⁰ na asase buee n’anomu menee wɔn ne Kora, na asafo no wuwuiɛ, na ogya hyee mmarima ahanu aduonum no, na wɔbɛyɛɛ nsɛnkyerɛnneɛ no.

¹¹ Nanso Kora mma deɛ, wɔanwuwu.

¹² Simeon mma, sɛdeɛ wɔn mmusua teɛ: Nemuel deɛ, Nemuelfoɔ abusua; Yamin deɛ, Yaminfoɔ abusua; Yakin deɛ, Yakinfoɔ abusua;

¹³ Sera deɛ, Serafoɔ abusua; Saulo deɛ, Saulfoɔ abusua.

¹⁴ Yeinom ne Simeonfoɔ mmusua; wɔyɛ mpem aduonu mmienu ne ahanu.

¹⁵ Gad mma, sɛdeɛ wɔn mmusua teɛ: Sefon deɛ, Sefonfoɔ abusua; Hagi deɛ, Hagifoɔ abusua; Suni deɛ, Sunifoɔ abusua;

¹⁶ Osni deɛ, Osnifoɔ abusua; Eri deɛ, Erifoɔ abusua;

¹⁷ Arod deɛ, Arodfoɔ abusua; Areli deɛ, Arelifoɔ abusua.

¹⁸ Yeinom ne Gad mma mmusua, sɛdeɛ wɔn a wɔkan wɔn no teɛ, mpem aduanan ne ahanum.

¹⁹ Yuda mma: Er ne Onan; na Er ne Onan wuwuu Kanaan asase so.

²⁰ Na Yuda mma, sɛdeɛ wɔn mmusua teɛ nie: Sela deɛ, Selafoɔ abusua; Peres deɛ, Peresfoɔ abusua; Sera deɛ, Serafoɔ abusua.

²¹ Na Peres mma nie: Hesron deɛ, Hesronfoɔ abusua; Hamul deɛ, Hamulfoɔ abusua.

²² Yeinom ne Yuda mmusua, sɛdeɛ wɔn a wɔkan wɔn no teɛ, mpem aduɔson nsia ne ahanum.

²³ Isakar mma, sɛ wɔn mmusua teɛ: Tola deɛ, Tolafoɔ abusua; Puwa deɛ, Puwafoɔ abusua;

²⁴ Yasub deɛ, Yasubfoɔ abusua; Simron deɛ, Simronfoɔ abusua.

²⁵ Yeinom ne Isakar mmusua, sɛdeɛ wɔn a wɔkan wɔn no teɛ, mpem aduosia nnan ne ahasa.

²⁶ Sebulon mma, sɛdeɛ wɔn mmusua teɛ: Sered deɛ, Seredfoɔ abusua; Elon deɛ, Elonfoɔ abusua; Yakleel deɛ, Yakleelfoɔ abusua.

²⁷ Yeinom ne Sebulon mmusua, sɛdeɛ wɔn a wɔkan wɔn no teɛ, mpem aduosia ne ahanum.

²⁸ Yosef mma, sɛdeɛ wɔn mmusua teɛ: Manase ne Efraim.

²⁹ Manase mma: Makir deɛ, Makirfoɔ abusua; na Makir woo Gilead; Gilead deɛ, Gileadfoɔ abusua.

³⁰ Gilead mma nie: Yeser, Yeserfoɔ abusua; Helek deɛ, Helekfoɔ abusua;

³¹ ne Asriel, Asrielfoɔ abusua; ne Sekem, Sekemfoɔ abusua;

³² ne Semida, Semidafoɔ abusua; ne Hefer, Heferfoɔ abusua;

³³ na Hefer ba Selofehad nni mmammarima, na ɔwɔ mma mmaa; na Selofehad mmammaa din ne Mahla ne Noa, Hogla, Milka ne Tirsa.

³⁴ Yeinom ne Manase mmusua, na wɔn a wɔkan wɔn no yɛ mpem aduonum mmienu ne ahanson.

³⁵ Efraim mma, sɛdeɛ wɔn mmusua teɛ nie: Sutela deɛ, Sutelafoɔ abusua; Beker deɛ, Bekerfoɔ abusua; Tahan deɛ, Tahanfoɔ abusua.

³⁶ Na Sutela mma nie: Eran deɛ, Eranfoɔ abusua.

³⁷ Yeinom ne Efraim mma mmusua, sɛdeɛ wɔn a wɔkan wɔn no teɛ, mpem aduasa mmienu ne ahanum. Yeinom ne Yosef mma, sɛdeɛ wɔn mmusua teɛ.

³⁸ Benyamin mma, sɛdeɛ wɔn mmusua teɛ: Bela deɛ, Belafoɔ abusua; Asbel deɛ, Asbelfoɔ abusua; Ahiram deɛ, Ahiramfoɔ abusua;

³⁹ Sufam deɛ, Sufamfoɔ abusua; Hufam deɛ, Hufamfoɔ abusua.

⁴⁰ Na Bela mma ne: Ard ne Naaman: Ard deɛ, Ardfoɔ abusua; Naaman deɛ, Naamanfoɔ abusua.

⁴¹ Yeinom ne Benyamin mma, sɛdeɛ wɔn mmusua teɛ; na wɔn a wɔkan wɔn no yɛ mpem aduanan nnum ne ahansia.

⁴² Dan mma, sɛdeɛ wɔn mmusua teɛ nie: Suham deɛ, Suhamfoɔ abusua. Yeinom ne Dan mmusua, sɛdeɛ wɔn mmusua teɛ.

⁴³ Suhamfoɔ mmusua nyinaa sɛdeɛ wɔn a wɔkan wɔn no teɛ yɛ mpem aduosia nnan ne ahanan.

⁴⁴ Aser mma, sɛdeɛ wɔn mmusua teɛ: Yimna deɛ, Yimnafoɔ abusua; Isui deɛ, Isuifoɔ abusua; Beria deɛ, Beriafoɔ abusua;

⁴⁵ Beria mma deɛ: Heber deɛ, Heberfoɔ abusua; Malkiel deɛ, Malkielfoɔ abusua.

⁴⁶ Na Aser babaa din de Sara.

⁴⁷ Yeinom ne Aser mma mmusua, sɛdeɛ wɔn a wɔkan wɔn no teɛ; mpem aduonum mmiɛnsa ne ahanan.

⁴⁸ Naftali mma, sɛdeɛ wɔn mmusua teɛ: Yakseel deɛ, Yakseelfoɔ abusua; Guni deɛ, Gunifoɔ abusua;

⁴⁹ Yeser deɛ, Yeserfoɔ abusua; Silem deɛ, Silemfoɔ abusua.

⁵⁰ Yeinom ne Naftali mmusua, sɛdeɛ wɔn mmusua teɛ; na wɔn a wɔkan wɔn no yɛ mpem aduanan nnum ne ahanan.

⁵¹ Yeinom ne Israelfoɔ a wɔkan wɔn no, ɔpehansia ne baako ne ahanson aduasa.

Asase no kyɛ ho nhyehyɛɛ

⁵² Na AWURADE kasa kyerɛɛ Mose sɛ:

⁵³ Yeinom na wɔnkyɛ asase no mma wɔn na wɔnni soɔ, sɛdeɛ wɔn din dodoɔ teɛ.

⁵⁴ Abusuakuo a ɛso no, ma ne kyɛfa nso, na deɛ ɛsua no, ma ne kyɛfa nsua; sɛdeɛ obiara nnipa a wɔkan wɔn no ano teɛ, na wɔmma no n’agyapadeɛ.

⁵⁵ Nanso tonto so na wɔmfa nkyɛ asase no; na wɔnnye wɔn kyɛfa no sɛdeɛ wɔn nananom mmusua no din teɛ.

⁵⁶ Tonto so na wɔmfa nkyɛ agyapadeɛ mma wɔn a wɔdɔɔso ne wɔn a wɔsua.

Lewifoɔ mmusua

⁵⁷ Na Lewifoɔ a wɔkan wɔn sɛdeɛ wɔn mmusua teɛ nie: Gerson deɛ, Gersonfoɔ abusua; Kohat deɛ, Kohatfoɔ abusua; Merari deɛ, Merarifoɔ abusua.

⁵⁸ Yeinom ne Lewifoɔ mmusua: Libnifoɔ abusua, Hebronfoɔ abusua, Mahlifoɔ abusua, Musifoɔ abusua, Korafoɔ abusua. Na Kohat woo Amram.

⁵⁹ Na Amram yere din ne Yokebed, Lewi ba a wɔwoo no Misraim no; na ɔwoo Aaron ne Mose ne wɔn nuabaa Miriam maa Amram.

⁶⁰ Na Aaron nso, wɔwoo Nadab ne Abihu, Eleasa ne Itamar maa no;

⁶¹ nanso Nadab ne Abihu de anana gya bi baa AWURADE anim no, wɔwuwui.

⁶² Na wɔn nnipa a wɔkan wɔn no yɛ mpem aduonu mmiɛnsa, mmarima a wɔadi bosome ne akyire nyinaa; na wɔankan wɔn amfra Israelfoɔ, na wɔamma wɔn agyapadeɛ Israelfoɔ mu.

Kaleb ne Yosua nko na wɔda so te aseɛ

⁶³ Yeinom ne wɔn a Mose ne Ɔsɔfoɔ Eleasa kan wɔn, kan a wɔkan Israelfoɔ Moab mpaperɛ soɔ Yordan fa a ɛbɛn Yeriko no mu no.

⁶⁴ Nso na ɔbarima biara mfra yeinom mu a ɔfiri nnipa a Mose ne Ɔsɔfoɔ Aaron kan wɔn berɛ a wɔkan Israelfoɔ wɔ Sinai serɛ soɔ no,

⁶⁵ ɛfiri sɛ AWURADE aka akyerɛ wɔn sɛ wuo na wɔbɛwuwu serɛ soɔ, na wɔn mu biara anka, gye Yefune ba Kaleb ne Nun ba Yosua nko.