Yosua 21 - New Revised Asante Twi Bible

Lewifoɔ nkuro

¹ Na Lewifoɔ agyanom atitire baa Ɔsɔfoɔ Eleasa ne Nun ba Yosua ne Israelfoɔ mmusuakuo agyanom atitire nkyɛn,

² na wɔka kyerɛɛ wɔn Silo, Kanaan asase so sɛ: AWURADE nam Mose so hyɛɛ sɛ wɔmma yɛn nkuro ntena mu ne ɛho mmoa adidibea nsase mma yɛn mmoa.

³ Na Israelfoɔ nam AWURADE anomu asɛm so de wɔn agyapadeɛ mu nkuro yi ne ɛho mmoa adidibea nsase maa Lewifoɔ.

⁴ Na ntonto no ba maa Kohatfoɔ mmusua, na Ɔsɔfoɔ Aaron mma a wɔfiri Lewifoɔ mu no nam tonto so nyaa Yuda abusuakuo ne Simeon abusuakuo ne Benyamin abusuakuo mu nkuro dummiɛnsa.

⁵ Na Kohatfoɔ a wɔkaeɛ no nam ntonto so nyaa Efraim abusuakuo mmusua ne Dan abusuakuo ne Manase abusuakuo fa no mu nkuro du.

⁶ Na Gersonfoɔ no nam ntonto so nyaa Isakar abusuakuo mmusua ne Aser abusuakuo ne Naftali abusuakuo ne Manase abusuakuo fa a ɛwɔ Basan no mu nkuro dummiɛnsa.

⁷ Merari mma sɛdeɛ wɔn mmusua teɛ no, wɔnyaa Ruben abusuakuo ne Gad abusuakuo ne Sebulon abusuakuo mu nkuro dummienu.

⁸ Na Israelfoɔ no nam ntonto so de nkuro yi ne ɛho mmoa adidibea nsase maa Lewifoɔ no, sɛdeɛ AWURADE nam Mose nsa so hyɛeɛ no.

⁹ Na wɔde Yudafoɔ abusuakuo ne Simeonfoɔ abusuakuo mu nkuro a wɔbɛbobɔ din yi mae.

¹⁰ Na ɛba maa Aaron mma a wɔfiri Kohatfoɔ mmusua mu, Lewifoɔ no mu no, ɛfiri sɛ wɔn deɛ ne ntonto a ɛdi kan no.

¹¹ Na wɔde Kiriat-arba, (Anak agya Arba) ne kuro a ɛne Hebron a ɛwɔ Yuda bepɔ soɔ ne ɛho mmoa adidibea nsase a ɛtwa ho hyia no maa wɔn.

¹² Na kuro no ho mfofowa ne nkuraa no deɛ, wɔde maa Yefune ba Kaleb agyapadeɛ.

¹³ Na Ɔsɔfoɔ Aaron mma no, wɔde nnipakumfoɔ dwanekɔbea kuro Hebron ne ɛho mmoa adidibea nsase maa wɔn ne Libna ne ɛho mmoa adidibea nsase,

¹⁴ ne Yatir ne ɛho mmoa adidibea nsase ne Estemoa ne ɛho asase,

¹⁵ ne Holon ne ɛho asase ne Debir ne ɛho asase,

¹⁶ ne Ain ne ɛho asase, ne Yuta ne ɛho asase, ne Bet-semes ne ɛho asase: Mmusuakuo mmienu yi mu nkuro nkron.

¹⁷ Na Benyamin abusuakuo mu deɛ, wɔde Gibeon ne ɛho mmoa adidibea nsase, ne Geba ne ɛho asase,

¹⁸ ne Anatot ne ɛho asase, ne Almon ne ɛho asase mae: Nkuro nnan.

¹⁹ Aaron mma asɔfoɔ no nkuro nyinaa yɛ nkuro dummiɛnsa ne ɛho mmoa adidibea nsase.

²⁰ Na Kehat mma Lewifoɔ no, Kehat mma nkaeɛ no mmusua no, wɔn ntonto nkuro firii Efraim abusuakuo mu.

²¹ Wɔde nnipakumfoɔ dwanekɔbea kuro Sekem ne ɛho mmoa adidibea nsase maa wɔn, Efraim bepɔ so, ne Geser ne ɛho mmoa adidibea nsase,

²² ne Kibsaim ne ɛho asase ne Bet-horon ne ɛho asase: Nkuro nnan;

²³ ne Dan abusuakuo mu Elteke ne ɛho mmoa adidibea nsase, Gibeton ne ɛho asase,

²⁴ Ayalon ne ɛho asase ne Gat-rimon ne ɛho asase: Nkuro nnan;

²⁵ ne Manase abusuakuo fa no mu, Taanak ne ɛho mmoa adidibea nsase ne Gat-rimon ne ɛho asase: Nkuro mmienu.

²⁶ Nkuro a ɛyɛɛ Kehat mma nkaeɛ no mmusua no deɛ nyinaa yɛ nkuro du ne ɛho mmoa adidibea nsase.

²⁷ Na Gerson mma a wɔfiri Lewifoɔ mmusua no mu no, wɔmaa wɔn Manase abusuakuo fa no mu nnipakumfoɔ dwanekɔbea kuro Golan wɔ Basan ne ɛho mmoa adidibea nsase ne Beestra ne ɛho asase: Nkuro mmienu;

²⁸ ne Isakar abusuakuo mu, Kision ne ɛho mmoa adidibea nsase, Daberat ne ɛho asase,

²⁹ Yarmut ne ɛho asase, En-ganim ne ɛho asase: Nkuro nnan,

³⁰ ne Aser abusuakuo mu: Misal ne ɛho mmoa adidibea nsase, Abdon ne ɛho asase,

³¹ Helkat ne ɛho asase, ne Rehob ne ɛho asase: Nkuro nnan;

³² ne Naftali abusuakuo mu: Nnipakumfoɔ dwanekɔbea kuro Kedes a ɛwɔ Galilea ne ɛho mmoa adidibea nsase, ne Hamot-dor ne ɛho asase, ne Kartan ne ɛho asase: Nkuro mmiɛnsa.

³³ Gersonfoɔ nkuro nyinaa, sɛ wɔn mmusua teɛ no, ɛyɛ nkuro dummiɛnsa ne ɛho mmoa adidibea nsase.

³⁴ Merari mma, Lewifoɔ nkaeɛ no mmusua no, wɔmaa wɔn Sebulon abusuakuo mu: Yokneam ne ɛho mmoa adidibea nsase, Karta ne ɛho asase,

³⁵ Dimna ne ɛho asase, ne Nahalal ne ɛho asase: Nkuro nnan;

³⁶ ne Ruben abusuakuo mu: Beser ne ɛho mmoa adidibea nsase, Yahas ne ɛho asase,

³⁷ Kedemot ne ɛho asase, Mefaat ne ɛho asase: Nkuro nnan;

³⁸ ne Gad abusuakuo mu: Nnipakumfoɔ dwanekɔbea kuro Ramot a ɛwɔ Gilead ne ɛho mmoa adidibea nsase, Mahanaim ne ɛho asase,

³⁹ Hesbon ne ɛho asase, Yaser ne ɛho asase: Nkuro nnan.

⁴⁰ Merari mma mmusua ahodoɔ a wɔaka Lewifoɔ mmusua mu no nkuro nyinaa, wɔn ntonto deɛ ne nkuro dummienu.

⁴¹ Lewifoɔ nkuro a wɔnyaa no Israelfoɔ agyapadeɛ mu no nyinaa yɛ nkuro aduanan nwɔtwe ne ɛho mmoa adidibea nsase.

⁴² Nkuro yi mu biara wɔ mmoa adidibea nsase a atwa ho ahyia, saa na ɛteɛ nkuro yi nyinaa ho.

Onyankopɔn di ne bɔhyɛ so

⁴³ Na AWURADE de asase a ɔkaa ho ntam sɛ ɔde bɛma wɔn nananom no nyinaa maa Israel, na wɔdii so tenaa so.

⁴⁴ Na AWURADE maa wɔn asomdwoeɛ hyiae, sɛdeɛ ɔkaa wɔn nananom ntam no ara, na wɔn atamfoɔ nyinaa mu biara annyina wɔn anim; AWURADE de wɔn atamfoɔ no nyinaa hyɛɛ wɔn nsa.

⁴⁵ Asɛm pa a AWURADE kaa Israel fie no nyinaa mu asɛm biara antɔ fam, ne nyinaa baa mu.