Yosua 14 - New Revised Asante Twi Bible

Wɔnam ntontotwe so ma mmusuakuo nkron ne fa no agyapadeɛ

¹ Na yei ne Israel agyapadeɛ a wɔnyaa no Kanaan asase soɔ a Ɔsɔfoɔ Eleasa ne Nun ba Yosua ne Israelfoɔ mmusuakuo mu agyanom so atitire no kyekyɛ maa wɔn,

² wɔn agyapadeɛ a ɛnam ntontotwe soɔ, sɛdeɛ AWURADE nam Mose so hyɛɛ sɛ wɔmma mmusuakuo nkron ne fa no.

³ Na Mose ama mmusuakuo mmienu ne fa no agyapadeɛ wɔ Yordan agya, na Lewifoɔ deɛ, wamma wɔn agyapadeɛ biara wɔ wɔn mu.

⁴ Na Yosef mma yɛ mmusuakuo mmienu, Manase ne Efraim, na wɔamma Lewifoɔ no kyɛfa biara asase no so, gye nkuro a wɔbɛtena mu ne ɛho mmoa adidibea nsase ma wɔn mmoa ne wɔn nnoɔma.

⁵ Sɛdeɛ AWURADE hyɛɛ Mose no, saa na Israelfoɔ no yɛeɛ, na wɔkyɛɛ asase no mu.

Wɔde Hebron ma Kaleb

⁶ Na Yudafoɔ no baa Yosua nkyɛn wɔ Gilgal; na Kenesini Yefune ba Kaleb ka kyerɛɛ no sɛ: Wo ara wonim me ne wo ho asɛm a AWURADE ka kyerɛɛ Nyankopɔn nipa Mose wɔ Kades-barnea.

⁷ Medii mfirinhyia aduanan na AWURADE akoa Mose somaa me firi Kades-barnea sɛ menkɔsra asase no, na mesane mede emu asɛm mebrɛɛ no, sɛdeɛ ɛwɔ m’akoma mu.

⁸ Na me nuanom a wɔne me foro kɔeɛ no maa ɔman no akoma tui, na me deɛ, medii AWURADE me Nyankopɔn akyi mewiee.

⁹ Na Mose kaa ntam da no ara sɛ: Asase a wo nan tiaa soɔ no bɛyɛ wo ne wo mma agyapadeɛ daa, ɛfiri sɛ woadi AWURADE me Nyankopɔn akyi awie.

¹⁰ Na afei hwɛ, AWURADE ama matena ase sɛdeɛ ɔkaeɛ no, mfirinhyia aduanan nnum yi, ɛfiri berɛ a AWURADE kaa asɛm yi kyerɛɛ Mose berɛ a na Israel nam serɛ soɔ no. Na afei, hwɛ, ɛnnɛ madi mfirinhyia aduɔwɔtwe nnum.

¹¹ Meda so mewɔ ahoɔden nnɛ yi ara, sɛ deɛ na meteɛ da a Mose somaa me no; sɛdeɛ m’ahoɔden teɛ da no, saa ara na ɛteɛ nnɛ ma ɔko ne adifire ne emuba.

¹² Na afei, fa bepɔ yi a AWURADE kaa ho asɛm da no no ma me, ɛfiri sɛ da no ara wotee sɛ Anakfoɔ ne nkuro akɛseɛ a wɔatoto ho afasuo wɔ hɔ. Ebia AWURADE bɛdi m’akyi na matu wɔn, sɛdeɛ AWURADE kaeɛ no.

¹³ Na Yosua hyiraa no, na ɔde Hebron maa Yefune ba Kaleb sɛ n’agyapadeɛ.

¹⁴ Ɛno nti na Hebron yɛɛ Kenesini Yefune ba Kaleb agyapadeɛ de bɛsi nnɛ da yi, ɛfiri sɛ ɔdii AWURADE Israel Nyankopɔn no akyi yie.

¹⁵ Nso akane no na Hebron din ne Kiriat-arba. Arba yi ne Anakfoɔ mu nipa kɛseɛ koraa. Na asase no so dwo firii akodie mu.