Yesaia 46 - New Revised Asante Twi Bible

Babel abosom ahweaseɛ

¹ Bel butu, Nebo koto; akwantuo mmoa ne anantwie soso wɔn ahoni; wɔakyekyere mo nnesoa asoasoa mmoa a wɔrebrɛ.

² Wɔbom koto butu; wɔntumi nnsi amanehunu ano; na wɔn ara nso kɔ atukorɔ mu.

³ Yakob fie ne Israel fie nkaeɛ nyinaa, mo a wɔaturu mo afiri yafunu mu na masoa mo afiri awotwaa mu no, monyɛ aso mma me.

⁴ Na ɛkɔsi w’akwakorabɔ mu, mene me ara, na ɛkɔsi ɛdwonofuo mu mpo, mede wo bɛsi akɔnkɔn; me na mayɛ, na me na mɛsoa, me na mede wo bɛsi akɔnkɔn, na magye wo.

⁵ Hwan na mode me bɛto ne ho na ɔne me ayɛ pɛ, na mode no bɛsusu me, na yɛasɛ?

⁶ Wɔn deɛ, wɔhwie sika firi fotoɔ mu, na wɔde nsania kari dwetɛ; wɔbɔ sikadwumfoɔ paa na ɔyɛ no onyame; wɔkoto, na wɔsɔre no.

⁷ Wɔma no so si akɔnkɔn kɔsoɛ no si ne sibea, na ɛsi hɔ; ɛntwe ne ho mfiri n’afa; wɔteam frɛ no a, ɔmmua, na ɔntumi nnye obi, n’ahohia mu.

Nkwagyeɛ no abɛn

⁸ Monkae yei, na monnwene ho, mo mmaratofoɔ, mokae ɛ.

⁹ Monkae akane nnoɔma a ɛfiri tete no, sɛ me ara mene Onyankopɔn, na obiara nni hɔ bio; mene Onyankopɔn, na deɛ ɔte sɛ me nni hɔ koraa.

¹⁰ Me a mefiri mfitiaseɛ meka awieeɛ asɛm, na mefiri tete mmerɛ no meka deɛ wɔnyɛeɛ no, meka sɛ: Me tirimbɔ bɛgyina, na deɛ ɛsɔ m’ani nyinaa mɛyɛ.

¹¹ Mɛfrɛ ɔkoropɔn bi afiri apueeɛ ne m’agyina mu barima afiri akyirikyiri asase so. Makasa, na mɛma no aba mu; madwene, na mɛyɛ.

¹² Montie me, asobrakyefoɔ a mo ne tenenee ntam twe.

¹³ Mede me tenenee apinkyɛ, ɛnni akyiri, na me nkwagyeɛ renka akyi. Mede nkwagyeɛ bɛsi Sion, na mede m’animuonyam mama Israel.