Yesaia 23 - New Revised Asante Twi Bible

Tiro ho atemmusɛm

¹ Tiro ho atemmusɛm. O, mo Tarsis ahyɛn, montwa adwo, ɛfiri sɛ wɔasɛe no a efie nni hɔ bio, obi nkɔ hɔ bio! Ɛfiri Kipro asase so na wɔyi kyerɛ wɔn.

² Mo mpoanofoɔ, monyɛ komm! Sidon adwadifoɔ a wɔtwa po no yɛɛ wo ma;

³ na wɔfaa nsuo bebree so de Sihor nnɔbaeɛ, ne Nil ano ayuo bae, na ɛyɛɛ amanaman adwadie mu mfasoɔ.

⁴ Sidon, ma w’ani nwu: Na ɛpo mu abankɛseɛ, ka sɛ: Menkyemm na menwoo mma da, na menyɛnee mmeranteɛ na mentetee mmabaa.

⁵ Misraim te asɛm no ara pɛ, ɛbɛdi Tiro asɛm no ho yea kɛse.

⁶ Montwa nkɔ Tarsis, mo mpoanofoɔ, montwa adwo.

⁷ Yei ne mo ahurisidie kuro a ɛfiri tete nteredee no, a ne nan de no dɔɔ mu kɔɔ akyirikyiri kɔtenaa hɔ no anaa?

⁸ Hwan na ɔbɔɔ ne tirim pɔ yi tiaa Tiro, abotiremafoɔ no a n’adwadifoɔ yɛ mmapɔmma ara nko, na n’adwadifoɔ yɛ asase so animuonyamfoɔ ara nko no?

⁹ Asafo AWURADE abɔ ne tirim, sɛ ɔbɛgu ahantan nyinaa animuonyam ho fi, na wahura asase so animuonyamfoɔ nyinaa ho.

¹⁰ O Tarsis babaa, yiri w’asase so sɛ Nil; nkyekyeremu biara nni hɔ bio.

¹¹ Watene ne nsa akyerɛ po so, wawoso ahennie ahodoɔ, AWURADE ahyɛ Kanaan ho mmara sɛ wɔnsɛe n’abankɛseɛ.

¹² Na waka sɛ: Worenkɔ so nni ahurisie bio, O Sidon babaa a wɔabɔ wo adapaa. Kipro na sɔre twam korɔ, ɛhɔ nso worennya ɔhome.

¹³ Hwɛ, Kaldeafoɔ asase! Ɛno na ɛyɛ ɔman ɛnyɛ Asiria. Wɔde Tiro maa nkekaboa. Wɔtoo wɔn afasuo denden no. Wɔbubuu n’ahemfie maa ɛyɛɛ fituo.

¹⁴ Mo Tarsis ahyɛn, montwa adwo, na wɔasɛe mo aban.

¹⁵ Na da no ɛbɛba sɛ werɛ bɛfiri Tiro mfeɛ aduɔson a ɛte sɛ ɔhene baako berɛ, mfirinhyia aduɔson no akyiri no, ɛbɛyɛ Tiro sɛ odwamamfoɔ no dwom no:

¹⁶ Fa sankuo, kyini kuro mu, odwamamfoɔ a werɛ afiri woɔ, bɔ sankuo yie, na to nnwom pii, deɛ ɛbɛyɛ na wɔakae woɔ.

¹⁷ Na ɛbɛba sɛ, mfeɛ aduɔson no akyiri no, AWURADE bɛba abɛsra Tiro bio, na wasane anya n’apaadeɛ, na ɔne asase so ahennie nyinaa akɔbɔ adwaman bio.

¹⁸ Na n’adwadeɛ ne n’apaadeɛ bɛyɛ kronkron ama AWURADE; wɔremfa mmɔ dwetire, na wɔremfa nsie; na n’adwadeɛ bɛyɛ wɔn a wɔte AWURADE anim no deɛ, na wɔadi amee, na wɔafira ntoma pa.