Yesaia 16 - New Revised Asante Twi Bible

Moab ho atemmusɛm

¹ Momfa nnwammaa mfiri Sela mfa anwea pradada so fam nkɔ Sion babaa bepɔ no so nkɔma asase no sodifoɔ no.

² Na Moab mmammaa bɛyɛ sɛ nnomaa a wɔtu kyini, pirebuo a wɔayi no Arnon asutwareeɛ.

³ Tu fo, bu atɛn; ma wo nwunu nyɛ sɛ anadwo, awia ketee; fa wɔn a wɔapam wɔn hunta, nyi adwanefoɔ mma;

⁴ ma wɔn a wɔapam wɔn afiri Moab no nsoɛ wo nkyɛn, yɛ wɔn huntabea, ɔsɛefoɔ no anim! na ɔpoobɔfoɔ agyae, ɔsɛeɛ to atwa, nhyɛsofoɔ asa asase no so.

⁵ Na wɔbɛma adwa bi atim, adɔeɛyɛ so, na obi atena so, nokorɛ mu, wɔ Dawid ntomadan no mu, deɛ ɔbu atɛn na ɔpɛ atɛntenenee, na ɔyɛ adetenenee ntɛm.

⁶ Yɛate Moab ahomasoɔ a wayɛ dodoɔ, n’ahantan ne n’ahokyerɛ ne n’aniɛden ne ahoahoasɛm huhuo no.

⁷ Enti ma Moab ntwa adwo, ma wɔn nyinaa ntwa Moab ho adwo, Kir-Hareset bobe aba taterɛ ho na mobɛtwa adwo koraa.

⁸ Na Hesbon mfuo ahye; Sibma bobe no, amanaman wuranom abubu ne mman koraa; ɛkɔduruu Yaser, na ɛkyinii serɛ so. Ne mman trɛtrɛe, ma ɛkɔtwaa po.

⁹ Enti mede Yaser su mesu Sibma bobe no, mede nisuo gu wo so, O Hesbon ne Eleale; na wo nnuabateɛ ne wo bobe abateɛ so na ɔko nteateam aba;

¹⁰ na wɔayi anigyeɛ ne ahosɛpɛ afiri mfuo papa mu, na wɔnte ahurisie dwom anaa nteateam wɔ bobe nturo mu, nsakyifoɔ nkyi nsa-kyi-amena mu nsa, atiatiafoɔ dwom nso, matwa so.

¹¹ Enti me kra si apini wɔ Moab ho, me yam nso hyehye me Kir-Heres ho.

¹² Na sɛ Moab yi ne ho adi ba bɛsu, na ɔbrɛ ne ho wɔ sorɔnsorɔnbea hɔ, na ɔhyɛne ne kronkronbea bɛbɔ mpaeɛ a, ɔrentumi nyɛ hwee.

¹³ Yei ne asɛm a AWURADE aka atia Moab dadaada no;

¹⁴ na afei AWURADE rekasa sɛ: Ɛha mfeɛ mmiɛnsa a ɛte sɛ ɔpaani mfeɛ no, Moab animuonyam bɛyera, ɛmfa ho sɛ ɔwɔ dɔm kɛseɛ; na nkaeɛ no bɛyɛ kakraa bi a wɔnyɛ den.