Yesaia 15 - New Revised Asante Twi Bible

Moab ho atemmusɛm

¹ Moab ho atemmusɛm. Ɛnam sɛ anadwo baako wɔasɛe Ar nti, Moab abɔ no, ɛnam sɛ anadwo baako wɔasɛe Kir Moab abɔ no nti,

² wɔreforo akɔ Bayit ne Dibon sorɔnsorɔmmea akɔsu, Moab retwa adwo, Nebo ne Medeba; wɔn nyinaa abobɔ tikwa, wɔn nyinaa ayiyi wɔn bɔgyesɛ;

³ wɔfirafira ayitoma, wɔn mmorɔno so, na wɔn adan atifi ne wɔn mpraeɛ so, wɔn nyinaa retwa adwo su pii.

⁴ Na Hesbon ne Eleale team ma wɔte wɔn nne kɔduru Yahas, yei nti na Moab akofoɔ team denden; ne kra ho popo.

⁵ M’akoma su ma Moab, na n’adwanefoɔ kɔduru Soar, kɔduru Eglat-selisiya. Na Luhit aforoeɛ no, wɔde nisuo foro, na Horonaim kwan mu wɔma ɔsɛeɛ adwotwa so.

⁶ Na Nimrim asuo no asɛe pɔtɔɔ, na ɛserɛ adwan, na wira asa, wira mono nni hɔ bio.

⁷ Enti adeɛ a wɔanya asie ne wɔn akoradeɛ no, wɔsoa kɔtwa mpampuro subonhwa.

⁸ Na adwotwa no atwa Moab asase so ahyia, ne su aduru Eglaim, ne su nso aduru Beer-elim.

⁹ Na mogya ayɛ Dimon nsuo no ma, na mede ade foforɔ nso meka Dimon ho; gyata bɛba Moab adwanefoɔ ne asase no so nkaeɛ no so.