Yeremia 29 - New Revised Asante Twi Bible

Nwoma a Yeremia de kɔmaa atukɔfoɔ no

¹ Nso Odiyifoɔ Yeremia twerɛɛ nsɛm yi hyɛɛ nwoma mu de firi Yerusalem manee atukɔfoɔ no mu mpanimfoɔ nkaeɛ ne asɔfoɔ ne adiyifoɔ ne nkurɔfoɔ a Babelhene Nebukadnessar tuu wɔn firii Yerusalem kɔɔ Babel no nyinaa,

² berɛ a Ɔhene Yekonia ne ɔhene ne na ne mpiafoɔ ne Yuda ne Yerusalem mmapɔmma ne adwumfoɔ ne atomfoɔ firii Yerusalem kɔeɛ no;

³ ɔde manee Safan ba Elasa ne Hilkia ba Gemaria a Yudahene Sedekia somaa wɔn maa wɔkɔɔ Babelhene Nebukadnessar nkyɛn wɔ Babel no; ɛse:

⁴ Sei na asafo AWURADE, Israel Nyankopɔn ka kyerɛɛ atukɔfoɔ a memaa wɔtuu wɔn firii Yerusalem kɔɔ Babel no nyinaa:

⁵ Monsisi adan na montena mu, na monyɛ nturo na monni mu aba.

⁶ Monwareware yerenom, na monwowo mmabanin ne mmammaa, na monwareware yerenom mma mo mma, na momfa mo mmammaa mmema ekununom awareɛ, na wɔnwowo mmabanin ne mmammaa, na monnɔɔso ɛhɔnom na moansua.

⁷ Na monhwehwɛ kuro a memaa wɔtuu mo kɔɔ hɔ no yiedie, na mommɔ AWURADE mpaeɛ mma no; na ne yiedie mu na mobɛdi yie.

⁸ Na sɛ asafo AWURADE, Israel Nyankopɔn seɛ nie: Mommma mo adiyifoɔ a wɔwɔ mo mu no ne mo nkɔmhyɛfoɔ no nnsisi mo, na monntie wɔn daeɛ a wɔsoso no,

⁹ na atorɔ mu na wɔde me din hyɛ mo nkɔm, mensomaa wɔn, AWURADE asɛm nie.

¹⁰ Na sɛ AWURADE seɛ nie: Mfirinhyia aduɔson nya duru wɔ Babel a, mɛba mabɛhwɛ mo, na mama m’asɛmpa no aba mu ama mo, sɛ mede mo bɛsane aba ha yi.

¹¹ Na me deɛ, menim adwene ko a meredwene mo ho, AWURADE asɛm nie, asomdwoeɛ adwene, na ɛnyɛ bɔne deɛ, sɛ merema mo awieeɛ pa ne anidasoɔ.

¹² Na mobɛfrɛ me, na moakɔ akɔbɔ me mpaeɛ, na matie mo.

¹³ Na mobɛhwehwɛ me ahu me, ɛfiri sɛ mode mo akoma nyinaa bɛhwehwe m’akyiri kwan.

¹⁴ Na mɛma moahu me, AWURADE asɛm nie. Na mede mo nnommum bɛsane aba, na maboa mo ano afiri amanaman a mapam mo akɔ hɔ no nyinaa mu, AWURADE asɛm nie, na mede mo bɛsane aba deɛ memaa wɔtuu mo firi hɔ kɔeɛ no.

¹⁵ Ɛsiane sɛ moka sɛ: AWURADE ama adiyifoɔ so ama yɛn Babel nti,

¹⁶ sei na AWURADE ka no ɔhene a ɔte Dawid adwa soɔ no ne ɔman a wɔte kuro yi mu, mo nuanom a wɔne mo amfiri ankɔ tukorɔ no mu no nyinaa ho,

¹⁷ sɛ asafo AWURADE seɛ nie: Hwɛ, merema afena, ɛkɔm ne owuyadeɛ aba wɔn mu, na mama wɔadane sɛ mmorɔdɔma porɔeɛ a yɛ a ɛnyɛ nti wɔntumi nnie.

¹⁸ Na mede afena, ɛkɔm ne owuyadeɛ bɛti wɔn, na mama wɔadwane wɔn ho asase so ahennie nyinaa mu, na wɔadane nnome ne ahodwirideɛ ne fɛdie ne ahohoradeɛ, amanaman a mapam wɔn akɔ hɔ no mu,

¹⁹ ɛfiri sɛ wɔantie me nsɛm, AWURADE asɛm nie, sɛ mesomaa me nkoa adiyifoɔ maa wɔbaa wɔn nkyɛn, metuaa nhema mesomaa wɔn, nso moantie, AWURADE asɛm nie.

²⁰ Enti montie AWURADE asɛm, mo atukɔfoɔ a mama moafiri Yerusalem akɔ Babel no nyinaa.

²¹ Sei na asafo AWURADE, Israel Nyankopɔn ka no Kolaia ba Ahab ne Maaseia ba Sedekia a wɔde me din hyɛ mo nkɔntorɔ no ho: Hwɛ, mede wɔn merehyɛ Babelhene Nebukadnessar nsa, na wakum wɔn mo anim.

²² Na wɔmfa wɔn nyɛ nnome, Yuda atukɔfoɔ a wɔwɔ Babel no nyinaa anomu sɛ: AWURADE nyɛ wo sɛ Sedekia ne Ahab a Babel hene de ogya hyee wɔn no,

²³ ɛsiane sɛ wɔadi nkwaseasɛm Israel, na wɔafefa wɔn mfɛfoɔ yerenom, na wɔaka me din mu atorosɛm a menhyɛɛ wɔn, na me na menim, na mene danseni, AWURADE asɛm nie.

Krataa a ɛfiri atukɔfoɔ hɔ a wɔde kɔma Ɔsɔfo panin Semaia

²⁴ Na ka kyerɛ Nehelamni Semaia sɛ:

²⁵ Sɛ asafo AWURADE, Israel Nyankopɔn seɛ nie: Ɛsiane sɛ wo ara wo din mu wode nwoma amane ɔman a ɛwɔ Yerusalem nyinaa ne Maaseia ba Ɔsɔfoɔ Sefania ne asɔfoɔ no nyinaa sɛ:

²⁶ AWURADE ahyɛ wo sɔfoɔ asi Ɔsɔfoɔ Yehoiada ananmu, sɛ ɔhwɛfoɔ, sɛ hwɛ AWURADE fie nti, obiara a wabɔ dam na ɔhyɛ nkɔm, na woato no dua mu ne ɛdan mu nti,

²⁷ afei, adɛn nti na woantwi Anatotni Yeremia a ɔhyɛ mo nkɔm no anim?

²⁸ Ɛfiri sɛ wasoma ama wɔaba yɛn nkyɛn Babel sɛ: Ɛbɛkyɛ, monsisi adan ntena mu na monyɛ nturo nni mu aba!

²⁹ Na Ɔsɔfoɔ Sefania kenkann nwoma yi guu Odiyifoɔ Yeremia aso mu.

³⁰ Na AWURADE asɛm baa Yeremia nkyɛn sɛ:

³¹ Soma ma wɔnkɔse atukɔfoɔ no nyinaa sɛ: Sei na AWURADE ka no Nehelamni Semaia ho: Ɛsiane sɛ Semaia ahyɛ mo nkɔm, na mansoma no, na wama mode mo ho ato atorɔ soɔ nti,

³² sɛ AWURADE seɛ nie: Hwɛ, mereba mabɛtwe Nehelamni Semaia ne n’asefoɔ aso, ɔrennya obi a ɔbɛtena ɔman yi mu a, ɔbɛhunu papa a merebɛyɛ me man no, AWURADE asɛm nie, ɛfiri sɛ waka atuateɛ atia AWURADE.