Yeremia 22 - New Revised Asante Twi Bible

Wɔbɔ ahemfiefoɔ kɔkɔ. Atemmuo no

¹ Sɛ AWURADE seɛ nie: Siane kɔ Yuda hene fie, na kɔka asɛm yi hɔ sɛ:

² Tie AWURADE asɛm, Yuda hene a wote Dawid akonnwa soɔ no, wo ne wo nkoa ne wo man a wɔfa apono yi mu ba mu no.

³ Sɛ AWURADE seɛ nie: Mommu atɛntenenee nyɛ ade tenenee, na monyi deɛ wɔafom no afa mfiri omimfoɔ nsam, na ɔhɔhoɔ, awisiaa ne okunafoɔ, monnhom wɔn so, mommmɔ wɔn atirimuɔden, na mogya a ɛdi bem nso, monnhwie nngu wɔ ha yi.

⁴ Na sɛ modi asɛm yi so ampa a, ɛnneɛ ahemfo a ɛtete Dawid akonnwa soɔ bɛtena nteaseɛnam mu ne apɔnkɔ so abɛfa efie yi apono akɛseɛ mu aba mu, wɔn ne ne nkoa ne wɔn man.

⁵ Na sɛ moantie nsɛm yi a, ɛnneɛ maka me ho ntam, AWURADE asɛm nie, sɛ efie yi bɛdane fituo.

⁶ Na sɛ AWURADE ka fa Yuda hene fie ho nie: Woyɛ me sɛ Gilead, ne Lebanon atifi, nanso mɛdane wo anwea pradada so, nkuro a wɔnte mu!

⁷ Na mereyi asɛefoɔ atia wo, wɔn akodeɛ kurakura wɔn, na wɔabubu wo ntweneduro a wɔayie no de agu ogya mu.

⁸ Na amanaman pii bɛtwam kuro yi ho, na wɔasese wɔn ho wɔn ho sɛ: Ɛnam deɛn so nti na AWURADE ayɛ kuro kɛseɛ yi seyie?

⁹ Na wɔbɛbua wɔn sɛ: Ɛfiri sɛ wɔagya AWURADE wɔn Nyankopɔn apam, na wɔakɔsɔre anyame foforɔ asom wɔn.

¹⁰ Monnsu owufoɔ na monnnyam no. Esu mmom na monsu deɛ ɔrekorɔ no, na ɔrensane mma bio mmɛhunu n’awoɔ asase.

Yosia mma ho atemmusɛm

¹¹ Na sɛ AWURADE ka no Salum a ɔyɛ Yudahene Yosia ba a ɔsii n’agya Yosia anan mu dii hene, a ɔfiri ha kɔeɛ no ho nie: Ɔrensane mma ha bio,

¹² na deɛ wɔatu no korɔ no, ɛhɔ na ɔbɛwuo, na ɔrenhunu asase yi bio.

¹³ Deɛ ɔfa ɔkwan a ɛntene so kyekyere ne fie, na ɔde asisie si n’abansoro, na ɔma ne yɔnko yɛ adwuma kwa, na ɔmfa n’akatua mma no no nnue!

¹⁴ Deɛ ɔka sɛ: Mɛsi dan a emu baeɛ ayɛ mu abansoro adan a ɛsoso pii mafa, na ɔtwitwa mu mpomma na ɔde ntweneduro sam mu, na ɔde adukɔkɔɔ sra mu!

¹⁵ W’ani abere tweneduro ho yi nti, ɛyɛ wo sɛ woyɛ ɔhene? W’agya annidi annom wammu atɛntenenee anyɛ ade tenenee? Ɛno nti nso na ɛsii no yie.

¹⁶ Ɔdii mmɔborɔni ne ohiani asɛm maa no, enti nso na ɛsii no yie. Ɛnyɛ yei ne me ho nimdeɛ? AWURADE asɛm nie.

¹⁷ Nanso w’ani ne w’akoma nni hwee so sɛ wo mfasoɔ bɔne, ne mogya a ɛdi bem so sɛ ɛngu fam, ne amim ne nhyɛsoɔ so sɛ wobɛyɛ.

¹⁸ Ɛno nti sɛ AWURADE ka no Yudahene Yehoiakim a ɔyɛ Yosia ba no ho nie: Wɔrennyam no nka sɛ: Due, me nuabarima, anaa: Due, onuabaa! Wɔrennyam no nka sɛ: Due, owura! anaa: Due, n’animuonyam!

¹⁹ Afunumu sie na wɔde bɛsie no, wɔbɛtwe no ato no atwene Yerusalem apono akyiri.

²⁰ Foro kɔ Lebanon kɔsu, na ma wo nne so wɔ Basan, na team firi Abarim, ɛfiri sɛ wɔadwerɛ w’adɔfo nyinaa.

²¹ Wodii yie no, mekasa mekyerɛɛ wo, na wose: Merentie. Wo kwan a wofa so nie firi wo mmabaaberɛ mu, sɛ wontie me.

²² Mframa bɛyɛne w’ayɛnfoɔ nyinaa, na w’adɔfo bɛkɔ nnommumfa mu; ɛno ansa na w’ani bɛwuo na w’anim agu ase, wo bɔne nyinaa ho.

²³ Wo a wote Lebanon ayɛ wo pirebuo ntweneduro soɔ no, sɛ ɔyea ne awoko a ɛte sɛ ɔbaa wofoɔ deɛ ba wo so a, sɛdeɛ wobɛsi ayɛ mmɔbɔ afa.

²⁴ Sɛ mete aseɛ yi, AWURADE asɛm nie, sɛ Yudahene Konia, a ɔyɛ Yehoiakim ba no yɛ me nifa so nsɔanokaa mpo a, anka mɛte no afiri hɔ.

²⁵ Na mede wo bɛhyɛ wɔn a wɔhwehwɛ wo kra no nsa, ne wɔn a wosuro wɔn anim no nsa, ne Babelhene Nebukadnessar ne Kaldeafoɔ nsa;

²⁶ na mɛpra wo ne wo na a ɔwoo woɔ no akɔ asase bi a ɛnyɛ hɔ na wɔwoo mo so, na ɛhɔ ara na mobɛwuwuo,

²⁷ na asase a wɔn kra pɛ sɛ wɔbɛsane aba soɔ no, wɔrensane mma hɔ bio.

²⁸ Ɔbarima Konia yi ayɛ sɛ anwonneɛ a abɔ na wɔmmuo, anaa adeɛ bi a obiara ani nnye ho? Adɛn nti na wɔto no ne n’asefoɔ gu asase a wɔnnim soɔ so yi?

²⁹ O asase, asase, asase, tie AWURADE asɛm!

³⁰ Sɛ AWURADE seɛ nie: Montwerɛ wɔ ɔbarima yi ho sɛ ɔyɛ deɛ ɔnni ba, ɔbarima a ɔrenni yie ne nna mu, na n’asefoɔ mu obiara a ɔbɛtena Dawid ahennwa soɔ na wadi Yuda so bio no, renni yie.