Sefania 1 - New Revised Asante Twi Bible

AWURADE atemmuo da no

¹ AWURADE asɛm a ɛbaa Sefania a ɔyɛ Kusi ba Gedalia ba Amaria ba Hesekia ba nkyɛn, Yudahene Yosia a ɔyɛ Amon ba berɛ soɔ nie.

² Pra na mɛpra ade nyinaa afiri asase ani akorɔ, AWURADE asɛm nie.

³ Mɛpra onipa ne aboa akɔ, mɛpra ewiem nnomaa ne ɛpo mu mpataa akɔ, ne suntidua ɛne abɔnefoɔ, na matwitwa nnipa afiri asase ani agu, AWURADE asɛm nie.

⁴ Na mɛtene me nsa, Yuda so ne Yerusalemfoɔ nyinaa so, na mɛtwa Baal nkaeɛ ne abosomfoɔ asɔfoɔ ne AWURADE asɔfoɔ a wɔapo no no din afiri ha yi agu,

⁵ ne wɔn a wɔsɔre ewiem nnoɔma wɔ adan atifi, ne asɔrefoɔ a wɔkeka AWURADE ntam na wɔkeka Milkom ntam

⁶ ne wɔn a wɔsane firi AWURADE akyi ne wɔn a wɔnhwehwɛɛ AWURADE na wɔmmisaa n’akyiri kwan no.

⁷ Monyɛ komm AWURADE Nyankopɔn anim, na AWURADE da no abɛn, na AWURADE asiesie okum afɔdeɛ, wadwira wɔn a wafrɛ wɔn no.

⁸ Na AWURADE kum afɔdeɛ da no, mɛtwe mmapɔmma ne ahenemma no ne wɔn a wɔhyɛ ananafoɔ ntadeɛ nyinaa aso.

⁹ Na ɛda no, mɛtwe obiara a ɔhuri tra aponnwa aso, wɔn a wɔde ɔhyɛ ne nsisie hyehyɛ wɔn wuranom afie amaama.

¹⁰ Na ɛda no, AWURADE asɛm nie, esu nne bɛfiri Mpataa Pono no ano, na adwotwa afiri Ɔfa a ɛtɔ so Mmienu no mu, na ɔsɛeɛ kɛseɛ afiri nkokoɔ no so aba.

¹¹ Montwa adwo, mo a mote Mortar no, ɛfiri sɛ wɔasɛe adwadifoɔ asafo no nyinaa, na wɔatwitwa wɔn a wɔasoa dwetɛ nyinaa.

¹² Na ɛberɛ no mu mede nkanea bɛhwehwɛ Yerusalem mu, na matwe nnipa a wɔagya wɔn ho ama bɔne no aso, wɔn a wɔse no wɔn akoma mu sɛ: AWURADE renyɛ ho hwee.

¹³ Na wɔn ahonyadeɛ bɛdane fomfa adeɛ, na wɔn afie adeda mpan. Wɔbɛsisi adan, na wɔrentena mu, na wɔbɛyɛ bobe nturo, na wɔrennom mu nsa.

¹⁴ AWURADE da kɛseɛ no abɛn, abɛn na ɛrepɛ ntɛm sɛ; AWURADE da no nne yɛ nwono sɛ! ɔdɔmmarima team denden wɔ hɔ.

¹⁵ Ɛda no yɛ anibereɛ da, ahohiahia ne ahokyere da, ɔsɛeɛ ne amamfoyɛ da, esum ne kusuuyɛ da, mununkum ne kusukuukuu da,

¹⁶ totorobɛnto ne osebɔ da a ɛreba afasuo mu nkuro ne aban atentene ano sorɔnsorɔn soɔ.

¹⁷ Na mɛhiahia nnipa ho na wɔanante sɛ anifirafoɔ, ɛfiri sɛ AWURADE na wɔayɛ no bɔne; na wɔn mogya bɛgu sɛ mfuturo, na mato wɔn honam agu sɛ sɛbeɛ.

¹⁸ Wɔn sika ne wɔn dwetɛ nso rentumi nnye wɔn AWURADE abufuo da no, na ne ninkuntwe gya no mu na asase no nyinaa bɛhyeɛ, na ɔdwerɛ a ɛba mpofirim ara na ɔde bɛba asase sofoɔ nyinaa soɔ.