Nnwom mu dwom 2 - New Revised Asante Twi Bible

Ɔdɔfoɔ ho anigyina

¹ Me deɛ, meyɛ Saron nhwiren, ne mmonhwa mu sukooko.

² Me dɔfoɔ wɔ mmammaa mu sɛ nkasɛɛ ntam sukooko.

³ Me dɔfoɔ da mmeranteɛ ntam sɛ aprɛ a ɛwɔ kwaeɛ mu nnua ntam, mede anigyeɛ kɛseɛ tenaa ne nwunu ase, na n’aba yɛ me dodom dɛ.

⁴ Ɔde me aba apontoɔ dan mu, na ne frankaa a ɛsi me soɔ ne ɔdɔ.

⁵ Momfa bobe aba taterɛ nwowa me, momfa aprɛ aba nnwodwo me, ɛfiri sɛ ɔdɔ abɔ me yareɛ.

⁶ O, sɛ ne nsa benkum hyɛ me tiri ase, na anka ne nsa nifa yɛ me atuu.

⁷ Meka no ntam, Yerusalem mmammaa, atwewa ne petee mu aforotebereɛ ho ntam, sɛ monnnyane na monnhwanyane ɔdɔ kɔsi berɛ a ɔno ara pɛ.

⁸ Me dɔfoɔ nne nie! Hwɛ, ɔreba! Ɔhuri tratra mmepɔ, ɔte nkokoɔ so pentenkwa.

⁹ Me dɔfoɔ te sɛ ɔtwe anaa ɔforoteburuwa. Hwɛ sɛ ɔgyina yɛn fasuo akyire, ɔhwɛ mpomma mu no mu haa, ɔhwɛ ntokuro a ɛdeda nnadeɛ a ɛsisi mpomma no mu.

¹⁰ Me dɔfoɔ kasa se me sɛ: Sɔre ɛ, me dɔfoɔ, m’ahoɔfɛ, na bra ɛ!

¹¹ Na hwɛ, awɔberɛ atwam, asusɔ agyae na ɛkɔ koraa.

¹² Nhwiren yi ne ho adi asase so, dwontoɔ berɛ adu, na wɔte anyankuku nka yɛn asase so.

¹³ Borɔdɔma ama n’abunabunu regyegye, na obobe nnuabaforɔ reyi ne hwa. Sɔre, me dɔfoɔ, m’ahoɔfɛ, na bra ɛ!

¹⁴ M’aburuburo a wowɔ ɔbotan tokuro mu ne sorɔnsorɔmmea ahuntaeɛ, ma menhunu w’anim, ma mente wo nne, na wo nne yɛ dɛ, na w’anim yɛ fɛ.

¹⁵ Monkyere nsakraman mma yɛn, nsakraman nketewa a wɔsɛe bobe nturo no, na yɛn bobe asoso nnuabaforɔ.

¹⁶ Me dɔfoɔ wɔ me, na me nso mewɔ no, ɔno a ɔyɛne ne nnwan sukooko mu.

¹⁷ Dane wo ho, me dɔfoɔ, na yɛ sɛ ɔtwe anaa ɔforoteburuwa, mpaepaemu mmepɔ so, kɔsi sɛ enwunu bɛdwoɔ na sunsum ayerayera.