Nnwom 94 - New Revised Asante Twi Bible

Onyankopɔn yɛ ɔweretɔfoɔ

¹ Aweretɔ Nyankopɔn, AWURADE, aweretɔ Nyankopɔn, pue.

² Asase temmufoɔ, ma wo ho so, tua ahokyerɛfoɔ ka.

³ AWURADE, ɛnkɔsi da bɛn na abɔnefoɔ, ɛnkɔsi da bɛn na abɔnefoɔ nni ahurisie?

⁴ Wɔka asɛmdenden, amumuyɛfoɔ nyinaa di ahantansɛm.

⁵ Wo man deɛ, AWURADE, wɔrebɔ no pasaa, na wɔbrɛ w’agyapadeɛ ase.

⁶ Wɔkum okunafoɔ ne ɔhɔhoɔ, na wɔdi nwisiaa awu;

⁷ na wɔka sɛ: AWURADE renhunu, na Yakob Nyankopɔn remmu.

⁸ Ɔman mu agyimifoɔ, monte aseɛ, na mo, nkwasea, da bɛn na mobɛhunu de?

⁹ Deɛ ɔtɛ aso no, ɔrente asɛm, anaa deɛ ɔnwonoo ani no, ɔrenhunu adeɛ?

¹⁰ Deɛ ɔtwe amanaman aso no, ɔrentenetene, deɛ ɔkyerɛ nnipa nimdeɛ no, ɔno ɛ?

¹¹ AWURADE hunu nnipa adwene sɛ ɛyɛ ahuhudeɛ.

¹² Nhyira ne onipa a wo, AWURADE, wotwe n’aso, na wofiri wo mmara no mu kyerɛkyerɛ no,

¹³ sɛ wobɛma no nna bɔne ho abodamu akɔsi sɛ wobɛfunu amena ama ɔbɔnefoɔ.

¹⁴ Na AWURADE rento ne man ntwene, na ɔrennya n’agyapadeɛ,

¹⁵ na atemmuo bɛsane akɔ tenenee mu, na akoma mu teefoɔ nyinaa bɛdi akyire.

¹⁶ Hwan na ɔbɛsɔre ne nnebɔneyɛfoɔ adi asie ama me? Hwan na ɔbɛgyina ne amumuyɛfoɔ adi asie ama me?

¹⁷ Sɛ ɛnyɛ AWURADE na ɔyɛ me boafoɔ a, anka aka kumaa na me kra akɔtena kommyɛ mu.

¹⁸ Sɛ mese me nan rewatiri a, wo, AWURADE, w’adɔeɛ na ɛwowa me.

¹⁹ Me mu dadwene dɔɔso a, w’awerɛkyekyerɛ gye me kra ani.

²⁰ Amammɔeɛ adwa a ɛnam mmara so bɔ mmusuo no ne wo bɛfa yɔnkoɔ anaa?

²¹ Wɔbɔ ɔteneneeni kra so kyenku, na wɔbu mogya a ɛdi bem fɔ.

²² Nanso AWURADE ayɛ me abankɛseɛ, na me Nyankopɔn ayɛ me dwanekɔbea botan.

²³ Na ɔde wɔn mmusuo abua wɔn atifi, na wɔn bɔne nti ɔbɛyi wɔn hɔ. AWURADE, aane, yɛn Nyankopɔn bɛyi wɔn hɔ.