Nnwom 90 - New Revised Asante Twi Bible

NWOMA A ƐTƆ SO NNAN ( Nnwom 90—106 ) Daa Nyankopɔn ne yɛn dwanekɔbea

Nyankopɔn nipa Mose mpaebɔ.

¹ AWURADE, wo na woayɛ yɛn dwanekɔbea, awoɔ ntoatoasoɔ nyinaa mu.

² Wo deɛ, wɔnnya mmɔɔ mmepɔ na wonnya nyii asase ne wiase adie no, na wofiri tete akyirikyiri kɔsi daakye akyirikyiri yɛ Onyankopɔn.

³ Woma ɔdasani dane mfuturo, na wose: Onipa mma, monsane mmra mo mfuturo mu.

⁴ Na mfirinhyia apem yɛ w’ani so sɛ nnora da a ɛtwaa mu ne anadwo mu dasuo.

⁵ Woma wɔsene kɔ sɛ susuansuo, wɔte sɛ daeɛ, anɔpa wɔfefɛ sɛ wira,

⁶ anɔpa ɛyɛ frɔmfrɔm, na ɛfefɛ, anwummerɛ wɔtwa, na atwintwam.

⁷ Na yɛresa w’abufuo mu, na yɛahye w’abufuhyeɛ no ano.

⁸ Wode yɛn amumuyɛ asi w’anim, wode yɛn kokoam bɔne aba w’anim hann no mu.

⁹ Na yɛn nna nyinaa atwam kɔ w’abufuo mu, yɛahwere yɛn mfeɛ sɛ asomusɛm bi.

¹⁰ Yɛn mfirinhyiam nna, emu wɔ mfeɛ aduɔson, na sɛ ɛboro so a, na ɛreduru aduɔwɔtwe, na emu ahohoahoadeɛ yɛ ɔbrɛ ne ahuhudeɛ, na ɛtwaa mu ntɛm so, na yɛtu kɔe.

¹¹ Hwan na ɔhunu w’abufuo ano den a ɛyɛ, ne w’anibereɛ, sɛ wo ho suro teɛ?

¹² Ma yɛnhunu yɛn nna kan sɛdeɛ ɛteɛ, na yɛanya nyansa akoma.

¹³ AWURADE, sane w’akyi, da bɛn ara? Na ma wo nkoa nyɛ wo mmɔbɔ.

¹⁴ Fa w’adɔeɛ ma yɛmmee nhema, na yɛadi ahurisie, na yɛn ani agye yɛn nna nyinaa mu.

¹⁵ Ma yɛn ho nsane yɛn, sɛ nna a wobrɛɛ yɛn ase wɔ mu ne mfeɛ a yɛhunuu mu bɔne no.

¹⁶ Ma w’adwuma nna adi mma wo nkoa, na w’animuonyam nna adi, wɔn mma so.

¹⁷ Na AWURADE yɛn Nyankopɔn animteɛ mmra yɛn so, na yɛn nsa ano adwuma no, ma no nyɛ yie mma yɛn, aane, yɛn nsa ano adwuma ma no nyɛ yie.