Nnwom 87 - New Revised Asante Twi Bible

Nyankopɔn kuro mufoɔ

Kora mma dwom.

¹ AWURADE kuro a ɔkyekyereeɛ wɔ mmepɔ kronkron so.

² AWURADE dɔ Sion apono sene Yakob tenabea nyinaa.

³ Wɔka wo ho animuonyamsɛm, Nyankopɔn kuro.

⁴ Sɛ mebɔ Misraimfoɔ, Babelfoɔ, Filistifoɔ, Tirofoɔ ne Etiopiafoɔ din wɔ wɔn a wɔni me mu mpo a, yeinom wɔwoo wɔn hɔ ara.

⁵ Na Sion ho deɛ, wɔbɛka sɛ: Wɔwoo wɔn nyinaa mmaako mmaako wɔ ne mu, na ɔno na ɔma n’ase tim, ɔsorosoroni no.

⁶ Sɛ AWURADE twerɛ aman din a, ɔbɛka sɛ: Oyi, wɔwoo no hɔnom.

⁷ Na nnwontofoɔ ne asafoɔ bɛka sɛ: Me mmasuo nyinaa wɔ wo mu.