Nnwom 67 - New Revised Asante Twi Bible

Nnɔbaeɛ twa ho aseda dwom

Wɔde ma dwonkyerɛfoɔ. Dwom a wɔto no asankuo ano.

¹ Onyankopɔn, dom yɛn, na hyira yɛn, te w’anim kyerɛ yɛn.

² Na ma wɔnhunu w’akwan wɔ asase so, wo nkwagyeɛ amanaman nyinaa mu.

³ Onyankopɔn, aman bɛyi wo ayɛ, aman nyinaa bɛyi wo ayɛ.

⁴ Aman ani bɛgye na wɔato ahosan nnwom, sɛ wobu aman atɛntenenee na wokyerɛkyerɛ asase so aman kwan.

⁵ Onyankopɔn, aman bɛyi wo ayɛ, aman nyinaa bɛyi wo ayɛ.

⁶ Asase abɔ n’aduane, Onyankopɔn, yɛn Nyankopɔn bɛhyira yɛn.

⁷ Onyankopɔn bɛhyira yɛn, na wɔn a wɔte asase ano nyinaa asuro no.