Nnwom 66 - New Revised Asante Twi Bible

Nkwagyeɛ ho ayeyie dwom

Wɔde ma dwonkyerɛfoɔ. Dwom.

¹ Asase nyinaa, monni ahurisie mmɔ ose mma Onyankopɔn,

² monto dwom mma ne din animuonyam, monhyɛ no animuonyam nyi no ayɛ.

³ Monse Onyankopɔn sɛ: Wo nnwuma yɛ hu ampa. Wo tumi kɛseɛ nti w’atamfo bɛkoto wo.

⁴ Asase nyinaa bɛsɔre wo na wɔato wo dwom, wɔbɛto dwom ama wo din.

⁵ Mommra mmɛhwɛ Nyankopɔn nneyɛɛ, n’adeɛ a ɔyɛ de di nnipa mma soɔ yɛ hu.

⁶ Ɔmaa ɛpo danee asase pɛsɛɛ, wɔde anammɔn twaa asu kɛseɛ, ɛno nti yɛn ani gye ne ho.

⁷ Deɛ ɔde ne tumi di hene daa no, ɔwɔ amanaman ho ani. Mma mansotwefoɔ mmma wɔn ho so.

⁸ Aman, monhyira yɛn Nyankopɔn, na momma wɔnte n’ayeyie yie.

⁹ Ɔde yɛn aka ateasefoɔ ho, na wamma yɛn nan anwati.

¹⁰ Na wo, Onyankopɔn, na woakari yɛn ahwɛ, woanane yɛn ahwɛ sɛ wɔnane dwetɛ hwɛ mu.

¹¹ Wode yɛn ahyɛ asau mu, wode adesoa dompee asoa yɛn.

¹² Woama ɔdasani anante yɛn tiri so, yɛafa ogya ne nsuo mu, nanso woayi yɛn aba deɛ nnepa abu soɔ hɔ.

¹³ Mede ɔhyeɛ afɔdeɛ bɛkɔ wo fie, mɛma wo m’aboadeɛ,

¹⁴ deɛ mede mebuee m’ano, ne deɛ m’ano kaa m’ahohia mu no.

¹⁵ Mede nnwan a wɔadɔre ne adwennini a ɛyɛ hwam bɛbɔ wo ɛhyeɛ afɔdeɛ, mede anantwie ne mpapo bɛbɔ afɔdeɛ.

¹⁶ Mo a mosuro Onyankopɔn nyinaa, mommra mmɛtie, na mɛka deɛ wayɛ ama me.

¹⁷ Mede m’ano mesu mefrɛɛ no, na mede me tɛkyerɛma meyii no ayɛ.

¹⁸ Sɛ medi ahuhudeɛ akyiri m’akomam a, anka AWURADE rentie me.

¹⁹ Ampaneampa, Onyankopɔn atie me, wayɛ aso atie me mpaebɔ.

²⁰ Nhyira ne Onyankopɔn a wannane me mpaebɔ ani, na wanyi n’adɔeɛ amfiri me soɔ.