Nnwom 62 - New Revised Asante Twi Bible

Nyankopɔn mu kommyɛ

Wɔde ma dwonkyerɛfoɔ Yedutun. Dawid dwom.

¹ Ampa, me kra yɛ komm hwɛ Onyankopɔn ara; ne nsam na menya nkwagyeɛ.

² Ampa ara, ɔne me botan ne me nkwagyeɛ, m’abankɛseɛ, merenhinhim bebree bi.

³ Mobɛha ɔbaakofoɔ akɔsi da bɛn, na mo nyinaa adwiri no sɛ ɔfasuo a akyea ne ɛban a agoɔ?

⁴ Ampa ara, wɔatu agyina sɛ wɔbɛtu no so. Wɔpɛ atorɔdie, wɔde wɔn ano hyira, nanso wɔn mu deɛ, wɔdome.

⁵ Ampa, me kra, yɛ komm hwɛ Onyankopɔn ara, na ne nsam na menya deɛ m’ani da soɔ.

⁶ Ampa ara, ɔne me botan ne me nkwagyeɛ, m’abankɛseɛ, merenhinhim.

⁷ Nyankopɔn nsam na me nkwagyeɛ ne m’animuonyam wɔ, me botan a ɛyɛ den, me dwanekɔhyɛbea ne Onyankopɔn.

⁸ Nkurɔfoɔ, momfa mo ho nto ne so daa. Monyi mo yam nkyerɛ no, Onyankopɔn ne yɛn dwanekɔhyɛbea.

⁹ Ampa ara, nnipa mma yɛ huhuo, mmarima mma yɛ atorɔdeɛ. Wɔgu nsaniam a, ɛhwan kɔ soro, wɔn nyinaa yɛ huhuo.

¹⁰ Mommfa mo ho nnto amimdie so, na monnyɛ dwotwa ho ahokyerɛ. Sɛ ahonyadeɛ dɔre a, mommfa mo akoma nnto so.

¹¹ Na Onyankopɔn akasa prɛko, mprenu na mateɛ: Sɛ tumi yɛ Nyankopɔn dea,

¹² na wo, AWURADE, na adom wɔ woɔ. Na wobɛtua onipa ka sɛdeɛ n’adwuma teɛ.