Nnwom 58 - New Revised Asante Twi Bible

Onyankopɔn ne ɔtemmufoɔ

Wɔde ma dwonkyerɛfoɔ sɛ wɔnto no “Al-taset” sankuo nne so. Dawid abebuo dwom.

¹ Mo atumfoɔ, ampa ara, moka asɛntenenee anaa? O, nnipa mma, mobu atɛntenenee anaa?

² Dabi, modi asɛmmɔne, akoma mu, mo nsam akakabensɛm na mokari de ma, asase soɔ.

³ Abɔnefoɔ bɔ ko firi ɔyafunum, wɔfiri wɔn na yam fom kwan di atorɔ.

⁴ Wɔn borɔ te sɛ ɔwɔ borɔ, wɔte sɛ ahuritia sotifoɔ a wasi n’aso

⁵ a ɛntie ntafowayifoɔ a wɔyi nkonyaa nyansam.

⁶ Onyankopɔn, bubu wɔn se, wɔn anomu, AWURADE, tutu gyata aburuwa sebɔmmɔfoɔ.

⁷ Ma wɔn nwe sɛ nsuo a ɛretwe, ɔkuntunu ne bɛmma mu a, ma no nyɛ sɛdeɛ wɔabu ano.

⁸ Ɔsene sɛ nwa a wɔapɛkyɛ no, sɛ ɔba a ɔbaa apɔn a ɔnhunuu owia da.

⁹ Ansa na mo nkukuo bɛte nkasɛɛ no nka no, sɛ ɛyɛ mono oo, ɛreben oo, ɔde abufuhyeɛ bɛpra ne nyinaa agu.

¹⁰ Ɔtenenee ani bɛgye sɛ wahunu aweretɔ, ɔbɛhohoro ne nan ase ɔbɔnefoɔ mogya mu.

¹¹ Na nnipa bɛka sɛ: Ampa, akatua wɔ hɔ ma ɔteneneeni, ampa, Onyankopɔn wɔ hɔ a ɔbu atɛn asase soɔ.