Nnwom 54 - New Revised Asante Twi Bible

Atamfoɔ ho mpaebɔ ne aboadeɛ ma

Wɔde ma dwonkyerɛfoɔ sɛ wɔmfa sankuo nto. Dawid nnweneho dwom. Ɔtoo no berɛ a Sififoɔ bɛka kyerɛɛ Saulo sɛ: Dawid abɛhunta yɛn nkyɛn no.

¹ Onyankopɔn, fa wo din so gye me, na fa wo tumi di m’asɛm ma me.

² Onyankopɔn, tie me mpaebɔ, yɛ aso tie m’anomu nsɛm;

³ na ananafoɔ asɔre atia me, na atirimuɔdenfoɔ rehwehwɛ me kra, wɔamfa Onyankopɔn anyɛ wɔn ani so biribi.

⁴ Hwɛ, Onyankopɔn ne me boafoɔ, AWURADE nko ne deɛ ɔsɔ me kra mu.

⁵ Ɔbɛma m’atɛfoɔ bɔne asane akɔ wɔn so, fa wo nokorɛ yi wɔn hɔ.

⁶ Mɛbɔ ayamyie afɔdeɛ ama wo; AWURADE, mɛyi wo din ayɛ sɛ ɛyɛ.

⁷ Na wagye me, amaneɛ nyinaa mu, na m’ani ahunu deɛ mepɛ m’atamfoɔ ho.